［科幻有甜］《一場末日危機，令患上中二病的我變成救世者》18+: 第六十七章：退位

由於老洞已經漸漸回復昔日嘅人手，為咗避免再夾喺潛伏者同辛梓玲兩者之間，即使上次喺意識墳場嘅時候無機會同夏娃講，我依然決定返去老洞交棒，費事左右做人難。
「夏娃，開會前麻煩妳先跟我入大廳，有啲野我想同妳兩個人單獨講。」我決定今日同夏娃坦白表明我同佢之間嘅關係。
「你想同我講你只喜歡辛梓玲，而我只係你嘅紅顏知己，你想我幫你手打理老洞，咁你就可以返去佢身邊，係嘛？」點知入到房，夏娃居然比我更快開口。
「係喎，差啲唔記得妳同我大腦同步咗，知道我諗緊乜。」
「唔緊要，我知道地球人有樣野叫做有緣冇份，就好似我同你一樣，我明白嘅。」
我用力攬實夏娃，我咁做唔係因為要多謝佢體諒我，而係因為我內疚，我明白自己永遠都無法補償對方...........隨住時間流逝，我哋兩個獨處嘅時間一陣就過咗，因為我好快就要用彌賽亞嘅身份主持會議。

為咗平息一班潛伏者嘅爭拗，會議上，我決定企出嚟向彼得同菲臘表態：「我當初只係應承暫時做住彌賽亞，其實我絕對唔係一個攀附權力嘅人，我知道依家係時候要離開各位。」
「我認為始終撒旦嗰幫人一日未被徹底剷除，我哋過每一日都會有危機，喺呢個時候我哋需要你.......」菲臘率先第一個留住我。
「唔駛我喺度喎，你哋需要我嘅時候再搵我都得。我離開之後，夏娃就做話事人啦。」


「我相信.......我仲未有作為彌賽亞嘅能力。」聽到我講，夏娃好尷尬咁回應。
「做乜你倆個頭先唔係已經夾好晒台詞咩？唔駛扯貓尾啦........如果夏娃認為佢唔FIT嘅話，不如就由我代佢做啦！」趁我未及回應，彼得竟然搶佔先機。
「我贊成，話晒彼得喺度資歷係最高。」說話嘅係菲臘。
「既然係咁，就決定搵彼得做啦，不過有需要嘅話我會返嚟幫忙。」反正我想退出，對於菲臘嘅附和我冇理由去反對。
「我諗冇呢個必要。」彼得回應嘅時候只係斜眼望我。
「呀，差啲唔記得，呢支小型水晶棒係彌賽亞臨終時俾我，入面有關於佢來歷嘅秘密，我一直收埋冇睇，依家我代彌賽亞交俾你，你放入視像投影機就可以睇到。」講完呢句之後我就將支水晶棒交俾彼得。