鬼殲: 栢昹大廈

所有嘅蟲都將個焦點放係果個人形身上，佢地不斷好警戒感向佢咆哮。果個人形依舊企響度，雙手繼續向住班蟲嘅方向。
 
一股寒氣傳入我嘅鼻孔，我隔離嘅火堆有幾顆熄滅左。我覺得佢比起班蟲更加唔對路，望清楚d，佢額上貼住一道符咒，系一隻面部蒼白嘅殭屍。
 
前面兩隻草猛氣急到撲過去咬佢，但下顎一接觸佢就溶解左，兩隻嘢好似比漒水淋感系佢兩旁抽搐。
 
我身後嘅蟲湧向草帽殭屍方向，我趁機走人。

我系遠處睇返後面，果隻殭屍兩手溶解成血水，血水浮系空中，形成幾十支紅色針刺，正當班蟲想走果陣已經太遲。幾十支針刺飛彈向本嚟想襲擊我嘅草猛，直插佢地身體，佢地被插嘅位置傷口不斷被腐蝕，有煙霧出，直到死為止。
 




我喘息一陣，諗起阿Ka同老豆嘅時候，果個殭屍望向遠處嘅我，我嚇到往反方向跑，直跑向草叢位置。半路仆低左，感覺到後方一股不斷接近嘅寒氣，立即起身，直沖向村外最近嘅巴士站。
 
我系巴士站位置喘氣時，聽到流水聲，望向馬路，果隻冇手殭屍移動向我果邊，佢隻腳冇行過，但腳底有血液幫佢移動。
 
有一架凌晨嘅小巴系另一條馬路駛嚟，我立即沖向小巴，小巴停低，打開鐵製摺門，我好似松鼠避開捕食者感沖入小巴上。司機一定系見唔到果d嘢，如果唔系一定掉頭走。我坐系車中間位置，出面隻殭屍已經靠到我窗外，我嚇到彈起身。一秒後，小巴向前行駛，我成個人倒地。
 
「咩事呀你！坐返好啦！」
 
我起身，坐左另一個位置。好彩今次個小巴司機比較惡同唔守規矩，如果唔系，我應該冇左條命。
 




我系車箱內諗緊幾個問題。
 
阿Ka應該點算？
 
「喂！」
 
栢昹大廈到底有咩？
 
「喂！」
 




我第時應該點同人解釋今晚嘅事？
 
「喂！」
 
果個無禮貌司機喝我，我望向佢。
 
「你支棍著火架，熄左佢啦！」
 
我望下車箱周圍，好彩冇其他乘客。我用腳踏熄個火，望住個符咒，諗起老豆所講嘅地方。
 
「喂！」
 
栢昹大廈3座地鋪。
 
「喂！」




 
小巴司機再次9叫，我嘅思緒再次被打斷。
 
「又點啊。」
 
「你未拍卡啊！」
 
我心諗︰咁你又開車？
 
好彩個司機真係九唔搭八，如果唔喺我真係死左啦。落車之後，我掉左支棍，留低兩個仲有用嘅符。
 
上網查左果個地址轉左車，早上既四點幾到達目的地嘅果條街。條街系工業區，地鋪好多都系洗車屋。
 
剛剛經歷完生死搏鬥嘅我好焦急咁搵間鋪，就好似凌晨時份有條傻佬自己一個系條街度周圍走。我繼續喺條街度奔跑，汗水滴落我經過嘅街道，但都係搵唔到間鋪。
 




我跟住手機地圖行返轉頭，先知道原來自己行過籠。行前d，見到栢昹大廈3座嘅字樣，望向地下鋪位，佢都系一間洗車屋。
 
因為有鐵閘拴住，我跑過去猛力拍動鐵閘。但佢依然都係冇開門，我就再拍得大力啲，不斷叫入邊既人開門。
 
有一對情侶經過，佢哋用疑惑嘅眼神望住我。我一邊喘氣一邊望住佢地，女果個縮一縮，身形較高男友帶住佢繞過我離開。
 
我歇一歇，用手機反光面望下自己個樣。頭髮無打理，流緊口水，手上揸住手機同兩張濕曬嘅符紙，衣著系圍村到依加嘅屋企衫，先知道自己係幾咁7。
 
原來我個人已經亂到一個點。
 
我望下周圍，雖然未見到鬼，但肅靜嘅夜街令我繼續放鬆唔到。
 
我從嚟未試過咁想一間舖快d開門。
 
旁邊聽到風吹草動，不知不覺坐係地下嘅我嚇到彈番起身，望下左右，右邊有隻混隻貓經過，轉身就走左。




 
我連打個喊路都非常警覺，好似馬食草之前要四圍望望。呢兩三個鐘頭係我人生之中最難捱嘅，你根本唔知下一秒遇到點咩。
 
果一刻，我亦都冇用過常人思維︰呢個時候人都未起身，正常喺唔開嘅。不過我對眼本身已經唔系正常。