《我的MK妹同桌》第二季: 199
如果嗰一個月係忙碌中渡過，係可以過得好快。
今次輪到我準備飛過去英國嘅嘢，呢段期間呀詩周不時都患得患失，都一樣會抱怨，仲會同我講，想我快啲過嚟。
完完全全睇得出佢唔適應嗰邊⋯⋯同埋後悔。
我上網查過心理病嘅資料，我對返啲普遍嘅特徵，呀詩依家咁嘅狀況係有啲憂鬱症嘅症狀。
我唔敢肯定，因為我同佢相處得最多，最能夠直觀感受佢帶俾我嘅嘢。
見到自己另一半咁樣，其實好心痛，個心會因為擔心而跟住忐忑不安。
「唉」呢個字，已經成為呀詩經常性嘅口頭禪。我從來無諗過離開，就算日後知道佢有去睇醫生，醫生都話佢有憂鬱症，需要用藥物治療，我知佢都好辛苦，好難捱，承受住好多嘅壓力。
作為男朋友嘅我，我都好想可以幫佢分擔一啲，我一定唔會係呢啲難關度選擇拋棄自己嘅另一半。
＊＊＊＊＊＊＊＊＊＊＊＊＊＊＊＊＊＊＊＊＊
我估唔到嘅係，會係佢想選擇離開。
我明白佢嘅苦衷，我知佢唔係唔愛，只係唔想大家咁樣辛苦落去。
但我唔想，佢覺得我辛苦，但咁樣分手，我仲辛苦。行下行下，我哋差唔多跨過咗中學同大學階段，計計下都成5-6年嘅感情。
我接受唔到我哋兩個係咁樣嘅結局。
同埋我接受唔到keep得咁好嘅我哋，突然間因為咁樣而搞成咁。其實我哋一路以嚟嘅狀態都好好，聽講過唔少其他人嘅愛情故事，對比之下，我哋嘅問題都真係唔多。
間唔中嘅甜蜜，適當地調情，就連性生活，都協調到，無因為呢啲問題而產生分歧，真係好難再搵到個樣樣嘢都咁夾，然後又咁愛嘅人。
克服咗好多樣嘢，亦唔係因為第三者嘅出現，就算long d都好，我都清楚無呢樣嘢出現。
當所有嘢都好難得，你亦都有好好珍惜嘅時候，然後要你放手。
點放？我有咩可能眼白白睇住佢自己一個人捱呢？
我哋竟然會卡係度。
呀詩最後同我講：「你唔會真係明白到我感受，就好像當初我都係對憂鬱症有呢啲睇法一樣，我亦都清楚咁樣落去，只會兩個人更加辛苦。」
係我返嚟香港之前，呀詩選擇係機場入面同我分手。
不過係之前，我哋都傾好曬，溝通過，大家有共識，表面嘅共識，但表情都係控制唔到咁展露出我哋嘅內心。
呀詩曾經係網上睇到呢個句子，然後同我分享：
『點解當初兩個人係埋一齊嘅時候，需要兩個人同意，但分手，只要一個人選擇離開就可以？』
到依家我都唔知點解。
但我哋做到兩個人都同意。
＊＊＊＊＊＊＊＊＊＊＊＊＊＊＊＊＊＊＊＊＊
時間返返嚟出發前⋯⋯
臨出發去英國前，呀詩好多嘢都千叮萬囑我要帶齊邊啲嘢，然後又叫我幫佢買嘢啦，仲有買啲香港零食俾佢，搞到我個喼有大半都係佢啲嘢。
我係一邊搞啲功課，一邊執行李。
子晴同我講，佢話佢都打算儲錢暑假嗰陣去搵呀詩，咁樣可以輪流陪下佢，但英國嘅機票同埋洗費好貴，佢都唔知要儲唔儲到。
以嗰陣時我哋返part time嘅收入，可能要返成半年先儲到⋯⋯我就好彩有老媽幫輕下。
子晴有咁嘅心已經好唔話得。
喺出發前一日，我依舊同呀詩skype，skype個紀錄喺呢幾個月多咗超多，有陣時呀詩打俾我無聽就會係上面搵我。
人呢？去咗邊？在哪？
我都有咁樣覆佢，基本上我哋嘅對話大致上係咁樣。
出發前嗰一日，佢抱怨得好犀利。
「我同你講，我同個老師反映啦，話班groupmate好多嘢都自己做咗，我自己參與唔到啦，你知唔知佢哋點啊？佢哋將大部分嘅嘢都堆曬俾我做。」
「我知去到邊都會有呢啲人，係香港都一樣會有，但喺自己地方，我方便為自己發聲，係呢度咩都要就住就住，除咗語言上嘅唔同，仲有就係驚有啲咩麻煩，我真係好驚，唔知佢哋係咩人，好驚得罪佢哋然後俾人搞⋯⋯」
「係呢邊又無人無物⋯⋯鳴⋯⋯鳴鳴⋯⋯」呀詩將心入面嘅委屈講曬出嚟，然後把聲嗚咽地講埋最後嗰一句，我更加覺得淒涼。
唔知可以點做，唯有講話：「我聽日就過嚟，你就唔係無人無物啦。」
