《我的MK妹同桌》第二季: 103

呀詩輕輕咁拍醒我，我見佢龍精虎猛咁，就咁睇佢嘅神情，就知佢呢種興奮係期待咗好耐嘅興奮嚟。
 
「你好攰咁喎，不如我哋玩一陣就走啦？！」我明知佢唔會夠皮，又點忍心「攰」俾佢睇？
 
「唔會啊，我琴日都瞓咗好耐，但係都好似唔夠咁，我哋今日盡情咁玩，返去繼續瞓！」我用微笑俾出肯定。
 
呀詩攬住我條腰，用力地。
 
迪士尼真係一個好童真嘅地方，嗰條大路上嘅歌勾起好多細細個回憶。
 




呀詩輕快嘅步伐，成個大細路女咁，只要企係呀詩隔嚟，我就好容易俾佢感染，好似由中學嗰陣已經係咁。
 
「哇！米奇啊！！！」呀詩一入去，就已經好開心咁講，我無乜感覺⋯⋯
 
之前好細過嚟過幾次，親戚話有全年證，叫我哋一齊去，嗰陣時已經對迪士尼無乜好感。
 
「你未見過咩？」呀詩嘅反應令我懷疑佢係咪第一次嚟。
 
「未啊，我今日係第一次嚟迪士尼。」咁⋯⋯頭先所有嘢即刻通曬，竟然我會係呢個時候百感交集。
 




每個女仔都有佢自己鍾意嘅公仔，有啲係史迪仔啦、Hello Kitty、米奇米妮等等，呢啲都係大路嘅喜好。
 
呀詩鍾意嘅就係米奇，好幾次都係米奇打救咗我嘅禮物危機，呀詩間房都有好幾個米奇嘅公仔。
 
可想而知佢今日係幾咁期待，甚至可能係一路以嚟，兒時嘅夢想。
 
「開咗咁耐你都無嚟過？」
 
「無啊，你覺得我屋企會嚟咩？」呀詩有啲認真咁講，睇嚟我問咗唔應該問嘅嘢。
 




「咁就好啦，好彩你第一次係我嘅。」我兜啊兜，總算令呀詩笑一笑。
 
「以為你淨係識諗啲咸濕嘢添！」同呀詩咁樣行迪士尼嘅大街，都係我哋兩個嘅第一次。
 
有種感覺，一齊耐咗嘅我哋，當一齊經歷一啲都係第一次嘅事嗰陣，嗰種感覺好似返返去啱啱相識咁，新鮮、有點興奮、期待。
 
一齊耐咗，會對身邊嘅事失去期待，因為你知道都係咁。
 
「男人係咪咁介意第一次呢樣嘢？」呀詩撓住我隻手問我。
 
屌你咩？係呢啲時候問啲咁認真兼學術性嘅問題？