《我的MK妹同桌》第二季: 53

去到食糖水，其實一齊耐咗，話題嚟嚟去去都係嗰啲，講嘅會越嚟越少，主要都係分享自己身邊嘅事情多。
 
多咗一份平淡，少咗一份激情。
 
我哋唔需要再好似以前咁，互相了解大家有咩興趣，性格係點，捉摸佢嘅喜好，身邊嘅朋友同埋感情狀態。
 
諗下要重新識一個女仔，就覺得麻煩。
 
「頭先好多靚女啦？食得咁開心。」食糖水食到一半，呀詩忽然間彈咗呢一句，搞到我飆咗個冷汗。
 




「有就實有嘅，靚仔都好多添。」後面嗰句我望住佢，暗示佢聽日都會見到唔少靚仔。
 
「啲女大唔大波啊？索唔索啊？」女仔小氣起上嚟，真係可以好小氣，仲酸酸地。
 
「你大波啲，聽日你最索啦。」我都反擊。
 
「哼！俾我知你溝女就知死。」
 
「俾我知有狗公溝你，條狗公就知死！」我有樣學樣。
 




終於，呀詩笑咗。
 
「你係先好啊！」
 
「不過我食完就返去執嘢啦，你幾時要Ocamp啊？」呀詩問。
 
「我下個禮拜先啊，不過我都認真唔太鍾意Ocamp，亦唔鍾意啲人。」於是我將今日發生嘅事同呀詩講。
 
「始終依家讀上去，就唔同中學咁樣㗎啦，但我唔會排除任何可能嘅。」又啱嘅，睇定啲都好。
 




送埋呀詩返，最後佢係樓下主動咁攬住我。
 
都幾用力。
 
都好似好耐，呀詩無咁樣主動用力咁攬實我，對上一次我記得係中學分開前嘅時候。
 
呀詩鬆開手之後，咬咬下唇，無講啲咩，眼神卻透露出不捨，深遂嘅眼珠無離開過我。
 
我明。
 
呀詩佢總係會令我安心，甚至乎依家，有啲嘢有默契到唔需要再講出口。