多謝OPEN DAY，令我鍾意咗妳: 第二章
[11/07/2020 20:35] Adrian: 咁聽日見啦😙
[11/07/2020 20:35] Cloud: 好呀～早啲瞓啦咁😉
[11/07/2020 21:35] 細細粒: 加油呀！
[11/07/2020 21:36] 細細粒: 只許成功不許失敗💪
吖講返先，我最後諗嘅plan係咁：
7月12號係星期六，我就約咗Cloud去南生圍玩。
可能你會諗：「吓，之但係你諗咗咁鬼耐就只係同佢去南生圍咁咋！？」
嗱，如果你咁諗嘅就真係太膚淺啦～
我揀約佢去南生圍係因為南生圍真係好靚，有山有水有花有花草仲有雀仔，應有盡有，去過嘅你就會知，真係世外桃源！而且我哋仲可以一齊喺元朗踩單車入去，係咪好啱我哋去呢～
仲有最重要嘅，係我哋可以喺南生圍放無人機！聽講嗰度啱放之餘，拍出嚟仲好靚添！
[11/07/2020 20:36] Adrian: 9點皇后街等啦😊
[11/07/2020 20:36] Cloud: 唔～早唞～
皇后街，係大部份西隧巴士轉入西隧前喺香港島中西區嘅最後一個站。
星期六上晝8：55。
「嘩～對…對唔住呀，要你等！」Cloud喘哂氣咁跑過嚟我面前。
嘩~佢今日上身著咗件運動型短䄂衫，下半身就…著咗條…好貼腳嘅運動長褲， 將佢下半身嘅輪廓完美咁show哂出嚟！嘩~好sporty呀。
我？唔使點提，只係簡單嘅黑色短袖衫長褲。
「唔緊要啦，妳遠吖嘛，更何況你都冇遲到～」我冧下佢。
吖，其實話時話吖，點解我一WhatsApp佢約佢出嚟佢就即刻肯嘅？唔係通常啲女仔都會好心思熟慮，諗過哂度過哂先做決定架咩架咩？而且，我哋計計埋埋都只係識咗一兩個禮拜咋喎。
「上巴士啦～」Cloud催促我。
算啦，都係咪諗咁多啦。
「吖係喎，你有帶Mav Air 2架呵？」Cloud突然間好緊張咁問我。
「Of Course，我特登check清楚係咪冇帶留嘢先出門口架。」
「我仲帶多咗2嚿電添，加埋可以飛差唔多個半鐘。」
「其實，你係為咗我而嚟，定係只係為咗部無人機而嚟架？」
…
唉！死火！佢唔答我之餘仲要擰歪面唔望住我！死得啦今鋪，好尷尬呀而家！
入咗西隧之後，巴士一路經西九龍公路、汀九橋、大欖隧道、青朗公路，最後終於入到我哋嘅目的地——元朗。
「下一站：形點丨…」
「Cloud，落車啦。」我拍一拍Cloud。
…
咦！？冇反應嘅？佢唔係真係嬲到車都唔落呀嘛！？
我決定拉佢起佢左手走人。嘩，我第一次掂佢隻手呀~好滑！
「做…做咩呀？」Cloud睡眼惺忪咁望住我，完全唔知我哋已經到咗元朗，就嚟埋站。
哈，原來佢係瞓著咗，怪唔得知佢過咗西隧之後就唔出聲啦。
落咗車之後，我哋就開始揾單車鋪租車。
「唔該~租全日吖唔該~」無奈呢間單車鋪人手真係太少，完全冇人理我。
「唔好意思，我哋兩個想租全日呀，邊啲車啱我哋呀？」Cloud索性走去老闆面前同佢講。
果然，求人呢家嘢真係女仔做嘅成功率會大啲，特別對住啲麻甩佬！
擾攘完一輪之後，終於租到2架單車。
So, let’s go！
大半個鐘頭之後，我哋終於沿住單車徑，由一個石屎森林，去到一個環境清幽、安閒自在嘅世界裏面。
