因為妳，我學識左愛（籃球 少甜）: 4 籃球夜

 夜晚8點。「全叔，我走先，拜拜。」我準備離開。「拜拜，使唔使攞支水啊？」全叔問。「都好，幫我攞3支啊，連埋頭先果啲在我人工度扣。」我同全叔講。「唔使啦。」全叔攞左3支水卑我「今日入我數啦，頭先講笑咋嘛，咁認真做咩？」全叔笑住講。「是但啦，多謝你啦全叔～走先啦，拜拜」我攞住果3支水，跟住走左。「拜拜～」正所謂，三十六計，走為上計。 一陣之後，我都行到我嘅主場-觀泳。觀塘游泳池隔離有3個籃球，呢個籃球場都幾出名，有好多人來呢度打，好彩嘅，會撞到啲打甲一嘅人在度打。我去左廁所換衫，一來到球場，就見到肥強同啊鵬已經在度打緊。我去到之後，見到佢係好似輸緊。肥強攞住波在低位，背打緊一個高佬，正如一開始所講，佢話自己係kobe，所以係見到佢一個轉身fadeaway。啪一聲，佢卑人block左，粒波卑人地對面隊攞左，對面隊一下子跑到三分線，一球三分，終結左場比賽。 肥強同啊鵬行左過來。「屌，頭先果球真係好唔抵。」肥強仲講緊佢fadeaway果球。「話左你唔好成日fadeaway㗎啦，你都唔撚係kobe。」啊鵬串肥強。「飲水啦，全叔請㗎。」我攞左啲水卑佢地。「唔該。」佢地講完之後，即刻係咁飲。一陣之後，就輪到我地果隊打。3on3。簡單介紹下我地每個人嘅打位啦。肥強，1.76cm，控球後衛，雖然係肥左啲，但係都好靈活，拍波好少有失誤，成日傳到啲靚波卑，但係佢成日扮kobe，射波冇咁準。啊鵬，1.8cm 小前鋒，男神嘅外表令佢有好多女fans。最叻射三分，防守都好紮實，唔會隨便卑人過。但係內線射球就比較差。我，1.86cm，中鋒。低位單打係我最好嘅能力，罰球命中率高，有一定嘅彈跳力。缺點就係唔夠紮實，有時候係攞唔到籃板。外線命中率較低。 一開始，先針波。我地果隊射先。我第一個射 「咻」穿針入左。到人地射嘅時候，佢地射唔入，所以我地開波先。 一開波，肥強傳波俾啊鵬，我即刻上去幫啊鵬pick一pick， 我再roll入籃底，啊鵬再傳波俾我。當我諗住條跳起射波，我見到肥強衝入籃底，我即刻來翻個彈地傳波，肥強一接到個波即刻上，入左。冇錯，我地三個打波，成日都係用pick and roll，最簡單嘅戰術。在街場，呢個戰術，夠做㗎啦。 寫寫下啲文，覺得要描述打波嘅動作好煩，都係唔寫啦。直接飛到打完波。 打完幾場波，我地都已經冇哂力，全部坐哂在度吹水。肥強一次過將成支鯨吞落肚。「飲咁快，因住梗死。」我望住肥強。「你未拍拖，我都唔會死。」肥強繼續飲。「屌…….」我反白眼。「肥強你埋撚再講啦。」啊鵬放低支水。「你睇唔到啊雲哥今日嘅心情好撚曳咩」「sor咯」肥強講「喂，走未？」「行咯。」啊鵬揹起書包「宵唔宵夜？」「可以。」肥強慢慢爬起身「雲哥，食唔食啊？」「唔啦。」我都起埋身「老媽子煮左餸啊，走先啦」「拜拜！」啊鵬同肥強同我揮手。 「拜。」  「為何才十八歲要計較八十幾歲回望，要報答世界大多數期望……」聽麥浚龍嘅歌，係我最大嘅興趣。就當我聽住歌，翻緊屋企嘅時候，我竟然見到Cassie，而佢仲係同一個男仔一齊行。可能距離有啲遠，睇唔清楚個男仔嘅樣。不過諗深一層，啲女仔靚小小，正常應該係有仔。我笑一笑，就轉身離開。 另一面，Cassie望一望背後，佢身邊嘅男仔問佢「睇緊啲咩？」Cassie望向個男仔「好似見到我啲同學，喂，行快啲啦，翻屋企食雪糕！」