毒撚大挑戰之女神要離開了！？: 拾參-夢想崩壞的開始

「吓」阿兒淨係覆咗一個字。

但我依然見到佢輸入中...

「韓國囉」佢又send咗個msg。

「問嚟做乜？」佢再send。

「冇」





「好奇心問下姐」

「但係」

「？」

「麥Sir點算」佢似乎好掛住佢嘅「BF」咁。

「冇計」我答返佢。





「唉」

唉屌，又忘記咗介紹麥Sir。

麥Sir，全校數一數二靚仔嘅阿Sir(阿兒覺得)，亦都係全校入面較為後生嘅老師(呢個係事實)，同時都係阿兒最鍾意嘅老師。

同埋呢排阿兒係咁讚麥Sir好靚仔，唉...

----------------------------------------------





幾日後

「等埋呀！」我邊講邊跑去上車。

啱啱坐完西鐵，好彩啱啱好趕到最少人嗰㗎車。

我坐咗喺架車右邊窗口位，見到隔離有架私家車。

Feel到坐前排嗰條女好似望緊我咁，於是我望返佢。

「阿兒？」我心入面嚇咗跳。

當轉緊彎嗰陣，我再瞄咗眼揸車嗰位人兄。

成件事都變得... 合理化咗... ？