《我的MK妹同桌》第二季: 238

首先係呀詩忍唔住，哭泣起上嚟。
 
到最後都係忍唔住⋯⋯又係以為自己做得到，每一次都想像到自己好堅強，卻不堪一擊。
 
呀詩好自然咁向前行咗一步，企係我心口前面，無進一步嘅動作。
 
我亦好順勢咁攬住佢，而呀詩呢下舉動亦都係同我講，我哋已經無嘢⋯⋯
 
呢一個擁抱係出自朋友，出自多年感情嘅擁抱，唔係情侶間嘅愛意。
 




呢樣嘢，我係分辨到的。
 
呀詩之所以會喊，都係因為複雜嘅情緒交雜起上嚟吧？我自己啲情緒都上到心口啦，但我的確喊唔出，我感覺到好沈重、好沈重嘅傷感。
 
我心口俾呀詩喊到濕曬，我當下其實無諗咁多嘢，個腦空白一片，但係內心嘅感受好大，多到處理唔到。
 
該要狠心嘅時候，唔好拖。
 
「我⋯⋯」我一開聲，就已經聲沙到卡係喉嚨。
 




「咳⋯我差唔多夠鐘入去啦。」我溫柔咁同呀詩講。
 
呀詩抹一抺啲眼淚，「嗯」咗一聲。
 
「你⋯⋯自己⋯小心啲啦。」呀詩都仲係有啲嗚咽。
 
欲言又止，然後「嗯」咗一聲。
 
「你先係啊，自己係英國小心啲啊，如果你真係捱唔住嘅話，就打俾我啦，我都好擔心你自己一個係度搞唔搞得掂，遇到衰人記得識得反抗同埋報警啊。」我語重心長咁同呀詩講。
 




好矛盾㗎其實，又擔心佢一個人搞唔掂，但若然佢搵到個照顧到佢嘅⋯⋯
 
我又唔想，如果俾我知道嘅話，我係會介懷。
 
「我會㗎啦。」呀詩乖巧地點點頭。
 
「我驚啲鬼佬見你青靚白淨，就食鬼咗你啊，你知外國好多啲戀童廦㗎啦。」
 
「屌你啦，我咁撚成熟，邊似細路女。」講就咁講，佢個樣根本就童顏。
 
「係啦係啦。」
 
「如果⋯⋯如果你係度搵到個人照顧你，我⋯我都會比較放心嘅。」我仲要口不對心咁爆出嚟。