從我開車撞死她的那刻開始: 第三十六章
客貨車在高速高路上行駛，八婆珍一言不發的望住窗外，全身散發著一陣不快的氣牆。
「唉，車仔。」她說。
「點呀。」
「我地咁樣做係唔岩架。突然丟低哂啲野，好冇責任心囉。而且仲要係咁忙碌既日子。」
雖然我很想回嘴，但是道理站在她那邊，想罵她也沒有辦法。嘴裡唯一能吐出的，就是諷刺她何時做了港奴，那麼會為老闆著想。
八婆珍沒有對我的揶揄動氣，一本正經說：「唔係呢個問題呀。做人點都要有返最基本既責任心囉。人地交託左個工作俾你，而你又應承左人，咁你就一定要做好架啦。」
無言而對。明明是那種不檢點的傢伙，怎麼能說出這種大道理呢。
「咁有咩計呀。符妹有事，我點都一定要去啦。」
「出黎做野，點可以俾私事影響公事呢。放工先去得唔得？」
「咁不如留返拜山先去啦好冇？」我說。
「總之咁做好唔應該啦。我都係教你做人咋。」
「明明係一個平時低低能能既露體狂，有咩資格教我做人呀？」
「一件事還一件事啦。做野既時候我好認真架。」
實在煩人得很。因為符妹的事我已經有點焦慮，又要應付她的說教，心情難免惡劣。我有點大聲的喝著她：「得啦，煩夠未呀？收聲啦。」
對於我的叫喊，八婆珍沒有嚇倒。她只是默然了幾秒，然後才冷冷地說：「睇黎我點講都勸唔到你。」
我點頭。
「你想我唔再出聲鵝你都得，但係要做左一樣野先。」
「咩呀。」
「你要打個電話俾老闆，交待返成件事呀。」
「痴線啦，我打去咪即係博屌。而且我地間豆腐潤公司得呢架車同我呢個司機，講完都冇用。」
「都係要打。」
「老闆鐘意妳喎，妳不如同我講啦。」
「唔得。我唔會幫你。」
「仆街……扮撚哂野……」我別過頭去。沒想過她是這樣有原則的傢伙呀。我本來對這種人不會太反感，然而她的冷漠和不識時務，令我心中不免有氣。「得啦，幫我打電話啦，開緊車，唔得閒呀。」
她「嘟嘟嘟」的按了幾個鍵，然後把手機按在我的耳邊。
「喂，新發物流公司。」傳來的是老闆的聲音。
「老闆，我係車仔呀。唔好意思，我今日有啲事，要臨時請假。」
「吓？咁啲貨點呀？」
「唔好意思，今日送唔到啦，架車仲要借黎用一日，趕住救命呀。」
未待他回話，我便掛了線，大概可以想像我回到去只有被炒的命運。我對八婆珍說：「滿意啦？」
她拍了拍我的肩，說：「 放心，返去我會同你求情架。」
算了，這家公司我本來就不稀罕。我苦笑一下然後繼續專心開車。
這是路途上的一段小插曲。八婆珍也守了信沒有再煩著我，如今，我只是全心全意的想著，擔心著符見藥的事。