《我強姦咗個女同學》: 《我強姦咗個女同學》（十四.四)

《我強姦咗個女同學》（十四.四)
行出車站嘅時候，宛兒叫我。

「阿峰！」

我有啲出奇。

「咁啱嘅？你做咩喺度？」

宛兒驚我會走咗去咁快步行過嚟。



「咩咁啱，特登嚟等你㗎。」

「做咩要等我，你唔打俾我？」

「驚你嬲我吖嘛。」

「咁你就嚟呢度等，如果我搭第樣點算。」

宛兒望一望側邊：「你唔會嘅，你都唔鍾意搭巴士。」



我地靜咗企喺度，隔咗陣我問佢。

「你想點？」

「吓？」

「無嘢我返屋企喇。」我真係諗住返屋企，因為真係有啲攰。

宛兒拉住我隻手：「傾陣偈吖。」



「我無嬲你啊，你返去啦。」

宛兒企喺度唔肯行：「唔制。」

「都話無嬲你囉。」

「我想飲奶茶。」

「咁夜，仲飲咩吖，陣間你會瞓唔著。」

「無所謂架，我都好攰，咁咪平衡返囉。」宛兒扯住我：「去啦，嗰邊有快餐店。」

去到快餐店，無論幾點都好多人咁。



我同宛兒想搵個無咩人嘅位都有難度，只能夠搵個附近啲人睇落係靜少少唔會傾得太嘈嘅位置。
宛兒一坐低就兩隻手托住個頭，好似唔托就會跌落嚟咁。

「好攰。」

「叫你返屋企又唔返。」

「唔想返住。」宛兒合埋眼講。

「話極都唔聽。」

「邊有，大家講好咗要約四號出嚟就要㗎啦。」

「你睇你吖，」我摸一摸佢頭頂：「俾你瞓十五分鐘抖下先再講喇。」



「好啊，多謝。」宛兒托住頭、合埋對眼。

「抹乾淨張檯俾你趴喺度瞓喇。」

宛兒擰頭：「唔制，就咁得啦，我唔想郁。」

「都好，」我睇睇錶開始計時：「托穩個頭，唔好跌啊。」
宛兒如果攰嘅時候，瞓覺就會流口水。

有日佢好夜先返，又無同我講自己去做咩。

問我係咪擔心又唔係，嬲佢無講低去邊又唔係。

嗰日我打開房門等佢返，終於見到佢行過時。
「你去邊嚟？」



「吓？無嘢啊。」

「無嘢？」我走過去門口，摸一摸佢個頭：「好攰咁嘅？做咩嚟啊？」

「嗯......無啊，唔想解釋，好想瞓覺。」宛兒扯住我衫尾。

「算啦，唔問你喇。」我搣佢塊面：「咁你食咗嘢未？」

宛兒無答我，走咗入我間房趴喺書檯度：「想瞓覺多啲。」

「哦......咁你瞓陣先啦。」

我坐埋去，摸住佢個頭。



宛兒合埋眼講：「但可唔可以唔好搞我。」

我攞開手，望住佢瞓個樣。

「同埋唔好望住我瞓，好大壓力。」

「唉......」我起身鬆一鬆對手：「咁你自己喺度喇，我去廁所。」
我出咗去，都唔止剩係去廁所，仲去廳度執咗陣嘢，周圍望下，搞咗一大輪之後先返上房。

宛兒已經瞓咗去我張床度。

哄埋去裝下佢，又瞓到流晒口水。

我係咁咦用手抹一抹佢個嘴之後，就過咗佢間房度瞓。
隔咗幾日之後，咪就係佢行山嗰陣同我講分手嘅日子囉。

咁叫做對佢唔好咩。

……………..