【120k最後釋出】科學禁書目錄——索引上的女孩們（完）: Cindy篇——一屋不能藏兩女
『Cindy，有同學嚟做project，放心，妳匿喺房就得，玩下手機啦，要麻煩妳辛苦幾粒鐘。』
S：「係咪想死呀，呢度又黑又焗要我哋喺度等咁耐，信唔信我掉晒啲嘢畀你做吖嗱？」
威：「Issac哥，乜你重未食飯呀？」
我：「Sorry，一時唔記得去咗附近買飯啫，我咪即刻衝返嚟開門囉。」
威：「嘩，你買埋我哋嗰份呀？我哋咪話食完飯先嚟囉，定係你餓過飢呀？」
我：「一次買兩盒，夜啲叮返有得食咪唔洗行多轉囉，你知呢度行去商場唔近。」
S：「古古怪怪，快啲開門啦。」
其實Stella係有我鎖匙，我無收返佢，但呀威喺度佢當然唔敢自己開啦，如果唔係…不敢想像，都唔知係嚇死Stella定嚇死Cindy，我就實死無生都似。
呢啲校本評核project最後一年就特別多㗎啦，三或四人一組，Stella本身喺女仔圈唔太受歡迎，我就出名唔埋堆是Q但不理世事，唔會有乜hardcore partner，咁我哋之前都咁咪同組囉；講真望落幾吸引㗎，我哋兩個絕對可以搞掂所有嘢，不過一來啲同學唔太重視成績，二來我哋氣場太大都幾趕客；而阿威就算係同我比較friend，佢都係宅男，份人無乜嘢，淨係鍾意打機，畢業後想入電競圈打下工就算，預咗佢對個project無貢獻，剩係負責出錢出『力』。
威：「咁我幫你裝game先啦，如果有嘢用得著我就出聲啦。」阿威當然醒水知自己嘅duty。
我：「呀…可唔可以幫我哋斟兩杯水呀？」
威：「玩嘢呀？你咪飲緊檸樂囉。」
我：「我唔飲Stella都要㗎…」
威：「喂！呢間屋好似係你㗎喎。」
我：「我噒緊骨…航唔郁哦…」
其實我當然唔係想佢斟水啦，使完佢入廚房我就即刻推咗盒飯入房畀Cindy，如果餓親佢我命仔又凍過冷水，我望咗一望間房好正常係吉房，斷估Cindy佢坐咗喺地板掛？完事後我即刻閂返門，講真Stella對我間屋嘅一草一木當然瞭如指掌啦，莫講勘水，煮埋飯都無問題，但我同佢而家…真係有啲感觸。
『乜嘢同學喎，你同我講Stella嚟咪得囉。』
『咁重有阿威嘛，妳都知我哋一組。』
『原來有女嚟，唔怪之得你咁緊張。』
『無呀，做正經嘢㗎。』
『理得你，多謝你盒飯。』
其實Cindy妳都係女嚟，過咗嚟我屋企，都未夠廿四粒鐘，就好似當咗自己唔係嘢咁，我真係唔敢同妳講妳琴晚瞓個位係Stella瞓開。
好彩一切相安無事，Cindy無煩我，阿威專心打機，我就同Stella做project，點知過咗兩個鐘…
『好悶啊，我想出嚟陪你哋。』
『咪玩啦，妳而家咁樣點出嚟呀。』
『乜喎，都無人睇到我。』
『妳著返透明校服？』
『無喎，乜都睇唔到好麻煩唔想著，而且著裙好易揩跌其他嘢。』
『咁，咁點得，阿威都喺度。』
『唓，你同佢咪又係睇唔到我。』
『我哋做功課無特別，有乜好陪。』
『我唔理你，快啲開門畀我出嚟，我知道匿喺邊會安全，佢哋都係我同學嚟，我想見下其他人，如果你唔理我就同Stella講我而家嘅情況，佢坐我隔籬，都算friend，應該無事。』
無辦法，佢咁大我，唯有聽話。
我：「呀…有啲焗，開道門透下氣先。」
S：「係囉，十二月都咁翳，地球無救㗎喇。」
當然，我開門嘅唯一原因係放透明Cindy出嚟，我乜都唔想諗，祈求佢小心翼翼唔好露出馬腳俾人發現；如果佢同Stella講咗嘅話Stella肯定會知乜事，佢會點呢？同Cindy講全部係我陰謀？應該唔會，因為App嘅事係我哋共同永遠承諾，唔會俾第三個人知；佢會扮乜都唔知，都有可能，然後配合我一齊幫Cindy還原？定係最後一個可能，佢會幫我溝Cindy？但，咁樣好似係喺度傷害Stella…
