<<我有嘅超能力竟然係⋯>>: 第七章 再次

入睡後，我最唔想遇到嘅夢境再次出現，上一次醒嘅最後係揮動雞毛掃嘅聲音，而今次竟然係連接住上一次嘅情境。 兩下聲響之後，我手臂多咗兩條粗短嘅傷痕，掂落去好痛。

雞毛掃上嘅羽毛不停脫落，藤條開始分裂，痛感越嚟越痛。佢捉起我隻右手，大大力咁打入我手掌入面，有少少木刺直直插入我手掌，但我再無嗌，默默承受呢個痛楚。

「真係唔打你唔得！你同條廢柴有咩分別你知唔知啊？就係你廢過條柴啊。你講你有乜用啊？」老豆大聲對我講。

當時我係一個讀梗小四嘅小學生，我右手不停震但我都拎起枝原子筆一路捱打一路做埋所有功課，大概凌晨四點先做好晒所有野。果年嘅我好討厭學校，好討厭屋企，好想自己一個人過一世。

朝早六點，但係我一啲都訓唔到，我望住右手嘅手掌位置。我終於明白中文書入面嘅皮開肉爛係咩意思，慢慢痛覺都顯露岀嚟。



「衰豬，你隻手點解咁？尋晚你老豆打㗎？唔係啊嘛，打到咁會唔會太過份啊！」

呢一把溫柔嘅聲音就係我媽咪，佢係我最愛最想保護嘅人，我係果刻係真係以為我啊媽係唔知我老豆打我打成咁。

但其實我宜家成年之後諗起呢件事，根本啊媽係為咗我所以唔會直接講話佢知呢件事。而我都有問過啊媽呢件事其實佢知唔知。

「果時緊係知啦！我扮唔知㗎炸！我係張被入面係震緊㗎！」我啊媽之前講過。

再次拉翻入夢境嘅我，深深體會到咩叫羞恥，我帶住全身嘅傷痕上校巴翻學。旁邊嘅同學仔都望實我啲疤痕，果刻如果係校園青春劇嘅話，應該會有個女同學岀嚟關懷我，但現實係無呢件事發生嘅，周圍只有驚訝同恥笑聲。



係呢個充滿恥笑聲嘅夢入面醒翻，我眼角有一滴淚沿住面滴入耳仔。

我起身煮咗個麵，煎隻太陽蛋，然後開始暴風吸入。有時飽足感可以化解到負面情緒，所以我都好推薦俾你。

「喂？啊Dee！我就知你起咗身㗎啦，不如今晚岀嚟飲個野啊？」啊由打電話過嚟問。

「okok！咁係公園仔等啦。」我回答。

啊由同我確認咗時間之後就收線，唔知佢發生咗咩事咁大穫要我幫手解決呢？



夜晚時分我準時赴約，仲買埋佢中意飲嘅白ice坐係公園仔等佢。

「咁準時嘅你，之前你都無時間觀念㗎喎。」啊由暗串我。

「大佬，我宜家做保安最重要就係時間觀念啊，你試下遲一分鐘睇下接你更果個同事會係幾閪面啊！」我覆翻佢。

「唉，唔講咁鬼多野住先啦⋯⋯入主題啊」啊由開始講。

「唔好住，等等我啊！」我停住佢。

我用右手再次向啊由伸去，我今次無令佢訓著，但我都收到少量嘅訊息，病床，櫃員機。

啊由好奇怪咁望住我，覺得我痴咗線咁。

「無野啊！你啱啱頭上面有隻野飛嚟飛去，我幫你撥走佢炸！」我好快咁解釋。



啊由就開始講佢嘅故事。