《我強姦咗個女同學》: 《我强姦咗個女同學》（二）

 
《我强姦咗個女同學》（二）
 
酒？
我唔特别飲。
所以嗰陣應該唔係白痴地飲醉酒所以去隔離房就地强姦咗宛兒。
 
我無飲酒習慣，不過屋企都特别整咗個木架喺牆上面擺咗幾支酒嚟方便招呼朋友。
住緊嘅呢間屋，係我結婚時買，面積比起以前宿舍住間房大少少，有個細細地露台。
幅牆，係以前宿舍房嗰隻湖水綠。


其實我對呢隻色唔特别鍾情，係老婆揀嘅。
睇裝修時，老婆喺一堆油漆色辦裡面揀咗呢隻。
過去，從來都無留意到老婆鍾意呢隻色，我一心以為會揀最普通嘅白色，頂多會揀啲米色或者酒店房牆紙嗰種，最後有啲出乎意料之外咁，四面牆都係呢種帶有少少灰嘅湖水綠，家具係黑色，有個鐵造好似人咁高嘅鐵架用嚟擺書擺雑物細電器，格局同以前我間宿舍房有啲似。
可能係拍拖嗰陣有講過下以前讀書啲嘢，老婆又有睇過啲相，所以以為我鐘意咁啦。
但其實我對呢啲都無咩所謂，只係有時一個人喺屋企時，當望到電視機隔離個櫃，就會記起裡面有畢業時影啲相，裡面仲有同宛兒同其他同學嘅大合照。穿過呢個櫃，再穿過幅牆就係隔離單位個廚房。呢種格局、呢個方向，對照以前宿舍，就係宛兒間房。
有時出門經過隔離屋，偶然會撞見鄰居都出門口返工返學。鄰居姓李，兩公婆普通人，好似話做會計同寫字樓呢類文職，有個讀緊小學一、二嘅仔。
「林生早晨。」
「啊！早晨，咁早返工啊？」
「湊細路返學吖嘛，你呢？咁早出去？」
「係啊，食埋早餐先返。」


「啊......太太無煮早餐？」
「哈哈，唔使唔好意思，我同老婆離咗婚喇。」
我笑笑口講。
講真，都已經係定局都無咩好唔好意思覺得俾人踩中地雷，反正呢個係事實。
「啊......唔好意思。」
我耍下擰下手：「無嘢嘅。」
同時間，望到入隔離屋。
隔離座向爭嗰少少就嗰少少，個廳窗口對住球場無遮無擋，日頭顯得特别光猛。
呢陣晨光曬入屋，好有一種旅行時去到啲外國郊區渡假屋嗰種優悠。
 


……………….