前面係EX，後面係透明裸女，我真係如坐針氈，好彩呢一粒鐘異常安靜，我有啲懷疑Cindy佢係咪悶得滯入返房瞓覺算。
S：「喂，阿威，我哋整完本booklet喇，你係咪幫手攞去印呀？」
威：「Yes Madam，當然啦，十個copy，粉紙彩印，前透明膠後硬卡紙釘裝，一定整到最靚，交晒畀我啦，我聽日會自己去攞埋貨！」
S：「知你做到嘢喇，我會幫你整埋講稿，你會睇會背㗎可？」
威：「放心，一定滾瓜爛熟！咁我而家順便出去買啲零食畀你哋吖。」
其實我覺得佢比較啱做生意人，知自己要負責乜，點同人deal，講真兩三舊水換到一份大project成績係好抵；而對於無限金錢嘅我嚟講，要佢出呢少少錢都幾無謂。
S：「呀…著住件褸真係熱死…」
我：「咁妳重著…除…」
我明點解，佢喺我面前一除，入面只係得件超低V Tee恤，成條乳溝加兩邊波波露晒出嚟，連條Bra邊同帶都睇到嗰隻，呢件嘢係我哋拍拖嗰陣貪玩一齊買嚟等佢色誘我…但…而家情況不妙啊！Cindy睇到晒佢咁露畀我睇，唔知會諗乜！
我：「使唔使開冷氣畀妳？」
死！講錯嘢！Cindy乜都無著，如果一陣凍到佢打乞嗤就一鑊熟！
S：「算啦，都十二月，唔好咁浪費。」
我：「都係嘅…」好彩。
S：「原來你同阿威都真係幾friend㗎噃。」
我：「係呀，一齊成日打機吖嘛，所以學校無乜點溝通，但一出嚟玩就好夾。」
S：「真係好，有同學做自己好朋友。」
好彩Stella唔係同我講乜嘢敏感話題，咁我就當然繼續扯住個topic唔放啦，如果唔係唔知Cindy會聽到乜。
『真係好大波！』
我都唔知Cindy行去邊send message，唔深究喇，總之唔會電話飛飛下就得，而我當然懶得覆。
『等我行過去幫你裝下有無離罩先。』
我自暴自棄喇，最壞結果都係自爆等兩個女人憎死我。
『Stella，對唔住，透明Cindy喺屋入面…』我打咗句message無send出去，睇下有無機會出事時可以力挽狂瀾，Stella，我雖然負咗妳，但我對妳係絕對信任。
「叮，叮。」是天堂的鐘聲呢。
我：「著返褸啦，佢返嚟喇。」
S：「嗯。」
威：「搞掂晒喇，聽朝就可以攞貨，呢度係你哋嘅零食。」佢做到又該做嘅都做得好足，唔好以為係乜薯片朱古力，佢手上嘅係蜜汁烤雞髀，德國豬肉腸，壽司，日式小食拼盤，重有支法國有汽提子汁…放低完啲嘢佢又返去打機，而我哋就一邊食嘢一邊寫講稿。
S：「你都一齊食吖。」
我：「唔喇，我頭先行返嚟已經咬咗條手卷，整污糟Issac部腦佢唔會放過我。」
平時就係嘅，而家你淋杯汽水落keyboard我都唔識畀反應你，不過最好唔好啦…
好在，無驚無險又半個鐘。
威：「其實我阿媽都有煮我飯㗎，唔知…」
S：「咁你返屋企食飯啦，你嘅任務已經完成得好好，其他嘢我哋會埋尾。」
頂，阿威喺度係負責中和㗎，佢走咗我點算呀！
威：「Stella姐，Issac哥，唔該晒你哋，咁我走先喇，bye bye。」佢醒到識擺Stella名喺前面。
阿威一閂門，Stella又即刻除返佢件褸，我即刻吞一吞口水，手指已經隨時準備好send條救命訊息畀Stella。
S：「好喇，得返我哋兩個。」
救命，唔好講啲惹人誤會嘅嘢啦。
S：「近排點呀，有無乜嘢新搞作玩出嚟？」
我當然知佢講乜，問我有無用隻App做壞事。
我：「無呀…咪又係咁，準備寫完講稿就玩阿威帶嚟隻新game。」
佢其實一聽到我講打機就唔多開胃，不過我而家就係想佢心情唔好咁hyper，對唔住Stella。
我：「係呢，琴日去同人補習嗰度點呀？」
S：「呢啲簡單嘢嚟啫，手板眼見工夫，又唔係要補到人5**…不過…阿偉佢琴日喺我面前直接同我表白。」講真我都嚇咗一嚇，內心有少少難受，不過我而家又邊有閒情計較呢啲嘢。
