《我的MK妹同桌》第二季: 100

出到去呼吸吓啲新鮮空氣之後，成個人醒神好多，我望一望部手機，全部都係啲功課嘅嘢⋯⋯
 
真係好忙，如果最終嘅目標唔係為咗要上返大學，我係唔會理。
 
「做咩啊？睇電話睇得咁入神啊？」呀詩咁啱俾啲風迎面吹過，佢飄逸嘅頭髮，再加上街燈下嘅塗鴉，更美麗動人。
 
今日嘅佢打扮得比平時更靚，慢慢昇華至一個合格嘅港女，淨係睇佢外表，根本想像唔到佢以前係一個不折不扣嘅MK妹。
 
過往嘅直髮齊陰，已經變成中分飄逸嘅長髮，多咗幾分成熟。
 




「唔係啊，功課啲嘢姐。」本來睇到又心煩嘅我，望住呀詩，心靈又好似被治癒咗咁。
 
原來不知不覺間，呀詩已經係我嘅避風港。
 
「唉，唔好提啦，我下個禮拜都開始忙啲功課，開始覺得自己有啲跟唔到。」呀詩坦言。
 
「咁你仲嚟玩？」我笑佢。
 
「最後嘅晚餐啊，之後就上路啦，兩個禮拜後復活。」呀詩幽默咁答我，啊⋯⋯又幾好笑。
 




「神啊，求你打救我。」
 
「好啊！」呀詩一拳打埋嚟，「依家就嚟打鳩你。」講完，又再一拳，佢扮曬幼稚園小朋友咁樣打交，嗌曬出嚟，「哎呀、哎呀」咁叫囂。
 
「你唔好咁低能啦，幾廿歲人，仲搞埋呢啲gag。」借著醉意，我哋都有啲癲癲地，high過龍。

「喂啊⋯⋯」呀詩一邊叫，一邊繼續追住我嚟打。
 
行出嚟，其實感受到微微嘅涼，呢個天氣，已經差唔多秋天，俾啲涼氣吹到我清醒曬。
 




「好啦，再打我就殘廢啦。」我捉住佢兩隻手，然後順勢拖住咗。
 
「哼！俾我打吓都唔得，遲吓忙到見唔到嗰陣啊，你想俾我打都無啊！」呀詩倔強地說。
 
「唉，係啵。」夜闌人靜嘅時候，我哋兩個係街上面手拖手，望住自己嘅倒影，做埋曬啲奇奇怪怪嘅動作，一啲羞恥心都無，仲反而樂在其中。
 
真係一啲得耐，先敢做呢啲嘢。
 
「我應該完曬所有考試先後，可以同你一齊過生日。」呀詩忽然講起。
 
「我生日？」我生日邊有咁快啊，然後呢個說話講出口無耐，我就知道自己柒咗，想收都收唔返。
 
「我生日啊屌你！我生日你都唔記得？？」呀詩嚟個死亡之瞪。
 
「我只係奇怪竟然有人自己生日會自己咁樣講出嚟姐。」我講完都忍唔住笑。




 
「哈哈哈哈哈哈哈哈哈哈！」
 
「你！淨！係！識！恰！我！」每一隻字，就代表一下。
 
「得得得，我實會同你過喎，我點會唔同你過生日啊？只不過今年仲洗唔洗好似上年咁，叫返班fd？」我指我哋以前同班嗰堆朋友。
 
其實已經少咗聯絡啦，whatsapp group度已經無人講嘢，好似佢哋嘅出現，就係為咗陪我嗰一段時光。
 
「今年我想同你過，淨係同你過。」
 
有陣時，我哋嘅愛情好似白開水咁淡而無味，無咩特別事刺激我哋嘅感情；但又有陣時，我覺得我哋忽然間好似返返去熱戀期咁。
 
「好，你生日，你想點過就點過啦。」我回覆。
 




「去迪士尼啊？好無啊？」