一篇潮文改變一生: 第十四章

往後兩星期，我發現牛仔褲生意越來越好，銀鈴開始應接不睱，最終我決定正正經經搞大佢，我租左個細細地既寫字樓，SET左少少必需品，正式叫銀鈴入主做我的創作總監！
我去一D美術學院，搵左一班鬱鬱不得志既畢業生，內地真係一個對創作唔專重既地方，好多有能力既學生最終都淪為工廠工人，只能賺取幾百蚊月薪，甚至失業……
我叫銀鈴全權替我簡卒，最終簡左三個畫功好好既後生仔女，銀鈴話佢地手畫信得過，而我就當然信得過銀鈴。
另一面，我開始主動聯絡一D製衣廠商，以批發價大量購入牛仔褲，令到成本大大下降，而且D牛仔褲質地仲無之前咁黑心TIM！
好快，在銀鈴的教導之下，三個新員工都開始上手，當然比起銀鈴有一段好大距離，但係都已經合格有餘。
老老實實，至今我已經有左一批穩定客源，就算將哩班新人既牛仔褲當一直賣開個D咁賣，都應該問題唔大，不過可能我天生真係唔係做大生意既材料，人地話逢商必奸，但係我卻認為要建立商譽就必需從根本做起，所以我把哩批新褲既定價下調至160一條，籍以同銀鈴親手製作個D作出區分，估唔到反而打開左另一個市場層面，訂單一直增長！
到哩個地步，我決心要創立一個正式品牌，小弟讀得書少，本來諗住就咁叫做「銀鈴美工」，但係銀鈴死都話用自己個名好尷尬，所以最後……
「風鈴美工」正式成立！
 
D野開始穩定，我D咁懶…識享受人生既人，當然就去好好咁善用自己既時間啦！




就好似今日咁，我又無所事事地係街度尻HEA……
行下行下，聞到咩味咁Q香呀？真係好香喎！唔講得笑，搞到我食指大動，沿住香氣而行。
四周都算係偏靜，無咩途人，行左好一段路，終於搵到間超級唔起眼既鋪頭仔，D香氣就係由此傳出。
一步入店內，呆左！我堅係呆左！第一樣映入眼簾的，係一個女店員！
好似…真係好似……
好似THE LYNX EFFECT個廣告既女仔…唔係似，係直情一模一樣！
最神奇係連佢地個造形都九成相同，基本上你睇過個廣告就明，不過我都簡單形容一下，個女仔頭髮及肩，髮尾微翹，戴住條橙色頭巾，身穿露肩白色衫，外加橙色圍裙，五官精緻得仿如藝術品般，而且看起來有D半唐番……
頂！大陸D山寨貨有無似到咁呀？一時間我仲以為係個廣告拍第二集！即刻四處觀看有無鏡頭！
 
答案當然係無！更加唔係D咩整蠱節目，而係實實在在有如此一個美女店員係度看店！




我呆左係門口成分鐘都有，美女店員都忍唔住望下我，疑惑地側一側頭……嗚呀！真係越搞越似！想點呀到底？想J死人咩！不過佢哩個側頭卻比廣告內那種少左幾分誘惑，多左幾分好奇。
「先生，請問你想……」
我如夢初醒：「哦！我…我肚餓，想食野！」
我答得突兀，搞到佢都忍唔住莞爾。
「好呀，你睇下想食咩？」
我行埋佢個櫃枱，見到其實都係一個櫃仔幾塊鐵板咁，都幾簡陋。原來唔係賣包，枱後有幾款唔同既燒餅。
D燒餅真係好香，我每款指一指，話：「我每樣要兩件！」
佢答應一聲，就夾起D燒餅係鐵板度加返熱，之後入落個細細既牛皮紙袋度交比我。
吓？我仲幻想佢會好似個廣告咁，用茄汁寫個電話比我架嘛！咩原來無架？
「um……妳唔加D茄汁比我架？」




「……先生，燒餅唔落茄汁架喎！一係我加D蔥比你好無？」