依然無辦法止住呀詩嘅哭泣聲。
一向堅強嘅佢，好少會喊。喊得最多嘅，就係為咗佢屋企，其他時候，無論佢係出面遇到啲咩事，佢都唔會怕，佢唔係嗰啲俾人恰到上心口嘅人，血液裡流緊嘅係MK妹無懼怕嘅熱血。
我都係第一次見佢驚到個人震曬。
呀詩只會對住自己親近嘅人柔弱，亦因為咁，我覺得呀詩對外咁堅強，去外國應該都無問題，所以先俾佢去，佢唔係內心唔強大嘅人。
反而我覺係內心唔強大嗰個⋯⋯成日因為少少嘢受影響。
「依⋯⋯依家⋯⋯就⋯就算你過嚟⋯⋯我⋯嗚嗚嗚⋯⋯我⋯我都要趕功課⋯」
「唔緊要，我會陪你，你放心做啦，我都會幫你做嘅，做完先再去玩囉。」
「對⋯對唔住⋯⋯」呀詩愧疚地說。
「痴線咩，對咩唔住喎？」我呆咗，呀詩呢啲時候仲因為咁而覺得內疚，佢真係好善良。
見到咁善良嘅佢，搞到咁唔開心，我就更加登佢唔忿氣。
「你嚟到我都無得好好地陪你⋯⋯」呀詩收唔到聲，嗰兩行鼻涕毫不掩飾咁係我面前流落嚟，場面又有啲滑稽，我只好強忍住笑意。
「你傻咗咩？有咩所謂啊，只要見到你就做乜都得㗎啦，我唔介意去做啲咩喎。」
「無得出去玩咪無囉，以後有得再嚟㗎嘛，去到啊，就算落去樓下行個公園我都覺得新鮮添啊。」
「係咪啊⋯⋯咁我哋每日朝頭早都去行公園囉？」氹人呢，只要氹到人哋識得自己搞下笑，就已經係成功了。
「你起到身先算啦！」總算係安慰到呢個破涕為笑嘅女仔。
不過，我知道呢一刻氹到佢笑作用不大，轉過頭收線佢又會唔開心。
除咗陪住佢，係佢身邊氹下佢笑，我都唔知仲可以做啲咩，亦唔知佢需要嘅係咩。
其實咁樣出發係少咗期待去旅行嘅心情，多嘅係擔心，仲有伴隨些許嘅壓力。
本應係開開心心過去搵佢，會帶住思念呀詩嘅甜蜜過去。
依家去我都唔知會發生咩事⋯⋯亦唔知我去到，事情會唔會因為咁樣而變好。
上機前，我都只係影下閘口，俾自己紀錄下就算，並無post上ig。
原本我打算嚟搵呀詩嗰陣，係想影相post上ig，曬下命㗎。難得我去咁遠嘅地方，洗唔少錢喎，唔留念下點得喎？
但係依家已經無咗嗰種心情。
上到機，我keep住同呀詩whatsapp緊，佢好緊張咁我點樣啊之類，我就同佢報備我上咗機啦，啱啱坐低，等起飛。
我買嘅呢班喺英國朝早落機，依家呢邊係夜晚嚟，我只要瞓一教就可以見到呀詩。
可惜你唔會咁順利可以大教瞓，因為中間會有人叫你起身食嘢，咁我咪順路睇個電影囉，我睇咗黃秋生嗰套《淪落人》，係套幾好睇嘅港產片。
睇完又繼續瞓。
我係俾落機嘅震動聲嘈醒，望一望窗外，天空灰濛濛一片，係我唔熟悉嘅環境。雖然出發前心情麻麻，但啱啱落地，見到未曾見過嘅畫面，心情都有啲舒暢嘅，再諗諗一陣就可以見到呀詩，心裡面有啲啲甜。
我係期待見到呀詩。小別勝新婚嘛，我只係想一見到佢，就即刻行過去攬住佢。
電影入面嘅男主角咁樣做咪好似懶係型咁樣嘅？我並唔係刻意要咁樣扮，不過你當我係咁又無妨⋯⋯
我明點解要咁樣做，因為太耐無見，嗰下衝動去過去攬住對方，係想有接觸到對方嘅實在感。
因為遠距離俾太多唔實在嘅感覺我哋，似有還無。
貪求嘅，就係一刻對方真真實實咁係我心口度，我可以感受到對方嘅體溫、觸感。
呀詩一早已經係機場等緊我，係我期待已久嘅面孔，我見咗成3個月嘅鏡頭，話短唔短，話長唔長，但足夠煎熬。
我哋真係好似電影，不約而同咁快步行去對方度，第一時間就係攬一下先。
最令我感動嘅位，除咗感覺到真實之外，仲有呀詩同我有一樣嘅反應，證明佢同我嘅心情係一樣。
只有一個人上演嘅獨腳戲，只能夠自我滿足，係無辦法產生共鳴。
＊＊＊＊＊＊＊＊＊＊＊＊＊＊＊＊＊＊＊＊＊
有興趣可以follow埋
@__book.s0n
https://www.instagram.com/__book.s0n/