[愛情有甜]《當你識咗對雙胞胎》: 第十章

第十章
 
轉眼間順心已經搬咗嚟同順恩住就快一個星期。
而聽日順恩都要帶學生參加為三日兩夜嘅訓練營。
於是前一晚，順恩都坐喺廳到檢查一下執齊哂啲行李未。
與此同時，啱啱沖完涼嘅順心都喺廁所走嚟。
「執齊哂啲嘢未啊？」
「應該執得七七八八啦。」順恩點一點頭。
然後望過去自己家姐，見佢沖完涼之後換咗件白色T裇同運動熱褲。
而順心都跟手講咗句「執齊咪好」，就開始駁風筒吹頭。


過程中，順心一隻手遞高拎住風筒，一隻手開始整理長髮。
嗰對波濤洶湧嘅雙胸都隨刻喺輕薄嘅布料下現形。
令到同為女性嘅順恩都忍唔住瞄咗家姐對胸兩眼。
「家姐，點解你嗰胸可以咁大？」
順心聽到自己嗰妹突然提起自己胸前嘅雙峰，唔多唔少都錯愕起嚟。
「吓！？你問我點解啊……」一時三刻順心都唔知點答順恩好。
但順恩好快又再講：「明明我由中學開始已經成日飲木瓜奶、食雞胸、晚晚做胸部按摩，點解對胸都無家姐你嗰對咁大同形狀咁靚？」
「可能我哋出世嗰陣，我吸收哂你啲營養掛。」
喺順心講緊嘅同時，順恩都開始將視線向下移。
發現自己家姐除咗「波」濤洶湧之後，下半身都一樣充滿線條。


可能因為平時出街著長褲所以唔太覺，但依家見對方淨喺著住一條熱褲，就可以明顯見到一條完美嘅下臂線。
而且白滑嘅大腿又有啲肉哋，相信喺男人見到，都會忍唔住撲埋去咬一啖。
不過順心都好快發現自己嗰妹喺到掃瞄緊自己嘅身體，所以都有啲臉紅咁話：
「兩姊妹就唔好咁樣啦……」
順恩聽完嘆咗啖氣，之後就擰翻轉頭繼續執嘢。
 
但喺過咗一陣，當順心吹完頭，就蹲喺順恩嘅面前。
「話說呢幾日唔見你過隔離搵男朋友嘅？」
「唔好提阿廣呢個衰人啦。」順恩又嘆咗一大啖氣。
「做咩啦？嗌咗交啊？」順心一副八卦樣咁問道。


於是順恩喺將啲護膚品擺入袋之後，就開始進入呻氣模式。
「阿廣個衰人啊，知我嚟緊幾日去camp，就約咗friend聽晚去飲嘢！」
「咁佢約朋友聚會……都好正常即？」
「自己女朋友辛辛苦苦要帶學生入營，無得輕鬆放假。佢就趁機走去享受天輪之樂……嬲佢啊！」
順恩呻完，就大大刀咁將啲執剩嘅物品扔入袋。
但喺面前嘅順心仍然有啲不解咁問：「所以你哋就嗌交啦？」
「喺，佢話最多遲啲帶埋我去見佢啲friend，呢下激到我呢！！！」
「唔好嬲！唔好嬲！我哋轉移話題！」順心見況即刻安慰一下順恩。
 
「話說家姐翻銀座嗰間薩利亞翻成點？」
「嗯……幾好啊！啲同事都ok nice，喺有幾個做part time嘅後生仔態度好差，搞到成日比客投訴。」
當順恩得知自己家姐翻新工作地點嘅情況似乎都唔錯。
於是都開始微笑：「搵日等你翻工個陣，要去撞下你。」
「咁我到時一定會幫你加料架啦，哈哈！」
「你敢？哈！」


兩姊妹接下落嚟都繼續有傾有笑咁，一個執嘢，一個睇住人執嘢……