《我的MK妹同桌》第二季: 46

「傻豬嚟，我哋喺隔離班嗰陣都可以一齊到，如果咁易就散，只可以話我哋得咁嘅水平囉。」雖然呀詩係安慰緊我，但我聽得出佢仲開心緊。
 
於是我無再講啲唔開心同埋掃興嘅嘢。
 
直至無幾耐之後，我發覺我自己開始迷失緊，真係唔知點好⋯⋯
 
「今日呢⋯⋯」呀詩如常打俾我，手機已經成為維持我哋關係嘅唯一方法。
 
「有個師兄問我去唔去Ocamp⋯⋯」佢問得好小心翼翼。
 




我好明白，佢係擔心我會唔開心，可能會大發雷霆之餘，背後傳達嘅，係佢都想去。
 
我迷失嘅位係，我驚失去佢，呢個MK妹個光芒太耀眼，光到一入Ocamp一定成堆仔圍住佢。
 
我要面對嘅，唔係一個呀Ken，而係好撚多個呀Ken。
 
呢一種感受之前並唔係無出現過，我以為我學識咗對呀詩、對自己有信心，但原來我無。
 
要承認自己無進步過，一開始唔係咁容易，慢慢你就會接受到咁樣嘅自己。
 




「去囉。」我扮到若無其事，心知姐係送羊入虎口。
 
但係我知道，我越係捉得緊，只會加快呀詩送入啲仆街度⋯⋯
 
「有無你師兄啲相嚟啊？」需要智取。
 
「有⋯嘅，我得佢whatsapp張icon咋喎。」然後呀詩cap圖俾我。
 
果然同我相像中咁，有點型棍，笑容有啲MK，個loop塑造到幾陽光。
 




哇，個對手好撚勁喎。
 
「佢話佢係組爸喎。」我聽到，我仲係度研究緊個組爸。
 
「你⋯⋯係咪唔想我去啊？」呀詩見我無應佢，佢再問。