《我的MK妹同桌》第二季: 9

點知一上車嗰陣，先知原來唔係咁易。
 
佢哋兩個拎到車先，已經係側邊試緊，點知一個唔為意，蕃薯仔同子晴已經炒咗車，成㗎車側曬，受唔到力，扶唔穩，所以成個人仆咗落地。
 
「喂喂喂⋯⋯」
 
本來都無乜事，但蕃薯仔喺㗎車反側嘅一剎那，攬實咗子晴，搞到佢隻手落地先。
 
只可惜子晴都有啲皮外傷，但蕃薯仔呢下嚇親子晴同埋我哋幾個。
 




「你無事啊嘛？」
「你隻手點啊？」
「做乜咁傻啊？」
 
喺危險低下嘅下意識係呃唔到人嘅，係蕃薯仔心入面，子晴比自己更重要。
 
「你沒事吧？」老闆都擔心起來，佢係見到呢幕嘅人。
 
「你要輕一點啦，你扭的時候，裁波？」之後就一連串嘅台語，聽都聽唔明，但我估大約嘅意思都係要我哋小心啲囉。
 




「你真係呢，你下次唔可以咁危險㗎！！知唔知啊？」子晴有啲焦急，兩個都唔想對方出事，閃到我同呀詩。
 
因為呀詩用力咁捉實我隻手，一言不發。
 
我拎到車，上車嗰陣佢捉到我膊頭實一實，心怕頭先嘅畫面再次發生咁。
 
蕃薯仔隻手佢話無乜事，都仲郁得，問佢係咪死頂，佢話痛到死點會死頂啊？我哋先放心啲。
 
但子晴係隔離驚餐飽，又話再係咁就唔要佢啊，唔要個斷手嘅做男朋友啊，蕃薯仔淨係識成碌木咁係度傻笑。
 




「你⋯小心啲啊⋯⋯」呀詩捉實我，擔憂地說。
 
「知啦，最多咪死！係都我死啦，我係前面喎。」我講笑咁講。
 
「唔準你咁講啊！！！」呀詩大大力咁搣我。
 
之後我慢慢揸，一路上，我點撩佢講嘢，佢都無應我。