我：「有人鍾意你，咁唔係幾好咩…」
S：「嗯，但我唔知接唔接受好，如果拒絕佢，我就唔係幾好意思係佢阿哥補習社打工，成日見面會好尷尬。」
我：「咁妳對佢有乜感覺先？」
S：「其實都無同佢同過班，淨係喺學生會同社funtion同佢交過手，講真唔係幾識佢。」
『我想食八爪魚，留返啲畀我！』
我：「咁要識一個人都唔易，唔係幾日嘅時間就可以做到，唔真係相處過好多嘢都唔會知嘅，不過妳同佢都咁鍾意語文科應該都謦得埋。」
S：「咁…我應該接受佢？」
我：「嘗試相處下啫，又唔係一開始就過人世，或者最後無結果，但都對妳有得著。」
S：「你都講得啱，或者我係時候要開發下自己。」
我：「我覺得感情嘅嘢都好講經驗，唔一定為咗目的嘅，過程中往往會學到啲自己有益嘅嘢，咁將來每一步都行得更好。」
S：「睇嚟你都好想我有拖拍咁喎。」
我：「咁每一個人都渴望被愛，想開心幸福嘅。」
S：「咁你呢…」
我：「哈哈…我重有好多game未玩…爭好多份game評未寫…」
S：「係喎，唔記得咗呢個都係你要忙嘅part time，睇嚟你都係啱做宅男。」
我：「哈…暫時啦。」
喺呢個時候有啲手指突然係咁㧻我條腰。
我：「Stella…可…唔可以剩返啲冷盤畀我？」
S：「吓，好易壞㗎喎，唔快啲食晒佢？」
我：「我夜啲想攞嚟整冷麪…」
啱啱截停到佢想拮落最後一隻八爪魚度，然後死魚眼咁望住我。
S：「古古怪怪，你鍾意啦…係喇，如果你話我著到咁同阿偉出街好唔好？」
我：「咁樣…有啲過火喎…第一次出街…佢實會頂唔順留晒鼻血㗎喎…正常男人都…」
S：「你都頂得順啦。」
我：「我…我…視覺上都重係好震撼…」
S：「你知我唔識著衫，如果我好似平時咁著，同男仔出街好似有啲失禮，而且…如果我應承咗佢嘅話名義上都係佢女朋友…」
我：「係嘅，喺男朋友面前著靚啲係應該嘅，性感少少都無壞…加返件外套囉，咁都好好睇…我諗佢份人望落企企理理唔會做啲衰嘢嘅。」
S：「就好似你咁講啦，咁我應承佢聽日同佢出街啦…」
我：「嗯…玩得開心啲…」
S：「嗯…希望啦…」
我：「…」
S：「點呀，係咪準備開工打機喇？」
我：「哈哈…都差唔多啦。」
S：「好啦，咁我都早啲走，唔阻住你喇。」
我：「呀，出面條路黑，我送妳去巴士站吖。」
S：「唔使啦，又唔係第一次嚟，星期一見啦！」
Stella，對唔住，其實妳一啲都唔阻我，我重有好多嘢想同妳謦，但…但…我以後一定會好好補償返妳！
C：「呼！喂！我講得返嘢喇！」
我：「喂喂！唔好咁大聲！樓下都聽到喇！」
C：「Stella好大呀！」
我：「咪玩啦，妳未見過咩？」
C：「咁又唔係，PE堂換衫會見到，不過唔會專登行埋去昅㗎嘛。」
我：「妳又唔係無，有乜好昅。」
C：「我頭先望住佢再揸返自己對波，我覺得好自卑呀…」
我：「我都唔知有乜好講…快啲食埋妳個冷盤佢啦，好辛苦先留到隻八爪魚畀妳。」
C：「算你啦，個心都重有我，唔係飛晒去大波Stella度。」
我：「妳食到八爪魚汁…滴落個身度喇…」
C：「咦…係喎…滴咗落我粒lin度。」
然後我睇住滴汁飄返上半空再入返落隻八爪魚碎屍度再慢慢消失。
C：「咁大波你唔想揸咩？」
我：「點會唔想喎，咁唔係想就做㗎嘛，我都唔會無端端揸妳波啦。」
C：「唓！你自己唔敢揸咋嘛，佢大到咁我都想體驗下。」
我：「妳咪下次PE堂換衫突襲佢囉，女仔唔係最興玩呢啲㗎咩？」
C：「我唔係想講呢樣，佢著到咁畀你睇，佢對你點會無嘢呀？我敢擔保你主動啲一定有得揸。」
我：「咁唔係因為為咗呢啲…而對佢乜嘢㗎嘛…咁樣…好自私…傷害到人點算。」
