《我的MK妹同桌》第二季: 105

「你睇下啊，你將我隻腳cut成咁⋯⋯仲有啊，呢張⋯⋯呢張你睇下啊，我手臂幾粗啊，隻腳都係啊，影到我勁短。」呀詩一見啲相，就一副嫌棄嘅姿態。
 
「咩喎，你睇下先啦。」我搶返部手機，然後放大呀詩個樣。
 
「你睇下你個笑容，幾靚！身為一個好嘅攝影師，係需要捕捉最靚嘅一幕，我每次都係等你最靚嘅一刻影低佢㗎。」佢呢啲表情，都係我眼中最靚嘅時刻嚟。
 
就好似當年係圖書館，呀詩抬起頭望我嗰一刻咁，靚到我想追佢，佢最靚嘅笑容，我再清楚不過。
 
呀詩露出具有殺意嘅眼神，盯住我。
 




「得得得，我會再改善，影到你全方位都咁靚。」我忍唔住笑起上嚟，雖然呀詩兇神惡煞咁望住我，但我覺得咁樣好有趣，呀詩好似俾我激到死死下咁。
 
最後，我哋係城堡前面，影咗好多好多張相，呀詩先有幾張滿意。
 
我終於明白，嗰啲喺ig上面出現嘅靚相，可能係幾百、幾千張入面，先會出現嘅一張。
 
然後對嗰張相珍而重之，會用各種修圖嘅方法，執到最完美。
 
「我哋去玩嗰個好無啊？」我哋玩完一個又一個，呀詩捉住我問我。
 




「吓？仲有幾多個未玩啊？」我估唔到會玩到咁攰。
 
「呢個世界好似仲差呢個咋⋯⋯」呀詩期待嘅心情，好似十六歲嘅少女咁，佢好想可以玩曬咁多個，想一個都唔漏。
 
「好，你想玩咩就玩⋯⋯」
 
「咁行啦！！」我都未講完，呀詩就拖住我隻手，啊⋯⋯唔係拖，而係扯，我成個人俾佢扯到chock咗一chock。
 
佢連玩個小小世界都可以好興奮，見到有啲卡通人物跳出嚟，就會講埋嗰個係邊個嚟，如數家珍咁講，基本上已經係一個專家。
 




可以令一個咁無聊嘅小小世界，都可以搞到咁有聲有色，我諗，呢個就係兩個人一齊嘅原因吧？
 
一個人去經歷呢啲嘢，會好無癮，無聊到一個點，但同自己愛嘅人一齊，就自然會多好多色彩，會發生一啲趣事，或者係有趣嘅對話。只要個心夠大，可以豐富自己嘅生活。
 
除咗呢啲，我哋兩個係對方面前，已經無乜形象可言，好多核突嘢都會一件不漏咁呈現出嚟。
 
我哋係漆黑一片嘅小小世界入面，會不知羞恥咁抽水。
 
因為後面嘅人又睇唔到，我會膽粗粗咁摸呀詩個波，隔住件衫。呢種偷偷摸摸嘅快感，幾爽。
 
「你隻手擺係邊啊？」呀詩係我耳邊細聲咁講，完全聽唔出佢係抗拒，身體亦自然咁靠過嚟。