《我的MK妹同桌》第二季: 61

嗰陣時MK妹仲未開始絕跡，係當人慢慢大嘅時候，發覺自己以前咁樣原來好柒，就會慢慢改變。
 
古語有云：有邊個無MK過啊？
 
好多時MK同青春一詞有所重疊，有時MK呢一個字唔淨係解衣著打扮、行為，早排《那些年》套電影出咗，時不時會係網絡上面見到有啲人扮那些年個封面照。
 
我都會覺得佢哋好MK啊⋯⋯
 
MK只不過係青春嗰陣，某幾件我哋大膽去做，唔會理佢柒唔柒嘅事，而最重要嘅係，有幾個人陪你咁樣做。
 




印象中，嗰個喺我第一眼入面，認為極度MK嘅女仔，後尾都著到成個文青風咁。
 
但我同佢無認識到，無乜點講過嘢，唯一接觸嘅就係今次嘅Ocamp，之後無同組過，大家嘅路亦唔相同，但係其他人嘅post入面搵到佢出嚟，然後因為有add到其他人ig，就索性全部人一齊add，廢事大細超。
 
我同佢都有互相follow大家ig，僅此而已。
 
個MK妹好似叫呀嵐。
 
其實現實生活入面，呢種社交慢慢變成常態，開始明白點解啲人會話大個咗會慢慢少朋友，唔再好似中學咁。
 




因為中學嘅友情，好容易就可以行入你生命入面，唔理係正面定負面，但都大大咁樣影響住你。
 
到大個咗，唔係個個都會走入你生命裡。一嚟唔係個個想，二嚟你自己都唔一定會俾。
 
可能日後真係有另一個一模一樣嘅呀詩出現，都唔一定會係有咁嘅結果，一唔一齊到都唔知。
 
我哋Asso Ocamp人數唔多，規模亦唔似得大學咁，所以先搞兩日一夜，而且唔似得大學咁有歸屬感。
 
大家都知Asso係讀兩年，我哋都係相處兩年嘅姐，而組爸組媽仲有一年，算係少數入面有心搞嘅人。
 




我哋背後嘅名，其實係名牌嚟，可以撕落嚟。
 
而呢個Ocamp嘅game，有幾個係直接抄最近好紅嘅running man。
 
係韓劇盛行之前，running man先係吸引好多人去睇韓國嘢嘅先河。