《你以為Flycation呢件事真係咁簡單？》: 五十一、善惡
門一推開，我看見會議室內已坐了十多人。
他們正在各自討論，表情嚴肅。
當他們留意到我步入房間的時候，他們馬上站了起來，恭敬地對我說了一聲：「總司令。」
平日的我，最多也只是接受學生的鞠躬問好，卻從來未受到過如此多人尊重的場面。
但我也相當敏捷地回過神來，向各人微笑點頭，回應了一句：「大家好，請坐。」
始終，此刻作為「光僕」總司令的我，總不能展露半點從前自己猶豫和害怕的樣子。
我坐到會議桌唯一懸空的位置上，身邊則是坐了湯浩禾。
而我顧目四盼，驚奇地發現了會議桌上竟然有幾個我似曾相識的人。
我對這些人的樣子頗有印象，但卻說不出名字，也許只是在某個地方曾經萍水相逢的人。
如今，在「善界」之中竟然與這些擦身而過或曾經短時間共事的人相遇，我不期然地再一次慨嘆平行世界的神奇。
「總司令，喺你頭先趕翻嚟嘅一個鐘頭入面，我哋為咗節省時間，已經做咗少少討論同分析，如果你唔介意，我可以簡單向你匯報一下。」湯浩禾用專業的語氣說道。
對於尚未完全掌握「善界」與「惡界」的我來說，湯浩禾的做法正中下懷，所以我馬上首肯同意。
「喺總司令你嘅吩咐之下，我哋派出兩個小隊合共二十人去咗『新界』進行查探。而根據總司令你提供嘅乘客名單上面嘅地址，我哋成功搵到名單上面嘅一百一十九人，而唯一搵唔到嘅，係譚殷琳小姐。」湯浩禾說到這裡頓了一頓，等待我會否有所補充。
而我想到，以宇宙間有三個平行世界而言，其實有兩個殷琳已經死在「惡界」，而尚餘的一個「善界」殷琳則在「善界」之中。
除非宇宙間另有第四個平行世界，否則在「新界」中找不到殷琳這件事情絕對是合理而可以解釋的。
湯浩禾見我沒有意欲發言，便繼續報告下去：「為咗再三確認乘客身份，我哋所有隊員都有影低喺『新界』所發現嘅目標，以下係頭先大家所影到嘅相。」
湯浩禾一邊說，一邊用手勢指示部下播放出投影片。
投影片一放出，頁面上投射出數幅明顯是偷拍而來的照片，以及照片中人的名字。
投影片按照PKXpress的乘客名單順序作為排列，所以當投影片一直播放的時候，我先後看到了楊格、Nic、甚至是Nic死去的女友Phoebe。
當然，我也看到了我自己。
照片中的我，正在家中與母親一同享用餐點。
母親正將飯菜挾到「我」的碗中，而「我」正微笑著接受。
當我看到飯桌上熟悉的飯餸，我首先不禁鼻頭一酸，內心中的思鄉之情隨之湧現。
然後，當我一想到這個「我」其實是來自窮兇極惡的「惡界」人，我既是為他奪去了我的身份而感到憤怒，同時又為正與「惡界」的我一同吃飯的母親而感到擔心。
「經過觀察同討論，我哋大家都相信相片之中嘅每一個人都係嚟自『惡界』嘅機會極高。而根據殷琳小姐同埋醒翻無耐嘅楊格先生所提供嘅證供，佢哋都係因為一程飛機而由『新界』進入咗『惡界』嘅。如果將佢哋被帶到『惡界』嘅呢件事，同埋『惡界』人取代咗佢哋身份出現咗喺『新界』生活呢件事連埋一齊，我哋咁多位頭先討論得出咗一個可能性，呢一部份，交俾負責研究『惡界』嘅Samantha再解釋。」湯浩禾說到這裡，用手掌指向會議桌的另一邊，有一位女士應聲站起。
恰好，這位名為Samantha的女士是我其中一位有印象，在我的世界中見過的人。
因著我對她的印象，我記得大概她也是跟我同一所大學的人，所以剛好曾經有一兩個相同的選修科曾與她相遇過。
Samantha此時站起了，一本正經地向我微微躬身並說：「我一直都負責研究『惡界』嘅環境變化。『惡界』因為以前戰事太多，唔少天然資源本來就已經受到嚴重破壞。而『惡界』自從發展科技之後，能源嘅消耗變得更快，所以喺『惡界』各國不斷自私開發資源嘅時候，『惡界』嘅環境破壞已經去到無可挽救嘅地步。
