《前度超渡師》: 第十二集-裙腳仔男友（三）
［幾張臉掠過，未留座，只得你，始終也明白最初。］
-
Rubber Band嘅《未來見》，除咗勉勵一班沉於困獸鬥入面嘅香港人之外，仲鼓勵迷失緊方向嘅港佬，從我約佢上嚟「前度超渡株式會社」之時，我就知道佢好想改變自己嘅陋習，但佢自己都唔知自己有咩問題，咁咪就需要我哋嘅協助囉。
-
話咁快就到會見日，港佬都好守時到，至於OL，我尋晚同OL講咗，今次嘅「超渡」唔需要OL嘅在場。因為我想留住港佬嘅面子，話晒兩個都係「麻甩佬」，傾偈嘅氣氛肯定比較好，唔使因有女士在場而收斂，港佬應該可以講得開放啲嘅，唔使驚驚青青。
-
「坐吖！隨便坐，係呢，你點稱呼啊？」第一次見港佬真人，感覺好正經，一套正經嘅恤衫西褲，gel到成嚿石咁嘅頭髮，個人仲飄緊啲濃到濁親嘅街邊雜牌古龍水。不過唯一唔夾嘅就係對鞋，成個配搭就好似八十年代去Disco嘅服飾，唔明嘅話，睇下的士陳跳《野狼disco》嘅服飾就明㗎喇！
-
「我叫Ryan，好高興認識你。」呢刻嘅Ryan就好似去一個正式嘅會面場合咁樣，佢伸出右手，我都好禮貌咁同佢握手。
-
「唔使咁正經嘅，我哋都係輕輕鬆鬆咁傾偈就得。」就係因為我知道大家見面嘅時候，難免會有正經得嚟而尷尬嘅場面出現，所以喺上集都講，我將呢度嘅裝修設計成家居風，唔似一啲專科醫生房嘅格局，等大家可以換個好啲嘅氣氛進行傾談。
-
「其實……我好想改變我自己，我好鍾意Wendy，我好真係好愛佢。」我從Ryan嘅言語中，睇得出佢係好愛Wendy，而Wendy應該就係之前上嚟嘅OL。
-
「我不如俾個時間你講下你對佢嘅感受吖！」喺診症之前，我都要聽下Ryan嘅故事先得嘅，如果之前OL同我講嘅故事有加鹽加醋，令到Ryan變咗係受害者就唔好啦！
------
（Ryan視覺）
-
由細到大，阿媽得我一個仔，所以我一直都俾阿媽寵愛，凡事都唔需要我落手，只要我一開口，阿媽就會幫我做得妥妥當當。直至遇上Wendy，我先知道，呢個世界唔係圍住我轉，而係我要自己去迎合世界流動。
-
自從同Wendy一齊之後，嬌生慣養嘅我就要開始負起一個男朋友嘅責任，每日朝早準時同佢講早晨，返緊工一得閒就噓寒問暖，收工都即刻仆去佢公司樓下接佢收工，夜晚同佢食完飯就送佢返屋企。日復日、月復月、年復年，呢種勞碌嘅生活持續咗三年。
-
返工辛苦，放工要應酬佢，真係好辛苦。作為男人，我相信你都明白有時壓力大咗，想自己一個去輕鬆下，但每次我想靜靜嘅時候，佢就會無限轟炸我部電話，我唔準時覆佢，佢就會發脾氣，而我又要嘥時間氹返佢。最後我返工嘅壓力都係未解決，但我就要解決埋佢嘅煩惱。不過就算幾辛苦，我都笑住同佢相處，因為我好愛佢，我好錫佢。
-
我好愛佢，我真係好愛佢，我為佢，我付出咗好多，我份工成日都要加班，都會攞時間同佢食飯，永遠喺佢面前笑住對佢。
-
（Ryan視覺完）
------
聽到呢度，我覺得Ryan都冇Wendy講得咁差啫。其實Ryan都係因為工作忙碌而虧待咗Wendy，從Ryan嘅口中，我已經好清楚佢係好愛Wendy，只不過Ryan唔識用一個正確嘅手法表達，所以呢對情侶先會有咁多拗撬，好多嘅爭執只要溝通得宜，大部分嘅摩擦都可以迎刃而解。
-
除咗Ryan嘅問題令到Wendy煩擾，Ryan嘅阿媽都係一個大問題，不過咪又係衰多口。正所謂「病從口入，禍從口出」，但始終把口就生喺人哋到，我哋唔可以控制，唯有自己冷靜，盡量當係耳邊風。
-
「忍一時，風平浪靜；退後一步，得寸進尺。」Wendy應該去到忍無可忍嘅地步先爆發，如果由我哋直接同Ryan阿媽講，佢一定唔會聽，但如果由自己個仔親自講，我相信阿媽嘅賤嘴性格應該會改善嘅。
-
為咗之後Ryan女朋友幸福，我決定坦誠咁同佢講令壽堂嘅問題，即使咁樣話長輩級嘅人物係有些少不敬，不過我唔驚，反正我又唔會做Ryan嘅女朋友（或者男朋友）啦！我打工咋嘛，我嘅職責咪就係幫事主解決問題，而佢阿媽正正就係一個問題囉！
-
「其實你自己知唔知點解Wendy要同你分手㗎？」話晒呢度得兩個男人，我亦都直接問佢。
-
「係咪我太忙冇時間照顧佢？」Ryan疑惑咁問，睇係佢唔知自己衰咩。
-
「咁你洗耳恭聽喇，接住落嚟，我對你嘅言語可能有啲差，請你唔好介意，我係衷心為你好，唔係因為我受咗你前度嘅委託，而係我真係想幫你，我知道你自己都唔想你哋兩個去到呢個咁僵硬嘅局面。」我都唔講啲門面客套說話，直接同Ryan指出佢嘅問題。
-
是咁的，你可能自己唔知自己有咩問題，但作為外人嘅我，一聽就知唔得啦。
-
其實你基本上係一個好男人嚟嘅，即係專一、唔煙唔酒、唔去周圍蒲、唔會打女人。呢幾點我係好欣賞你嘅，始終去到你呢個年齡都唔去玩，都真係比較少。我唔知你以前有冇玩過啦，當然我亦都唔想知啦，話晒每個人都有自己嘅過去嘅，至少我喺Wendy口中聽返嚟就係冇嘅，我都信你係冇講大話嘅。
-
從唔玩、唔蒲呢點梗係好，但有兩點你真係要去改，就係唔好再咁大男人性格，同埋唔好凡事都聽阿媽意見，唔係叫你唔聽，而係你應該有獨立時候，有自己嘅主見同思想，嘗試相信自己嘅諗法。
-
「乜我真係好大男人性格咩？」Ryan打斷我嘅發言，睇嚟佢真係唔知自己有啲大男人性格。
-
（待續 To be continued）