《我的MK妹同桌》第二季: 197

可能我真係唔明白身在異地嘅孤獨感⋯⋯忽然咗呀詩嘅情緒。
 
佢開咗學之後，就開始樣樣嘢都唔順心，喺西方電影或者劇集會發生嘅事，雖然無咁嚴重，但都降臨係呀詩身上。
 
嗰日起身，收到佢好多msg，全部都係講佢第一日開學去上堂，入面一個華人都無，裡面全係外國人嘅面孔，要分組嘅時候，無人想同佢一組。
 
我聽到之後心諗，唔係掛？以呀詩嘅性格同埋樣貌，點會無人想同佢一組啊？
 
雖然分組唔關樣事，但係整體嚟講，呀詩都未至於話去到俾人排斥姐？
 




但佢就好焦慮，搵唔到原因，只可以簡單歸納係種族問題，亦好擔心之後啲成績，唔知會唔會因為咁而過唔到。
 
自從升咗上U之後，我好明佢依家嘅處境，有啲科唔pass，係關乎到你畢唔畢到業。
 
我估佢已經瞓咗，嗰段時間我都趕緊啲功課，差唔多又嚟midterm exam，嗰日我全日嘅心思都係呀詩度，因為係異地，我唔知可以點樣實質上幫到佢，我諗咗好多方法，但無邊幾樣啱用。
 
最後我犧牲瞓教時間，瞓少啲，都係同呀詩傾耐啲。
 
「你醒啦？」我心痛佢。
 




「我無乜點瞓過，瞓下醒下咁⋯⋯」呀詩個樣望落真係無乜精神。
 
「點解咁嘅？聽講英國啲人都nice㗎喎。」我想快啲入題。
 
「我都唔知。」佢自己都納悶。
 
「我呢邊接觸嘅外國人都好nice，呢樣都真嘅，後來諗諗下可能佢哋一早已經有組呢？最後老師安排咗我入其中一組度。」瞓醒無耐嘅呀詩要花啲時間去組織返成件事。
 
「嗰陣我諗，有組都好嘅，我只要搞掂啲嘢就算，識唔識到朋友就由佢啦。」
 




「我嚟exchange的確係想見識多啲，識下啲外國朋友，但原來係咁難，唔係你話想識就識，好多對你一早已經築起高牆，無害你已經好好。」
 
「講遠咗，咁去到傾project嗰陣呢，佢哋係一樣嘢都唔分配俾我，好明顯佢哋已經同組咗一排㗎啦，好有條理咁分好曬啲嘢。」
 
「到我問佢哋嗰陣，先係咁意俾咗個整合資料我⋯⋯我真係唔該佢啦！」呀詩越講越激氣。
 
「呢啲時候我都好想係你身邊。」
 
因為我自己都唔想咁無用，睇住自己女朋友有咁樣嘅遭遇。
 
「我都係度諗，選擇嚟exchange係咪啱呢⋯⋯？為咗過嚟，已經洗唔少錢。」呀詩納悶著。
——
「呢啲事其實都一樣會令你變好，好嘅同唔好嘅事都體驗過，先叫完整㗎嘛，係咪？」我試圖安慰呀詩。
 
「咁你都啱嘅。」




 
我都明白要俾啲時間呀詩諗通，但我最估唔到嘅係呀詩嘅情緒，竟然會慢慢變差⋯⋯
 
我察覺到，真係察覺到呀詩嘅唔妥。
 
由佢開始同我放負嘅時候開始，我就知道唔係幾對路，我亦都同咗老媽講，話諗住呢排打工打耐啲，想儲機票錢過去探下呀詩。
 
「去囉！你有咁嘅心佢實感動嘅，作為女人，自己鍾意嘅男仔為咗佢遠道而嚟，點會唔感動？」我好記得老媽同我講嘅呢一句，因為佢俾咗唔少信心我。
 
細細個佢總係惡過老虎，但大個咗，先發現老媽原來都係個似水柔情嘅女人，唔怪得老爸死死地氣咁係佢身邊。
 
以前我都好唔鍾意老媽，覺得佢管得多，唔俾我呢樣嗰樣，又惡，又煩。
 
男仔嘅成長好似就係咁，總係慢人一拍先察覺啲唔同。
 




諗起以前中學時代，我都成日慢一拍先明白呀詩嘅心意，依家我慢一拍先知老媽嘅好。
 
我去英國嘅錢，老媽有幫手出大半，我打算完咗midterm exam就去。
 
老媽看似係錫呀詩咁，但其實背後為嘅，都係我。
 
呀詩佢嗰排睇落好悶悶不樂咁，有啲似細路仔，成日扭計，當然我都盡力滿足。
 
好似一啲無厘頭嘅問題，都會重複地問。其實呢啲本來係我哋日常嘅情趣嚟，係維持我哋咁多年感情，必不可少嘅問題嚟，對女仔嚟講，我就唔係幾需要嘅。
 
好簡單，例如係「你愛唔愛我？」、「有幾愛？」、「如果有其他比我更好嘅女仔出現，你會點？！」之類嘅問題。
 
呢排出現嘅頻率多咗好多，隔幾個鐘就問一次，每日嘅視訊都會問，msg都會問，就算唔係成日覆返佢，都一樣會問。
 
總之我一起身見到手機上面嘅msg，都實會見到有類似嘅句子喺入面。




 
頻率出現得太多，就容易生厭、生煩。
 
所以我都係決定去一轉英國探探佢好啲。



＊＊＊＊＊＊＊＊＊＊＊＊＊＊＊＊＊＊＊＊＊
有興趣可以follow埋
@__book.s0n
https://www.instagram.com/__book.s0n/