C：「咪玩啦，感情嘅嘢唔係自私係乜，唔通你專登揀個自己唔鍾意嘅女仔咩？你咁想做聖人就等住做成世處男啦！」
我：「我…我…」
C：「我話你知呀，個個男人都一鳩樣㗎啦，又曳又鹹濕，用下面嚟諗嘢，我同過咁多男仔一齊個個都話愛我一世㗎啦，有邊個做到吖，做緊愛嗰陣咪愛我囉，諗到咁複雜做乜，細個拍拖就係玩玩下㗎啦，唔通day one就諗幾時結婚以後點生活咩，男仔就係諗點氹女仔上床，而女仔就係諗可以點用自己榨取到男仔最多嘅好處同愛惜。」
我：「…」
Cindy，我咪就係想同妳玩，氹妳上床，但而家搞到咁，我重有乜可能做得出。
C：「你睇下你啦，對住Stella就咁多道理講出嚟，咁你自己又點，戀愛講經驗，你返返去啲game度同主角拍拖啦。」
我：「Sorry。」
C：「你同我講有乜用，我可以肯定Stella對你有意，同你講其他男仔就係想你阻止佢接受其他人，件衫都未著畀人睇都嚟畀你睇先，分明就係想你追佢啦。」
我：「呢個…」
C：「哼，你咁都無反應，我諗你其實都係睇唔上佢，唔鍾意佢，嫌佢份人生硬古板著衫老套剩係識死讀書。」
我：「唔係嘅，學校度我得佢一個女仔friend，如果一齊之後再鬧反咗，我咪無咗一個重要嘅朋友囉，而且玩玩下，妳覺得Stella份人會接受？分分鐘成世嬲死我啦；定係妳真係覺得，我同佢真係咁夾，可以一齊行到落去？」
C：「咁…你有道理嘅。不過，你而家多咗我呢個朋友，所以可以去試都得。」
我：「同佢…都係做朋友…舒服啲…」
C：「係呢，你幾時同佢咁熟㗎？平時返學唔覺嘅？」
我：「一齊溫書見多咗咪熟囉，通常啲叻嘅人都有啲問題唔好意思同普通人講，咪咁囉…如果喺學校行得太埋實俾人講閒話，唔係幾好嘅。」
C：「熟到畀埋對波你睇？我完全無諗過佢私底下會著呢啲款式嘅衫，我著都覺得over咗少少。」
我：「呢層…我唔想揣測太多…」
C：「不過真係估唔到佢會同你謦得咁深入…你哋講嘅阿偉係咪鍾文偉？」
我：「吓？妳點知係佢？妳識得佢？」
C：「咁文科叻嘅有幾多個阿偉喎，唔通考第尾準備畢業出嚟做廢青嘅會夠膽追Stella咩？」
我：「咁又係，的確一諗就諗到。」
C：「不過呢個阿偉…好似有啲嘢。」
我：「係？有啲乜呀？」
C：「好難解釋，佢都應該算叫做有撩過我…不過，我都唔熟佢，我諗我唔係幾適合評論佢。」
我：「係呀，希望Stella唔會識到衰人啦。」
C：「不過戀愛嘅嘢好難講嘅，有時唔試過都唔會知，你又點呀，繼續原地踏步？或者你打個電話畀Stella重截得切佢應承人㗎。」
我：「我…算啦…諗下點解決妳嘅問題先緊要啲。」
C：「對唔住，或者…可能我唔喺度…結果就唔會咁…可能我阻住咗你…係嘅…如果要你喺我面前同佢表白真係幾有難度。」
我：「唔關妳事嘅，唔使咁諗。」
C：「不過如果我可以睇住佢請你食檸檬，我一定會笑到碌哋忍唔住出聲嘰咗出嚟，好喇，由得你，我去沖涼先，你當我唔存在就得。」
我…真係唔知想點，Stella我當然重有感情，但我又邊有咁厚面皮開口話復合，而且我而家嘅少少長進都唔見得會同佢相處得好好；以前係我衰，同佢做完愛就唔多想理佢，覺得佢有手有腳唔使特別照顧，佢煮嘢畀我食都無特別多謝佢，反而同我無乜關係嘅Cindy就已經俾我照顧咗一整日，為咗佢即刻仆去買飯連約咗Stella都唔記得…
不過我又好矛盾，一直以嚟我都覺得揀女朋友都係Stella呢啲會好啲，認真，斯文，潔身自愛，努力上進，唔亂搞關係；相反Cindy呢啲睇落又濫又隨便，態度貪玩輕挑，但我而家竟然覺得好好相處，就算佢話我，命令我都唔會有唔舒服嘅感覺；加上認識多咗，我發覺以前一直都將呢啲女仔標籤咗，其實Cindy都唔係又曳又淫蕩，就算佢飛釘，唔著衫，都只係生活態度啫。
算，返去打機。