《我的MK妹同桌》第二季: 142

然後過咗無幾耐，要搏殺交project嘅時候，我收到呀Ken嘅whatsapp。
 
Ken：喂強哥！呢排點啊？得唔得閒嚟班聚啊？（emoji）
 
佢嘅語氣仍然仲係世界仔咁樣，同埋班聚呢樣嘢，上年開學無幾耐的確係有⋯⋯咁快就一年啦。
 
真係每年都要搞一次？
 
我對班聚呢啲嘢感覺唔大，又唔係話太期待同佢哋見，但又唔係到太抗拒。
 




咁去下都無妨嘅？
 
我：好啊，幾時？
 
最緊要都係要夾下啲時間，太多嘢要做，不過咁，以前邊洗話咩要夾時間，通常話要出嚟都好爽手，睇怕要約都幾難。
 
呀Ken俾咗幾個日子我，我揀個方便自己嘅。
 
Ken：點啊你？同MK詩分咗手未啊？
 




我真係屌你老母⋯⋯一嚟就問呢啲咁嘅嘢？佢把口臭就唔係一日兩日嘅事，知佢係講下笑咁問，但都扯扯地火。
 
循例都要屌返佢老母。
 
我：屌你啦，一嚟就問人分手未，仲有啊，佢唔撚係咩MK詩啊！
 
Ken：姐係仲一齊緊啦？
 
我：係啊，點啊？
 




Ken：哇！估唔到你咁長情喎
 
我：吹啊？
 
然後就無然後啦，我都唔係幾識要點樣同佢相處⋯⋯大家嘅模式真係唔同。
 
到咗嗰日中同聚會，先發覺原來大家都變咗好多⋯⋯
 
尤其是啲女同學，屌啊！真係入咗U之後成個人唔同曬，靚咗好多，以前中學一定想像唔到會咁樣！
 
喺嚟呢個聚會前，我有同呀詩交待。
 
「你哋都幾好喎，仲有人搞呢啲中同聚會。」呀詩感概。
 
（利申：中同姐係中學同學，唔知邊個改埋呢啲咁嘅名，人哋用然後自己又跟住用）




 
「呀Ken搞咋嘛，除咗佢，仲有邊個搞啊？」
 
「我哋班呢兩年都無搞過咩聚會，可能中學嗰陣時啲人都係掛住讀書，大家都無乜感情掛？」
 
「無人搞咪你搞囉！」我講。