以我近年嘅研究，『惡界』嘅天空長年都已經出現陰霾，而空氣混濁嘅情況亦都愈來愈嚴重，有唔少『惡界』嘅人亦都死於慢性至中性呼吸道疾病。環境污染亦都直接影響咗糧食供應，根據我哋觀察同研究，糧食問題已經係『惡界』嘅普世社會問題，亦有大量兒童因為糧食短缺而被父母拋棄、橫屍街頭，更不幸嘅可能會直接成為父母嘅食糧。從種種跡象顯示，我可以大膽講一句，不出二十年，『惡界』就會成為人類完全不能生存嘅地方。
喺呢一個基礎之下，我頭先同大家開會嘅時候，提出咗一個大膽嘅假設，就係『惡界』想借今次嘅航機轉移作為實驗，而背後目的係想嘗試逐步將『惡界』嘅人以『一個換一個』嘅方式，不動聲色咁轉移到『新界』居住。如果實驗成功，『惡界』人就可以逐步轉移到去『新界』，直至完全取代『新界』人。咁佢哋就可以放棄『惡界』呢個惡劣嘅地球，然後用『新界』作為佢哋嘅新居所。」
Samantha的講解首先令我回想起在「惡界」的日子。
那灰濛濛的天，還有後來幾天我、楊格和Nic經常出現不經意的咳嗽，原來一切都事出有因。
所以說，整個「Flycation」事件的目的，很大可能就是「惡界」遷移與佔據我本來的世界的一個步驟。
這個，或許就是我一直以來要尋找的解答，也是Jeffery和周渡廷一直強調的「背後陰謀」。
而這個計劃，也正好對應我在「惡界」時聽湯浩禾曾經提及過的「轉移計劃」。
只不過，Samantha的解釋當然也令我相當驚訝，感覺，就像是聽到自己的家園將要一步步被他人奪去，但自己的家人卻一直被蒙在鼓裡。
「我覺得Samantha你嘅假設好好，咁我想問下大家頭先有冇諗到咩對策？」我向在座的每一個人發問。
「我哋一致同意，將會加強人手去監察『惡界』以及『Psyche』嘅所有行動，以免佢哋影響到『善界』嘅和平。」湯浩禾這時插嘴回答說。
「咁『新界』呢？佢哋對平行世界完全無任何認知，如果咁樣落去，一定遲早俾『惡界』嘅計劃成功㗎喎。大家有冇諗到咩方法去幫『新界』？」我想到自己家園的安危，不禁提出發問。
這一問，我發現席上人人噤聲，面面相覤，表情看來好像我發問了什麼錯誤的問題。
「副司令，你呢？唔通你無為『新界』著想過咩？」因為一時間不理解席上眾人的反應，我只好向身邊湯浩禾發問。
「嗯，如果總司令你所指嘅而家身處喺我哋『善界』入面嘅兩位『新界』人，楊格先生同Nic先生，我頭先已經為佢哋諗過啦。但係如果你嘅意思係要幫成個『新界』，咁恐怕就唔太符合我哋組織嘅宗旨。相信呢一點，總司令你係明白嘅。」湯浩禾臉帶微笑，溫和地回應著我。
「我唔明，而家『新界』受到威脅，我哋既然有比『惡界』更好嘅科技，唔係應該要向『新界』伸出援手咩？」我意想不到『善界』的人竟然會拒絕幫助我本來的世界，不禁提高了說話的聲量。
「我哋當然明白『新界』嘅情況兇險，但係若然我哋貿然出手介入，最後只會等於向『惡界』宣戰，亦好有可能令我哋世界一直喺宇宙間隱藏嘅位置因而曝露。即使我哋可以打贏，但過程一定會生靈塗炭，令好多無辜嘅人受害。所以『喺平行世界嘅事上面採取中立原則』，呢一點我相信總司令你係記得嘅，而亦都係因為呢一點，我哋整個『善界』先可以一直保持安穩直到今日。所以我明白總司令你心地善良，加上同『新界』嘅人相處過幾日，一定會更關心『新界』，但係希望你都可以明白我哋嘅限制。」湯浩禾說出這番話時真誠之至，完全沒有半點機鋒，反而似是在向我耐心解釋，還望我細心考慮。
事實上，我當然明白「善界」的處境。
我也不否定，此刻我如此著急想為「新界」發聲，是因為它就是我的家園。
可是，我也同時想到的是，難道為了保障自己的安全，就可以視他人的安危於不顧嗎？
但如果強出頭只會惹來更多的傷亡，這樣的出手相助又是值得的嗎？
在這刻，我突然想到了周渡廷在《起源》最後所寫下的那一句話。
「到底，什麼才是真正的『善』呢？在可以自由地胡作非為的『惡』之前，『善』會否反而成為了讓我們行善時捉襟見肘的限制，甚至是藉口呢？」