而我哋一路踩單車，一路見到嘅景物都非常有趣，首先係商場，然後到醫院，廟宇，村屋……最後南生圍。入南生圍嘅馬路亦又本身寬敞嘅2條行車線慢慢變為1條行車線。所有嘅景物，都好有層次感，好有序咁慢慢映入我嘅眼簾。
「好靚呀呢度～拍低架車影張相吖我哋。」
「停一停吖喺度。」
「你睇下後面座山，幾似富士山！」
「嘩，黑臉琵鷺呀！好得意呀佢哋，咁大個嘴。」
以上全部都係Cloud講嘅嘢，而身為gentlemen嘅我梗係聽佢講啦，停車就停車，影相就影相。仲有，Cloud一入到去嚟南生圍就成個人笑逐顏開哂，同喺巴士上嘅佢形成強烈反差。
「好呀～」我一一答應佢。
可能你會覺得，Cloud係咪講錯咗富士山呀？富士山喺日本架啵~
冇，佢冇講錯。因為我第一眼望埋去，真係以為係富士山。嗰座山目測都有400-500米高，成座山都綠柔柔。而山頂對下50米倒就全部被雲覆蓋哂，好似冚咗層棉花咁。
「哈～香港版富士山。」
我哋再踩入多小小，就已經係馬路（南生圍裏面冇單車徑，所以要踩馬路）嘅掘頭路。
我哋想再「發掘」入啲，所以就踩入去入面條凹凸不平嘅「行人路」。
「咦！呢度有笪大草地喎，一陣可以喺呢度抖陣玩陣。」
「同埋放無人機！」
哈，正，等陣玩無人機又得，影下相又得，連坐低喺度瞓下覺都得，而且又舒服啲！
踩過呢條「行人路」嘅時候，就見到一大片蘆葦草田和一排長長的桉樹。畫面係咪好治癒呢？
我哋繼續沿著「行人路」向前踩，無耐就到咗南生圍最出名嘅婚紗橋。
「不如我哋自拍吖？」
「好呀～」
影完相之後，我哋又繼續踩入去。
「肚餓未呀你？」我問Cloud。 始終我未同佢出過街，我唔知咁樣佢攰未。
「梗係肚餓啦，你個肚仲未打鼓咩？」Cloud因為踩緊單車，所以冇擰轉個頭，我亦唔知佢嘅表情係點。
「吓你肚餓咁你唔喺元朗度食啲嘢先？」
「咁但係我想快啲入嚟吖嘛～」
Er…
好快，我哋就揾到間「餐廳」。點解要括住餐廳？因為根據《預防及控制疾病規例》 599系列規例：餐飲處所內不得有多於二人同坐一桌；顧客人數上限為通常座位數目上限的五成。
但係呢度我就見3個一枱又有，6個人一枱都有，而且呢度至少坐咗六七成人。
大家知道呢個599G嘅「威力」未呀？
「唔緊要啦～啲警察都唔會追到入嚟架啦～」老闆娘同我講。
有勇氣！Respect Respect！
轉眼間，我哋嗌嘅餐蛋麵同豆腐花都嚟哂，我哋就開始狼吞虎嚥！
「唔~好好味呀！」Cloud食到成嘴都係。
「嘩，你睇下你。」我用紙巾幫佢抺返個嘴。
佢呆咗咁望住我，塊臉跟住變得紅卜卜，我哋亦都由此變得尷尬起嚟。
食完埋單之前，雲雲話想去個廁所。殊不知，頭先個老闆娘無啦啦走咗埋嚟同我傾計。
「好温馨啵你哋頭先。」老闆娘同一個食花生嘅態度同我講。
「吓…吓咩呀…」我被佢搞到好緊張。「我哋同…同學嚟架咋。」
「唉，好心你就誠實啲啦。你頭先咁樣仲唔係鐘意咗佢！？你唔好話我知你只係攞佢嚟玩玩下呀！」老闆娘完全將我心底話講哂出嚟。
究竟佢係識讀心術吖，定係其實我已經好明顯呢？
「主動啲啦。」老闆娘趁Cloud仲未出嚟所以就繼續講。「佢係一個好女仔嚟架，唔好嘥…」
就喺呢個時候，Cloud去完有廁所出嚟。
「好唔好味呀？」老闆娘即刻改口。「下次記得帶埋啲friend嚟食呀！」
比埋錢之後，我哋就沿返住頭先條「行人路」出返去頭先我哋發現新大陸嗰度：大草地。
