《我的MK妹同桌》第二季: 33

「梗係想啦，但係你做KFC，走去食麥當勞，呢下好笑姐。」
 
我真希望我哋可以就咁簡簡單單，走落去。
 
佢換件衫，就同我去食老麥，學篇文咁講，男仔真係想要一個識得知足嘅女仔陪係自己身邊⋯⋯
 
但無辦法改變嘅係，我哋會想生活慢慢變好，對金錢個概念都會慢慢轉變。
 
以前一餐50蚊已經好貴，但再出去食開啲100up嘅，相比之下就好明顯。
 




呀詩開始有返工，有搵到錢之後，享受嘅嘢多咗，雖然唔係幾大富大貴，但見嘅世界闊咗，想法上面難免會變⋯⋯
 
所以初心更顯得重要。
 
呀詩自動自覺咁睇啱食咩，就去俾錢。
 
無諗住要我俾，我覺得呢下，已經感受到佢無意間嘅體貼。
 
佢從來都無要求過要我俾錢，即使佢屋企家境麻麻地。
 




20蚊餐出咗之後，佢就淨係食20蚊餐，麥樂雞餐都食到佢舔舔脷。
 
我真係好鍾意睇到佢咁樣就滿足嘅樣，一邊食，一邊吹下水，搞到我都完全唔記得聽日就係放榜。
 
可以全心投入一段感情度，先係最幸福嘅事，可以毫無保留咁傾注自己嘅愛。
 
「聽日見啦！放鬆啲啦。」呀詩同我講，我先醒起，係啵！
 
「你驚唔驚㗎？」我哋就咁企係佢返工嘅門口度。
 




呀詩望一望手錶，然後同得我講道：「頭先咪問咗囉！仲問？」佢輕笑。
 
「驚就點都會驚嘅，但驚嚟有無用先？驚極都會等到聽日㗎啦，所以我唔想諗呢樣嘢⋯⋯」
 
「你都唔好諗咁多啦，你去同呀Ken佢哋打下機，好好享受下仲好啦！」
 
我留意到呀詩眼神閃過一絲失落。
 
佢眼神飄咗去第二度，我哋都一齊咗一段時間，有時有啲感覺會變得敏銳，對方嘅情緒變化，你會知。
 
「好啦，你放工打俾我啦咁。」
 
我去搵呀ken嘅路上，我一直反覆係度諗，頭先呀詩失落嘅表情同原因。
 
諗下諗下，呀詩放咗工之後其實都係無人陪⋯⋯




 
而我就同班朋友打通宵，會唔會佢其實係想我放榜前一日陪佢？但佢收收埋埋？
 
再諗諗下，係喎！啱喎！有可能喎！