《我的MK妹同桌》第二季: 25

「喂喂喂，你估你哋依家結婚咩。」佢哋都錫得有啲耐。


輪流我同呀詩影，但企上去忽然間感到緊張，明明我同呀詩都影唔少相，可能想留張最好睇嘅相，反而有壓力。
 
「轉下pose啦喂，頭先唔係叫得好爽㗎咩？依家唔識啦？」子晴笑說。
 
呀詩行上一級樓梯，從後圍住我條頸，個重心傾曬落我度。
 
臉貼住我。




 
佢今日噴咗香水⋯⋯一股成熟嘅味道散發出嚟。
 
「轉！」蕃薯仔玩嘢咁講。
 
「準備啦喎～」呀詩調皮地說。
 
「咩啊？做咩啊？」我滿頭問號。
 
「嗨啊！！」我頓時明白呀詩想點。




 
佢跳咗上嚟。
 
我即刻兩隻手捉住佢雪白嘅大脾，差啲重心唔穩碌落樓梯，大佬啊⋯⋯樓梯嚟㗎，玩埋啲咁嘅嘢！
 
「重唔重啊？！」佢仲好意思問我喎？
 
「屌你啦，仲問我重唔重，差啲就一齊仆街啦！」我哭笑不得。
 
呀詩亦不顧儀態咁跳出嚟，講到尾，佢都仍然仲係MK妹。




 
我同佢影咗好幾張，有正經啦，有甜蜜。
 
但我都係最鍾意佢笑到癲癲傻傻，而我俾佢嚇到呆一呆嘅嗰張相。