「嚟啦~快啲啦！」Cloud嘅表情同語氣就好似一個小朋友等食飯咁。
「咪咁心急啦~」我小比翼翼咁攞我部價值連成嘅Mav Air 2出嚟。
「登登登凳~」
我慢慢咁擘開架Mav Air 2嘅機臂，set開個remote同用手機連好部無人機同remote之後，就可以正式起飛lu！
[Ready to take off] 手機嘅DJJ FLY APP寫住。
「FU~FU~」機上嘅4塊葉開始慢慢轉動同加速，無人機終於喺搞完一大輪之後飛起咗！
「Yeah~嚟吖，影下我哋吖！」Cloud開心到癲咁濟。
但其實我臉上都掩蓋唔到我而家嘅興奮！
「唔～呀~試下玩下『環繞』吖不如？」我問佢。
「即係點呀？」Cloud又問返我。
「『環繞』即係我哋部無人機會自己自動圍著拍攝目標（即係我哋兩個）嚟拍片。」我詳細咁解釋比佢聽。
「吓咁小心喎，佢一陣飛飛下撞到啲樹咁點算呀？」
「唔緊要，呢部無人機有避障功能，顧名思義可以自動咁唔撞埋嘢度，仲自動避開佢哋繼續飛。」
「咁犀利～咁快啲試下啦，唔係就嚟冇電架啦！」
我喺個app度set咗我哋兩個係中心點之後，就撳咗「環繞」呢個掣。
果然，撳完之後架無人機真係自己圍住我哋轉，而且仲要自己避開埋啲樹添！
「跟住試埋『螺旋』同『沖天』咯。」
跟住落嚟佢都係大同小異，喺app度set好之後就開始飛。之不過係飛嘅路徑會唔同，所以拍出嚟嘅感覺都唔同。
「螺旋」：無人機會以拍攝目標做中心，螺旋形咁轉上去拍攝。
「沖天」：無人機會飛到目標上方之後垂直上升，鏡頭就會俯視住目標拍攝。
聽落係咪覺得好型呢？係，我哋都咁覺得。睇嚟我哋真係心有靈犀呀，嘩哈哈！
「嘩，得返30％電咋，要落返嚟啦。」
「嗯～換電再飛過！」
降落咗之後，就好快咁拆咗嚿電出嚟，插過嚿新電落去。
「又起飛lu~」
「不如今次唔影我哋，飛出去河嗰邊影好唔好呀？」我問Cloud。
「吓？哦~好啦。」Cloud好似有啲唔開心。
佢而家個表情好似好委屈咁。
「唔好咁啦，我入面仲有嚿電架。」
「咁好呀~」Cloud又即刻開心笑翻。
「哈，好似喺度控制緊隻雀仔咁。」而家架無人機飛緊出頭先條馬路到。
「我又想玩呀～」哎喲，Cloud扁嘴呀！
「哦…好…好呀」由於佢扁嘴真係太可愛嘅關係，連我都被佢征服倒。
係被征服到好緊張。
飛多咗陣拍多咗幾條片之後…
「吓～咁就3嚿電嗱？」Cloud小姐嘅公主病又發作。
係，我哋已經話咁快就玩3粒電啦。睇嚟DJJ真係要改善下啲電池，點解咁快就玩完，又話34分鐘嘅？
「咁無偈啦，一於坐喺度唞下攞，我又唔想咁快又返返去個石屎森林到。」我提議。
我哋就靜靜咁坐喺草地度唞陣瞓陣，好温韾咁互相住大家。
「下次你仲嚟唔嚟玩呀？」我問Cloud。
…
我望一望佢，原來佢又瞓咗。瞓咗喺我個膊頭上面。佢瞓覺個樣真係零舍得意，零舍可愛。擘大個口，好似就嚟會流口水咁。
哈，人瞓亦瞓，見佢瞓我又眼瞓；人埃亦埃，見埃落我度瞓我又埃返落佢度瞓。
16：30…
嘩，原來已經咁晏架啦？
「Cloud…Cloud，起身啦4點半啦！」我嘗試拍醒佢，因為真係晏啦，我哋仲要買外賣返屋企食。
點解？點解唔喺元朗食埋先返屋企？
因為…因為又係《預防及控制疾病規例》 599系列規例嘅「威力」啦～
599，SHOW TIME：
