【120k最後釋出】科學禁書目錄——索引上的女孩們（完）: 神秘的電話App

大家好，我叫做Issac，係喺一間Band2中學入面讀中六理科班，成績算係不過不失啦，不過係比起一堆名校嚟計，喺我自己呢間野雞學校嚟講就一直年年考第二，尤其係理科成績特別出眾，只不過係中英文就比較普通；其實都有好多人提議過我轉去一間好啲嘅中學㗎，不過我唔鍾意，一來我喺呢度可以屌打一大堆廢柴會好high，二來讀書我唔係靠上堂聽Miss阿Sir廢噏，三來呢度管得hea，遲到又得，上堂瞓覺又得，唔交功課又得，啱晒我，最後最後就係呢啲學校先多靚女，而且比較玩得，唔似得Band1學校啲公主同邨姑。
點解我年年考第二呢？好簡單，咪就係有唯一一個PK年年成績都好過我囉，佢係我嘅同班女同學Stella，而且一直都同我同班，讀嘅科都係完全一樣，我可以肯定嘅係佢一定無我咁叻，但佢花喺學業上嘅時間就係以我嘅倍數嚟計，而且乜嘢功課分Project分小測分佢全部唔會放過，咁我呢啲懶懶閒嘅又點同佢鬥呢？呢頭理科考試高佢兩三分，嗰頭語文科同功課分都已經輸返晒，但我都無佢符，因為花咁多時間喺學術上完全唔係我嘅風格；我重要打機㗎嘛！係咪？我嘅其中一樣興趣係寫遊戲程式，將來都想投身呢一行發展，兼且而家都已經有投稿去遊戲論壇同網站，我又何來咁多時間呢？
我：「呀，Stella，點解妳好似永遠都唔會離開呢間學校咁嘅？我喺自修室留得越嚟越晏，但都係見唔到妳返屋企嘅？」
S：「如果有一日我溫書時間少過你，難保我下次考試keep唔到第一㗎喎，如果你想我早啲走咁你咪快啲返屋企打機先囉。」
雖然我同佢唔friend，但係都唔會好似你哋所諗咁敵對唔出聲，同咗班咁耐，又有乜可能無交流過吖，而且呢度真讀書嘅得幾條友，點都會謦下書本上嘅嘢嘅，不過我同佢講嘅內容多數都係嘴炮，臭串，揶揄下咁，我諗你哋都明。
我：「承妳貴言，今日已經溫到夠性價比，再溫就無economy of scale，會DMRS(Law of diminishing marginal return of substitution)㗎，我又唔會吼住妳個第一名嘅。」
S：「你估真係free market咩，好多market leader為咗玩monopoly生產到蝕本都要繼續賣，你唔想考第一，可能第三名嗰個想呢。」
我：「廢事同妳詏，返去打機搵下樂趣先。」
S：「嗱，你唔好偷偷哋溫書呀，好好哋沉醉喺你嘅樂趣，如果唔係我會心碎㗎。」
其實我哋平日嘅對話就係咁…不過無嘢嘅，我知我真係唔會追呢個第一，我認命，所以都唔會同佢敵對；我間唔中重要問佢借功課嚟抄，而佢覺得咁會令我學業差咗所以佢都樂意咁做。


離開咗學校之後我就一路行返屋企一路玩app game，點知行到半路中途斷咗線，頂！明明打緊公會戰㗎嘛，咁樣實俾Team友屌死都似，搞乜鬼呀？我望下手機頂，原來部機由4G轉咗去WiFi，因為我set咗auto detect，所以有網絡就會自動連搞到斷線，諗住係公用network咪停係度等連返打埋先行囉，點知連極都連唔到…
我覺得有啲怪，於是拉條bar落嚟睇下個WiFi係乜鬼，點知我真係嚇一嚇，個WiFi SSID係一串超長嘅數目字大細階英文好似啲自動Gen嘅密碼咁，長到唔夠位display出嚟，呢一刻我嘅心情已經唔再喺個遊戲度，於是我開個explorer出嚟想入佢個host度睇下呢個WiFi搞乜鬼，點知一開個homepage已經俾個host改鬼咗，成個頁面都係黑色，中間有一粒灰色制，寫住download。
我真係超心寒，而且成條街無乜人得自己一個，我知道呢個係其中一個share病毒嘅方法，但如果人哋真係有心hack你，又點會搞到個氣氛咁恐怖，一定係彈個電訊商logo出嚟呃你有免費WiFi用，但又不停connection error咁…
我企咗喺度有啲驚，當然最安全做法係即刻熄WiFi甚至乎即刻熄機走人，但係我又好好奇究竟呢個WiFi係喺度搞乜鬼，或者我可以先搵啲apps查下個WiFi signal，或者hack返入去個host睇佢係乜嚟，正當我諗諗下時個download字樣變咗數目字喺度倒數，10…9…8…
