《我的MK妹同桌》第二季: 56

如是者，我就無再過問，我就專心期待下我Asso嘅Ocamp。
 
個group幾乎無間斷咁好多msg，但老實啊，無乜邊幾個熟，識就識嘅，極其量食過一餐飯仔。
 
有啲人無嚟到，個group加加埋埋都有10幾20人，每秒都有人覆下嘢咁，睇落真係好似好熱鬧，好多嘢傾，營造出一個好熟、好多朋友、好青春嘅感覺。
 
喺不久嘅將來，退group嘅人會多過講嘢嘅人。
 
所以係個group入面，仲有啲人我係唔識，我都唔明點解會傾到如此興高采烈，內容談唔上有趣，而且我就咁隔住個mon都覺得尷尬，我上高登仲好啦。
 




睇下啲高登仔屌鳩林祖舜唔好？
 
不過係所有人傾到好開心嘅時候，無啦啦有個我無save嘅電話號碼whatsapp我。
 
我㩒入去睇，佢係一大串咁sd過嚟，我之前唔知係邊度睇過呢，有人話睇人msg點樣打都可以睇得出份人係點。
 
如果積積埋埋一次過打嘅話，份人會比較細心，顧人感受，怕怕醜醜咁；而將一句嘢分開幾行sd嘅呢，通常比較爽朗直接，幽默啲嘅。
 
當然只係參考啦，不過如果真係照佢咁樣講，呢個人屬於前者。
 




佢hi完我之後，就報自己係Gigi，我先醒起，係上次食飯嗰個文青女孩。
 
無啦啦搵我？可能係自己會錯意，但我真係有諗佢係咪對我有意思？
 
佢問我去Ocamp當日一唔一齊出發，因為大家都住得近，就邀請我一齊去。
 
我好快就藍tick咗，不過隔咗兩三分鐘先覆佢，因為覺得我哋其實又唔算熟，到時一齊搭車實好尷尬。
 
往後嘅日子，會令人學識點樣同人相處唔尷尬，只不過對於啱啱中學畢業升上Asso嘅我嚟講，好怕呢種「最怕空氣突然安靜」嘅不安。
 




又諗諗，有個伴都唔錯嘅，而且人哋都主動問咗，自己唔識、唔知點樣拒絕。
 
我：好啊。
 
就咁應承咗。
 
Gigi：咁到時地鐵站等？早個半鐘
 
我：可以啊～
 
咁樣覆總係有種壓力係度咁，而佢同其他女仔最唔同嘅係，佢係字裡行間完全唔打emoji。
 
打從emoji現世後，好多人打字都會加個表情符號，用嚟表達句子嘅語氣，前有MSN式表情符號，現有Iphone式表情符號，後有Sticker。
 
但Gigi完全無，我感受到唔到佢嘅喜怒哀樂，明明係佢主動搵我，卻可以顯得如此冷豔。