在局長根據第4(1)條指明的期間（晚上六時至明日早上）內，餐飲業務負責人須 ——
(a) 停止售賣或供應供在有關業務的處所內進食或飲用的食物或飲品；及
(b) 如該業務在某處所 ( 或某處所的部分範圍 ) 售賣或供應食物或飲品，供在該處所內進食或飲用 —— 關閉該處所或該範圍 ( 視屬何情況而定 )。
清楚嘛各位？
「唔？」過咗幾分鐘之後，Cloud終於肯擘大對眼。
「行啦，而家4點半啦，我哋要7點之前還車呀，仲要買外賣返屋企食飯呀。」老實講，晚市禁堂食真係好唔方便，仲好擾民。
「吓，但係我想睇埋日落先呀，難得嚟度。同埋呀，而家5點幾6點就天都黑哂啦，驚咩7點返唔倒去姐？」Cloud用咗把男人抵抗唔到嘅嬌豔聲線嚟同我講，而且佢仲一路講一路扁嘴！
「唔，咁好啦。」既然佢都講都咁咯，我有咩理由拒絕佢姐。
口不對心，就可以攞嚟形容我。因為，其實我自己唔想咁快走之餘，亦都想同Cloud一齊見證著今日嘅日落。今日2020年7月12號嘅日落除咗會標誌著晚上嘅來臨，同時都會標誌著我哋情侶關係會喺呢個日落度正式開始。
今日，係一個實驗，測試下我到底係咪真係確確實實徹徹底底咁鐘意Cloud。
唔係老闆娘嗰翻話我先咁諗，我一早已經咁諗。
老闆娘嘅話係一個「助攻」，助攻我更有信心表白。
而事實證明：係，我係由紿至終都鐘意佢。
所以，老闆娘都係功不可抹。
「行啦，去錦田河嗰度睇夕陽晚霞啦，唔好呆若木雞咁棟起度啦。」Cloud同我啱啱相反，成個人精神抖擻哂。
「哦…哦好呀，好啦咁。」
「諗咩呀你？好似靈魂出竅咁。」
「無…無呀。」
佢用咗一個懷疑嘅眼神望一望我之後，就轉身踩去河嗰邊。
諗咩，咪諗緊一陣點同你講囉！
「嘩~水洩不通呀真係~好有氣氛呀。」Cloud講。
「哈，又未至於水洩不通嘅~係人頭湧湧姐。」我笑佢。
「哼~」嘩，佢個樣好得意呀，好想一嘢…
「嚟吖，自拍吖我哋。」Cloud話咁快就已經攞咗部電話出嚟，打開相機。
「哈，好渣呀我哋。」我自嘲。
「點解呀？」
「你睇人哋個個都攞哂啲好勁嘅相機嚟影，但係我哋就淨係得部電話。」
「噗哧~」Cloud莞爾一笑。「有時候有啲嘢，完美就會變得唔完美；唔完美反而會更完美架。」
吓？完美就完美唔完美就唔完美啦，咩唔完美就完美完美就唔完美呀？
「唔使急住理解啦，遲下你就會知架啦。」Cloud見我極度困惑，所以就咁講。
「嚟吖，快啲影張相啦，唔係個咸蛋黃唔見咗架啦。」
説罷，我就握住佢部機，伸高隻手，對住我哋同咸蛋黃，然後嫣然一笑，並且撳白色圓形掣…
「咔嚓～」
「嘩~好靚呀影得。」Cloud情不自禁笑起嚟。
「梗係啦，唔好唔記得邊個揸機先得㗎~」我自己讚自己。
相入面，主要以後面嘅錦田河同大陽做背景，我同Cloud就搭住膊頭，互相對望並含笑。
畫面係咪好有愛嘅感覺呢？
睇完張相之後，我哋就一齊望住個夕陽。
而家嘅太陽，已經冇哂通紅刺眼嘅光芒。一嚿嚿嘅浮雲，一層層嘅輕紗，朦朧咁半遮住咗太陽。橘紅嘅夕陽映射出金黃嘅雲霞，最後紅黃溝埋，成為最約麗嘅色彩，令人心曠神怡。
我哋又好有默契咁對望，我知道，時機嚟啦，係時候啦。
我心跳加速，呢個心跳，係15年嚟跳得最快嘅一瞬間。
噗噗噗噗…噗噗噗噗…
各位，我開口啦！
「Cloud，我鐘意妳，我愛妳。」