《我的MK妹同桌》第二季: 195

我係咁樣同佢係度傾天光，然後傾到瞓著咗，我入睡前仲隱約聽到呀詩把聲係度講緊嘢。
 
我瞓醒已經係下晝，第一眼起身，我仲下意識覺得呀詩係度，想嗌佢個名。
 
去到喉嚨邊就已經打住咗，先醒起，係喎，琴日送咗呀詩機，啲記憶先至慢慢拼湊起嚟。
 
嗰種感覺就好似我哋第一次分手咁，好唔真實，但慢慢認清個現實。
 
手機上面有海量嘅訊息，好多都係呀詩send俾我，有風景圖，有佢嘅自拍，真係去到邊，佢都會影相俾我睇。
 




食咗啲咩都會同我分享。
 
呢啲嘢我哋一齊咗咁耐都無做過，平時又唔係唔見，忙嘅話大家都會體諒，反倒今次真係一段長時間唔見，其實只係比平時做多少少，但個感覺可以好同。
 
感覺呀詩都係我隔離，而我，好似我都係嗰邊一樣。自欺欺人？的確有些少，我都認同好似小學雞，但我一諗到要做到呢啲嘢，一啲易，就覺得一陣感動。
 
有個女仔願意為我咁做，而且嗰個係我深愛嘅人。
 
去到邊，第一個諗起嘅就係你；食到好西，第一個諗起嘅係你；見到咩好笑嘢，第一個想同你分享。
 




佢大可以諗到其他人，大可以懶得做，大可以po ig，咁佢都有po ig嘅，但唔係樣樣都有po，有好多淨係得我知。
 
我鍾意呢一種偏愛。只屬於我一個嘅愛。
 
同埋呀詩佢努力咁想keep住呢段long d嘅關係，可惜嘅係，到我起身，佢已經瞓著咗，係一個鍾頭前。
 
有時佢會叫我呀蛋，有時叫我呀強，叫我呀蛋嘅次數唔多，只有sweet啲嘅moment，佢先會用啲半搞笑嘅tone叫我「呀蛋」。
 
大家都知「強」同「蛋」嘅速食碼好近㗎啦，有次佢打錯我個名，佢自此就成日將錯就錯咁叫我呀強。
 




我同呀詩仲有好多回憶。佢唔係身邊嘅時候，就特別容易諗起同佢一齊嘅回憶。
 
回憶先係讓人難捨嘅位，最扎心。
 
呀詩佢搭巴士好鍾意坐前面，一定係坐巴士上層最前面嘅位，如果㗎車會上高速，可以望到海嘅話，一定會揀嗰個位。
 
佢話咁樣睇嘅景先係最廣，而且一程巴士幾蚊雞可以望到海喎，人哋海景套房都要成千幾蚊㗎，咪又係望住呢個海，有咩唔同先？
 
我又駁唔到⋯⋯
 
佢唔係中學先咁樣，佢係我哋一齊返之後，先發覺佢有呢樣特質。
 
我亦都俾佢無意間感染咗，自從我知道佢有咁嘅習慣之後，我搭巴士都會坐前面。
 
「坐咁前你唔驚死咩？」我聽完佢講之後，坐係佢側邊問佢。




 
「驚咩啊，架車要翻側你先會死，咁你坐後面翻側唔通就唔會死？？？」我分唔清佢嘅係歪理定係哲理⋯⋯
 
呀詩佢唔係成日都咁鳩，佢係間唔中先係咁，所以我對呢啲嘢特別有記憶。