從我開車撞死她的那刻開始: 第四十二章
我按下了接聽鍵。
「喂，阿陽？」
「哈。車仔，好耐冇見。」
這傢伙消失了好一段時間，之前為符見藥的事奔波時，他連影子都不見，到現在突然找上來，想必不會有什麼好東西。
「點呀，有咩事？」
「死仔包，你唔係唔記得呀嘛……我生日就到啦喎。」
「呃，係喎。咁你想點？」
「嘻嘻，唔好詐傻啦。你知我想要咩架。」
我可沒什麼耐性跟人猜啞謎。挖了挖耳朵，然後徐徐說道：「想要送禮物呀嘛，唔係唔得，不過我就黎失業，可能要遲啲先補到俾你。」
「妖，我先唔稀罕你啲禮物呀，我只係想你幫我追掂佢咋。」
「你係指八婆……Jenny？我以為你咁耐唔搵我，所以死左心添。」
「痴線啦。佢大波有長腿，仲要係鬼妹，我話你知，我食硬佢呀。」
雖然不認同他玩弄感情的態度，但是之前答應過替他把八婆珍追到手，我也不打算說什麼了。
「係係……咁你想點？」
「我想你幫我請佢黎我既生日party。」
這就是阿陽這通電話的來意。未待我回話，他便搶著說：「喂，一世人兩兄弟，幫幫手。唔怕話埋俾你知，前排我唔蒲頭，就係因為我花左全副心機去準備生日party……所以佢一定要黎呀。」
用不著這麼大費周章吧。如果不是事先說明，我還以為八婆珍才是生日的主角。
「已經plan好哂架啦。我會用盡渾身解數，冧死佢。」
我看著八婆珍，感覺到視線的她跟我對望起來。她笑了笑，然後繼續看電視。我看她沒機心的樣子，心裡不禁猶疑，把綿羊送進豺狼巢穴裡，是不是一個好的決定呢。
「咁阿晴點呀。」
「放心啦，我已經同佢講左果日有野忙，遲啲同佢補返慶祝架啦。」
「你真係仆街，生日都唔陪自己女朋友，仲去溝其他女仔……」
雖然我是以開玩笑的口吻來說，但我打從心裡厭惡他的價值觀。要不是跟他交情不淺，要不是他之前曾全力扶持過失意的我，我一定會遠離他。
「你依家先知咩，哈哈。」
當然，厚面皮的阿陽，才不會聽出我話中帶刺。
「總之，三日之後夜晚八點，帶Jenny黎老地方。唔該哂！」
留下這樣一句話後，他就掛了線。八婆珍看我收起手機，便問我：「邊個黎架？」
「阿陽囉，記唔記得佢？」
「點會唔記得呀？上次打邊爐識既。佢搵你咩事？」
八婆珍微笑著，嘴角上泛起小小的梨渦，當我看到如此純真的臉容時，罪惡感不禁油然而生。
「冇呀，佢話佢幾日之後生日，想請我地去佢個生日party喎。」
「咦？」八婆珍拍了拍手，笑得更加燦爛。「我都可以去？」
當然了。倒不如說，我才是派對的陪襯。
「幾時呀？」她又問，一副興致勃勃的樣子。
「星期六，夜晚八點鐘。」
「星期六八點……」她從褲袋拿出一本記事本，翻了幾頁後便說：「好呀，果日我地冇更返，一齊去啦，車仔！」
「啊……嗯。」
「呵呵，好期待呀。係啦，駛唔駛買禮物俾佢呀？」
「唔駛啦，佢唔care既……」
「買好似好啲喎。咁啦，上次你咪帶左我去旺角既，果度好似好多野買，不如晏晝我地去買禮物，食埋飯再一齊去佢果度啦！」
不待我回應，八婆珍就已經為那天定好行程。
看到她那麼高興，帶她去生日派對，未嘗不是一件壞事。我不知道阿陽葫蘆裡賣什麼藥，不過他那麼胸有成竹，說不定準備了一番必殺追求攻勢，八婆珍也說不定會受落。
這樣的話，八婆珍就會得到愛情，愛情，是幸福人生不可缺少的元素。
雖然阿陽是個玩家，但我知道他會善待少女，會竭盡所能給予她幸福。他的話，可能比我更適合，讓她放棄尋死的念頭吧。
金髮的少女，對愛情有什麼看法呢。我不其然地想著。