《我的MK妹同桌》第二季: 66

「係啊⋯⋯我同我女朋友一人一條。」我無掩飾，我之後出街都一路帶住，提住自己唔可以懶，然後就咁變成習慣。
 
「哦～～」Gigi好明顯個樣就係失落，真係好多情緒都放曬係臉上面。
 
我都已經幾肯定Gigi對我有啲嘢⋯⋯
 
「之前食飯我都有講㗎。」我取笑佢。
 
「我無聽到啊，我都無聽曬，而且又隔咁遠。」Gigi打咗我一下。
 




女仔真係好鍾意打人。
 
「你同你女朋友都好sweet喎。」言語中帶點酸酸甜甜嘅味道，搞到我怕曬醜，唔知點答。
 
「我同佢經歷咗好多嘢，呢條手繩依家我每日都戴住，以前因為懶無成日戴，就連同佢都失去埋。」我都唔知點解要講咁多，但我覺得咁樣坦誠無咩唔好。
 
「姐係你同佢之前都分過手？」Gigi聽得出端倪。
 
「係啊，分開過一排，發覺自己原來真係好鍾意佢，無咗佢，個心好似開咗個窿咁。」憶起舊事，嗰種感覺仲歷歷在目。
 




「好彩佢仍然都無變，我哋都仲係我哋，我都真係唔想再經歷多一次。」我如實答佢。
 
Gigi靜咗，沈思咗一陣靜係吐出幾個字：「真羨慕。」
 
「你都會㗎。」我鳩鳩地咁答。
 
「吓？你又知？」本來我哋兩個靠係個牆度，然後Gigi側住個頭，探出嚟望住我，佢柔順嘅短髮散落係空中，用佢嗰雙大眼睛望住我，好似以前8、90年代嘅菲林相咁靚。
 
「每個人都有幸福嘅權利嘅，我信你會搵到個錫你嘅男仔。」
 




Gigi係靚，而且別有一番風味，佢實會有好多人追。
 
但係即使再靚都好，都俾唔到心動嘅感覺我，一啲都無，我唔知係因為我本身心入面已經住咗呀詩啊定點，喺同呀詩分手嗰段時間入面，我真係咁覺得⋯⋯
 
我再唔會搵到個好似呀詩咁樣令我心動嘅女仔。
 
可能有人話只係我未遇上，但呀詩就係呀詩，淨係得佢一個。
 
我唔知呀詩係咪咁樣諗，但至少我係⋯⋯
 
同Gigi閒聊咗一陣，又有幾堆人衝出嚟，玩得興高采烈。
 
Gigi見到咁著返件冷衫，我頭先一時唔記得佢手臂上嘅瘀青。
 
「你隻手仲痛唔痛？」我柔聲問。




 
「唔痛啊。」佢堅強地道。
 
我諗起我頭先講過嘅嘢，所以我無再問佢。