《我的MK妹同桌》第二季: 23

聽住首歌，睇返以前中學啲回憶，原來三年咁快就過咗去，有時係中學發生過啲唔開心嘅事，喺呢一刻都會化為烏有，只係想好好感激呢三年遇到嘅人。
 
我唔敢講所有人中學生活都係會咁，但至少我自己係。
 
我見會場有人喊，拎起紙巾拭去眼淚，我無喊，但心入面好感觸。
 
播完就輪到老師啊司儀講下幾句，就開始食飯。
 
餐飯唔係重點，重點係飯後嘅影相環節。
 




個個著到鬼火咁靚，為嘅都係想留低最後嘅回憶，就連平時唔熟嘅同學，都會互相影下相，忽然間大家都會除去尷尬，笑笑咁影張相。
 
「喂！」呀詩叫我，對我揮揮手。
 
「嚟！出去樓梯位度影張相啊，叫埋晴晴佢哋。」呀詩勁多人同佢影相，啲仔好鬼主動，又搭曬膊頭咁，嗰股醋意就嚟爆。
 
有一啲佢仲要撓埋人哋隻手！
 
「好多人搵你影相喎～～」我無應到佢頭先嗰句，單刀直入。
 




「噗！」
 
「呷醋啊？」呀詩問我，但我無應佢。
 
「你都好多女同你影相啊？咪扮嘢喎你！」
 
「我唔會搭人膊頭囉。」一陣酸味出曬嚟。
 
「你知你係特別嗰個㗎。」聽到呢句，我個心先安定好多。