我就撞邪咁㩒咗粒制，而部手機就即刻顯示download緊一個66.6MB嘅檔案。
成個過程好快，幾秒鐘就完咗，完成之後個畫面即刻跳咗去no network，而個WiFi訊號亦都自己斷咗；我企喺原地度打開WiFi設定頁，點都搵唔返個SSID，我再行前行後十米八米search咗十幾分鐘都係完全搵唔到頭先嗰個唔使密碼嘅WiFi Access Point，如果係電腦白痴可能覺得無乜嘢，但我沉浸IT知識十幾年，覺得成件事係超恐怖。
我確認咗電話入面個download folder真係多咗一個66.6MB嘅檔案，證明啱啱件事真係有發生過，我唔知點好，但係都要返屋企先。
講下自己屋企先，我係住喺一棟村屋入面嘅頂樓連天台，自己屋企物業嚟，而老竇就喺一間食品代理公司度做經理，時不時都要過日本九州打點啲貨，咁九州商會嗰邊都持有好多物業，所以佢去公幹時唔使住酒店，商會有安排到單位畀佢住，久而久之，佢就話嗰邊環境舒服好多，而且反正本身係吉屋嚟，商會都畀埋鎖匙佢任住，結果佢越嚟越少返香港，就連阿媽都搬埋去一齊住…
就係咁，我大部份時間都係一個被獨留在家嘅十七歲兒童，好自由，成個天台俾我搞到好似實驗室咁，而且佢哋覺得我成績自己搞得掂所以都好放心…順帶一提，我屋企唔可以叫有錢，只可以話係安穩，希望大家唔好誤會。
返到屋企，我重未知點算好，於是我就諗下點整個架步先，退一萬步諗，個檔案係一隻毒嚟，佢會偷我資料，會整壞我系統，最極端嘅可能會整到我部機爆炸。我攞咗一堆架生上天台，一部吉嘅notebook，一部舊電話，上面有一枝滅火筒，我再開咗一大缸水，應該點都死唔去掛？成個系統無濕電，有乜事應該自己都settle到。


我抄個file去notebook度，係一個手機程式安裝檔嚟，用咗幾隻掃毒軟件都掃唔到特別嘢，試過用模擬器係開唔到，直接打開個程式睇就完全係66.6MB咁長嘅亂碼，點睇都睇唔明，連啲檔頭檔尾都同平時安裝檔唔同…即係我部電腦完全分析唔到係乜嚟。跟住我抄咗個檔去舊電話度，正諗住㩒完安裝部電話隨時會著火準備掟落水缸，但兩秒後佢就彈咗安裝檔錯誤，我竟然因為部電話無著火而感到失望…
去到最後，我覺得成件事只係一個惡作劇嚟，最多咪喺原本手機再裝多次，九成九又彈error…不過安全起見，我都係抽返張sim卡出嚟先…我無乜意識咁㩒安裝，諗住過兩秒就delete，點知今次佢同我load到而且安裝，大概過咗半分鐘之後就安裝完成；我非常疑惑咁去返桌面睇，真係多咗一個程式logo喺度，係一個黑色背景上面有一個白色Omega符號，而個程式名叫PDE。
點好？成件事超有問題喎！我係咪應該剷咗佢？我再諗諗，其實部電話都係打機多，又無信用卡嗰啲嘢，最多無咗個email都重可以換過個新嘅…我搬咗張凳去水缸前面，準備好隨時施放水淹之術，再小心翼翼咁㩒落個程式logo上面。
成件事好正常，有一個黑色介面嘅程式彈咗出嚟，部機無出煙無發熱，熒幕首先出咗個Omega Logo，再出咗個程式嘅全名叫Physical Data Editor，下面有一大段英文講呢個係乜programme，大致就係話呢個程式係用嚟修改地球上所有物理性質嘅底層資料，well…講到咁大唔怕俾人笑嘅咩？而且重話要開著WiFi嚟用，但就唔使連接任何Access Point等佢自己keep住search就得。
呢個時候我差唔多100%肯定成件事係惡作劇嚟，而且呢個惡作劇以我嘅水平都差唔多做得到，咁我都姑且㩒埋個Agree落下一版睇下乜東東，入到主程式介面，真係十足十坊間改game嗰啲cheater同trainer咁，有好多頁面可以修改資料，有matter、wave、energy、time咁…方死我讀Physics對得重唔夠多，由於我已經好肯定呢個係惡作劇軟件即係uncyclopedia啲friend，所以我都不以為意，咁就開咗第一頁嘅location嚟玩下。
