是咁的，我同女神做咗鄰居: 194.

細節呀，約既野就唔講啦，總之就係約咗星期三，點解係星期三？

因為星期三係我地復活節假既第一日，(係度提一提個啲返緊工既讀者，學生既復活節假係長過你地好多㗎，有成十日。)

所以我地就決定星期三係中環坐九點船入愉景灣啦，魚蛋好似有反對過既，

不過就是但啦，反正都係嘔幾分鐘啫，又唔係我嘔，佢辛苦咪辛苦啦，關我L事咩。

我同啊童就例牌一齊食咗早餐先出去，又係中環碼頭等。





「嘩，你知唔知上次同你地嚟既時候我係幾~咁緊張呀？」在碼頭等候其他人時，我重臨此地有感而發。

「點解呀？有咩緊張呀？」啊童不解地說。

「你唔係呀嘛，咁都唔記得，上次嚟既時候我係準備緊表白喎，你知你㗎啦，一陣又拒絕我就唔好啦，係人都會緊張啦大佬。」我說。

「唓，仲以為有咩特別，原來係咁咋。拒絕你係因為無誠意，同你未證明到你拍拖唔會影響學業，咁你之後做到呢兩樣野，咪溝到我囉。」啊童說。

「唉，唔知下次再同你一齊嚟呢到係幾時呢，應該你走之前我地都唔會再嚟中環碼頭㗎啦。」我嘆了口氣說。





「我咪講過囉，我長假期會返嚟㗎嘛，聖誕啦，聖誕返嚟我地再入多次長州。」

「嗱你話㗎，一定要返嚟呀，如果你唔返既話我嬲死你。」我說。

「得啦得啦。」

之後佢地都陸續到齊，咁就搭船入去啦，訓個覺就到。

魚蛋一落船就嘔，大家都已經習以為常，無點理佢，佢嘔完就會追返上嚟㗎啦。





落船後，兩位女生的眼球就瞬間俾那沙灘吸引著，於是我們便應她們要求跟著她們走過去。

直行不久後我們便到了沙灘，她們以迅雷不及掩耳的速度衝了過去玩沙，

我們男生只好找將張長椅坐下等待她們。

「喂啊言，過嚟陪我玩吖。」啊童向我招手。

「唔好啦掛，我對沙敏感㗎，唔掂得沙，我睇你地玩吖。」一想到全隻鞋，全身都是沙...我就不想過去玩了。

我可不願在整天餘下來的時間都跟沙子作伴。

「妖男人老狗驚啲沙，過嚟啦屌你，女朋友叫到你都唔肯過嚟。」Suki起身走過來把我推過去。

「喂唔好啦，我唔想對鞋入沙呀。」





「一陣倒返出嚟咪得囉on9，快啲過去同啊童玩啦。」

「唉你等我除鞋先。」我唔想對靚靚白色Converse鞋入晒沙。

我看過去兄弟那個邊向佢地求救，希望佢地當中有人可以講幾句野解救我，

但佢地一個二個就坐係個邊望著我陰陰嘴笑。

我屌，我好相信如果有一日我就嚟死佢地都唔會救我。










跪求大家Follow我既IG: MaanYin05