《我的MK妹同桌》第二季: 97

其實我應該一早察覺到呀詩嘅轉變先係⋯⋯
 
係場入面，呀詩同佢哋玩得興奮，的確佢係會諗起我，令我好放心，至少令我覺得呀詩心入面係有我。
 
但係我環顧四周，好多唔識嘅人係度嘻嘻哈哈，把酒狂歡，而呀詩，好自然，好順理成章咁成為咁多個人入面嘅中心。
 
好多嘢，都會叫上呀詩。
 
「Sarah！嚟啦，一齊嚟玩啦，輸咗飲半杯咋嘛。」男男女女開始係度起哄。
 




呀詩眼角飄向我呢邊。
 
其他人都好識趣，一齊講：「叫埋你男朋友嚟玩囉！」、「一齊啦！」、「唔洗怕醜喎⋯⋯」
 
我知道唔去嘅話，會令呀詩難做，同時亦會俾人覺得你廢，係呢個場面，我不知不覺間諗起呀彥⋯⋯
 
話唔定呢班人以前都係MK仔女嚟。
 
唯有頂硬上啦，唔想係呀詩班fd面前失威。
 




佢哋成大班人玩啲酒game啦，玩完一個接一個，啤牌啦，睇下抽到咩，有咩指示咁，俗稱「大牌檔」。
 
仲有啲佢哋設計嘅game啦，例如定一啲題目，講完之後再指下一個講，講唔到嘅就飲；真心話大冒險嗰啲啦。
 
佢哋唔係止在一大班朋友聚吓舊，傾吓偈，佢哋想嘅，係想high，想一大班人咁樣high，唔在乎在場嘅人熟唔熟，fd唔fd。
 
呀詩成日俾人點中，我都知呢班友仔係想針對佢㗎啦，無奈之下，都要幫呀詩頂酒。
 
利申定先，我真係唔識飲酒，平時都好少飲，上次last day去酒吧飲酒嗰次，我就已經知自己唔飲得，亦唔鍾意嗰陣酒味。
 




我都無得揀唔幫佢頂，飲嗰啲溝咗綠茶、威士忌、啤酒嘅液體，真係覺得好難頂，一股難入口嘅味道直衝我天靈蓋。
 
有時呀詩都有飲嘅，話我飲咁多唔係咁好，我見佢臉色開始轉變，有啲認真，慢慢無乜表情。
 
「你男朋友對你好好喎，咁樣幫你頂。」旁邊一個妖豔嘅女仔同呀詩講。
 
「你唔好再飲啦⋯⋯」呀詩勸我，我仲有兩杯要找數，頭先仲未清完。