<<我有嘅超能力竟然係⋯>>: 第十章 少年 睇到最後（第一季完）

我聽完呢個故事，個心寒一寒。唔知大家有無經歷過靈異事，我自己係無點遇過，亦都唔想遇到。

但我知道自己有超能力之後，我都相信世界之大，無其不有呢個道理。希望大家都會先相信，後求證。

我去開翻部手機，用直播形式記錄呢幾秒，今次我一定會幫ok妹抽到唔好嘅回憶，我再次催睡ok妹，進入白色世界。

今次書櫃上面又多咗一本書記載住ok妹呢件事，我今次撕咗好多頁，靜係留翻佢同toby去行山一開頭嘅回憶。

「你身體上有無問題？」Dr聲音突然岀現。





「無事啊！好正常。做咩？」我回答。

「好快你就會體驗到㗎啦。」Dr意味深長嘅一句話。

我被扯翻岀現實世界，我為咗俾ok妹好好休息，就停咗直播，挨住ok妹訓著咗。

第二日嘅早上。

「你有無睇到youtube啊！」ok妹突然拍醒我問我。





「我啱啱先俾你嘈醒，點會有睇啊。」我煩躁咁講。

「勁多人討論你啊！你尋晚咪直播咗幾分鐘嘅，有人錄底咗宜家有好多人話要會一會你睇作係咪呃人啊！」ok妹好興奮咁講。

我拎起手機㩒嚟睇下，一睇到熱門就見到十幾秒嘅片段，片中人就係我⋯

留言版裏面對我有褒有貶，有啲話我假，話我炒作呃擊，有啲話我係玩催眠，有啲話我係呃女仔上去做非法野。睇咗大部分都係貶多過褒，即刻明白咗點解有時做網片嘅製作者究竟承受幾多壓力。

我都無再睇落去，我覺得唔需要太注重其他人嘅諗法，反正我無做錯，亦都無呃過任何人。





我提起精神同ok妹去食個早餐，再送佢翻屋企休息下，呢段時間我都開咗個IG 為自己宣傳下。

《催睡師》
不理會評論，只理會你的回憶。

短短兩句說話，再開帖叫人如果需要幫助，我願意聽，費用全免，就咁就關咗個App再翻屋企。

係巴士嘅我感受到一眾目光，我坐係上層頭位，就係唔想有人會認到我。我聽到有人細細聲咁笑，眼尾見到有人指住我。

巴士到站啦，我二話不說即刻衝落車，再跑翻屋企。但事情無就咁完結，手機不停響起，「喂，果個你嚟㗎？」呢句說話從我手機聯絡人名單入面逐一出現。而IG更加收到不同人士訊息想約我，係呢一刻仲有不同嘅網紅消費我，利用我做話題。

大量訊息令我陷入一個迷惘嘅地步，唔知自己係咪做錯一件後悔嘅事。

我突然感受到劇烈嘅頭痛，係一剎那間入咗白色世界。





「現眼報嚕，幫人下話，幫到俾人批評同誣蔑，感覺如何先？」Dr話。

「無所謂啦，一開頭係咁㗎啦，之後可能會有好轉呢？」我講。

「可能會嘅，但副作用宜家應該都差唔多開始，宜家係頭痛開始，之後變成點？我都答你唔到，加油啦年輕人。」Dr講。

講完我就翻翻現實，但奇怪嘅地方岀現⋯時間過咗幾個鐘。

我開翻IG，見到人數爆升到三萬，然後我係訊息開始簡咗幾個人對話，亦都開始咗幫助幾個呢幾個人，但個故事都比較愛情類。

佢地相信咗我嘅能力，亦都有為我打氣，但我頭痛越嚟越痛....

過咗三個月後⋯⋯

「喂！你咪係果個催睡師？我有啲野想搵你⋯我都有你擁有嘅野，但我同你有少少唔同，我能力係偏向英雄果類。」一位少年對我講，講完就一拳打落旁邊嘅牆。





牆身石屎剝落，我同呢位少年對望，然後笑一笑⋯⋯


(第一季完)