《我的MK妹同桌》第二季: 87

返到去，我就即刻去搵呀詩。
 
我直頭嚟到佢屋企門口嚟搵佢，我好衝動咁想去見佢，每當見到有人失去，發生悲劇嘅時候，先至話要珍惜眼前人，往往係呢啲時候先有咁嘅衝勁，然後過一排又會懶散返。
 
正正我依家嘅諗法就係咁，好彩呀詩仲係我身邊。
 
呀詩拉開公屋個鐵閘俾我，愕然咁望住我。
 
「搞咩啊你？無啦啦上嚟我度。」雖然佢一臉茫然，但都幫我開咗度門。
 




我咩都無講，就上前攬住佢。真真實實咁係我懷裡，嗰度實在感令我安心。
 
「做咩嘢啊你？」
 
「做咩無啦啦咁？」佢見我好似個細路仔咁，佢聲線都放軟，用種媽媽聲嘅語氣問我。
 
「無，純粹掛住你，好想嚟見你⋯⋯」我撒起嬌上嚟，唔好睇小男仔唔會撒嬌啊，雖然次數唔多，但唔代表唔會，而且真係好信任，好愛嘅人面前先會咁做。
 
女仔係可以對好多人撒嬌，但男仔只會係愛嘅人面前咁樣。
 




「痴線啦你，快啲講咩事啦。」呀詩俾我呢個舉動逗笑。
 
「真係好彩你仲係我身邊。」然後我就雙手捧起呀詩楚楚動人嘅臉蛋，吻落去。
 
呀詩嘅笑容仲未收返起，我可以感受到佢仲崩緊嘅神經，隨之慢慢緩和，雙手圍住我個頸，回應返我嘅吻。
 
我哋一路錫，一路返去呀詩間房。
 
我熟悉咁將呀詩放落床，用隻手護住佢個頭，輕輕咁放佢落枕頭度，成個過程，嘴唇都無離開過。
 




呢排我哋都太忙，都無時間翻雲覆雨，今日好想佔據曬佢成個人，就好似當初我睇完求婚大作戰，滿腦子嘅思緒都係呀詩，但就無辦法去搵佢，只好不停咁諗起佢。
 
嗰種煎熬我至今都未忘記。