呢頁好簡單，佢有文字介紹係話locate位置，而且係只限地球上嘅位置…well…咁下面就有三個空格，分別係經、緯、高度；又真係做得幾仔細喎，衰鬼！於是我就㩒locate制試下，首先部電話就自己打開GPS，嗯…然後佢再有指示，就係將部電話向上下左右高各移動10cm嚟做fine locating…係咪真係惡搞人要去到呢個地步呀？不過我都照做，每次搬完電話都會load三十秒到，大約搞咗五分鐘我終於攞到個location，三個空格都變咗數字，咁其實都係GPS啫…
但有啲怪，佢經同緯都去到小數點後七個位，而高度就係用米嚟做單位，都去到小數點後兩位，我半信半疑咁入返屋開電腦打返串經緯度落Google Map，原來Google Map都只係支援到小數後六個位，而去到第七個位即係精度去到1cm…我再喺地圖放大望，再望真啲，結果就睇到個坐標落正我呢棟建築物上面；即係話至少個locate嘅功能唔係玩嘢，但平時…電話GPS有咁準嘅咩？
我開始唔知懷疑真定懷疑假好，就走咗入廁所繼續研究隻App，都係嗰句，著火就掟落浴缸…我打開matter嗰頁嚟睇，超多空格，就好似人哋寫程式嗰啲helper咁，有location，area，volume，mass，matter data，object orientate or not，create定destroy…我個心突然變得好寒，如果佢係惡搞，咁未免太過專業了吧，而如果係真嘅話，咁…咁…咁…我唔敢想像。
但無論如何，好奇心都已經令我停唔到落嚟，我點都要自己實驗一次，去踢爆呢隻搵笨App，我抱住殺雞必需用牛刀嘅心態出咗屋企，去到後山斜坡一個隱蔽嘅位置，起碼出大事唔會整冧間屋先，都唔知自己呢個諗法究竟係天才定白痴，總之我就要開始實驗，首先我喺個去水渠石槽蓋上面放低部電話攞location，可能呢度比較多樹，今次我足足tune咗成十分鐘先攞到location，原來佢重可以save as list同define as，於是乎我就export咗個位置落matter嗰頁。
至於物質…物質…乜物質好呢？我認我膚淺，第一時間個腦就浮現咗金出嚟…不過黃金起碼相對上安全同容易觀察，當我一打黃金元素符號Au落去，佢已經彈埋原子序79出嚟，而且重有另外一大抽數字，佢話default值就係地球常見值，如果唔鍾意可以改，即係中子電子數，能量態呢啲咁，我越嚟越緊張，開始信呢個App嘅功能，重信埋佢堆default值，之後我㩒create點知佢就彈咗syntax error，我就再睇說明認真咁填格仔再係咁㩒create，包括填返mass等於0.1kg，試咗幾次syntax error後終於有一次success，部電話就好似入咗loading咁；我打開個電筒射住個石槽蓋上面，開始好似有少少霧咁嘅嘢，慢慢變到越嚟越密重反光添。


係！係真係黃金！呀，我其實唔知，總知眼望係一堆金色反光嘅碎粒，淩空無中生有咁出現再跌落個石蓋上面，下意識之下我好想即刻摸下係咪金嚟，但衝咗一步之後我發覺唔掂當，於是即刻跑返屋企；望落係金啫，如果唔係點算？可能有毒？有幅射？會爆炸或發熱？我喺屋企攞咗一個鑊鏟，一個大膠盒，一枝水，然後再跑返去後山，途中重捉咗隻蝸牛，我有啲懷疑頭先見到嘅嘢係假，只係幻像，可能返返原位已經乜都無。
重喺度，我用電筒照住堆金粒閃閃發光，點睇都唔似假，但既然咁無可能嘅嘢都發生到我就更加要小心，啲金真假唔緊要，但我真係唔想死住…我攞住水樽潑咗少少水上去堆「物質」上面，完全安靜無任何反應，無煙即係唔熱，無結冰即係唔凍，而無溶就即係話唔容易進入人體，算係過咗第一關令我敢接觸呢堆嘢，我攞起個鑊鏟兜起啲金落個膠盒入面，再放咗隻蝸牛入去，我又怕佢會餓死所以求祈放咗啲草同樹葉入去…
完事之後我返返屋企，完全唔敢分析頭先發生嘅嘢，我淨係知如果聽日隻蝸牛重係生勾勾咁我就可以繼續處理嗰堆金…我攤喺床度不停咁諗，即係我可以不停製做任何物質？呢個年代金已經小兒科，我不停諗，水銀、鉑、銠、TNT、可卡因、鈾、鈈…只求發達真係太無志向，我應該可以佔領世界？
總之我諗到short咗瞓唔著，直至唔知幾時鬧鐘嘈醒我去返學。