［科幻有甜］《一場末日危機，令患上中二病的我變成救世者》18+: 第六十五章：回歸

想唔到夏娃一言不發，只係默默對住我流眼淚，今次亦係我第一次見到佢流淚。最後，我同夏娃嚟到一個叫轉生之湖嘅地方。全靠夏娃話我知，數據閘門一直隱藏嚮湖底。由於缺口關閉在即，危急之下，我哋一邊擁抱對方身體一邊跳入湖，然後雙雙沉入湖底，途中我以接吻方式去幫夏娃換氣。就喺缺口消失前五秒鐘，我哋成功穿過數據閘門，重新進入裡世界。結果，夏娃成功獲得重生。喺眾目睽睽之下，一個濕淋淋嘅赤裸女子從巨型生物打印缸步出。與此同時，我嘅意識亦重新回歸身體。我望住夏娃，然後走上前用力攬緊佢，並且以彌賽亞嘅身份同佢講：「夏娃，歡迎妳返嚟。」

我向夏娃交代有關佢離開我直至復活之間老洞發生嘅所有事情，佢聽完之後竟然變得眼濕濕。就喺嗰一刻，我聞到一陣好濃烈嘅咖啡味。
「彌賽亞，你要嘅咖啡。」原來係上戶彩以呷醋嘅表情同我講。
「彌賽亞，你做咁多野，最終只係救得返夏娃。即使唔計算上任彌賽亞嘅死，我哋呢邊都損失咗馬太同約翰，既然你依家嘅身份係彌賽亞，咁係咪要負責搵出內鬼呢？」企嚮一邊嘅彼得終於忍唔住開聲。
「咁你認為呢度邊個會係內鬼？」
「我同菲臘由始至終都一直追隨彌賽亞，反而呢個月闇來歷不明，依頭投靠完撒旦嗰頭又話變節，我認為佢最有可疑。」
「月闇，我上到泰坦之後遇上意外，靈魂被困喺意識墳場，就連喺嗰度唯一嘅數據閘門都被人做手腳關閉，最後僥倖先可以逃亡返嚟，以妳所知關閉數據閘門呢種事會係邊啲人做？」我飲咗一啖咖啡然後問上戶彩。
「呢層我真係唔知，總之我冇出賣你，問題係你信唔信我？」上戶彩回應時顯得一臉不悅。
「如果彌賽亞今日俾唔到一個明確交代俾班手足嘅話，佢好應該退位......」就喺呢一刻，彼得竟以咄咄逼人嘅口吻插嘴。


「其實我係應承過彌賽亞，暫時做住佢個位先，但家陣外面立立亂，我認為唔係問責下台嘅時候囉。」
「彼得，我相信彌賽亞，喺未清楚敵人身份同企圖之前，我哋一班潛伏者必須要團結。」夏娃眼見我被彼得逼宮，立即表態撐我。
「彼得，夏娃都有佢道理，喺未捉到猶大呢個叛徒之前，無謂節外生枝。」附和夏娃嘅原來仲有菲臘。
「你哋個個都唔使嘈，既然我嚮度破壞你哋嘅團結，我走！」估唔到最後表態嘅竟然係上戶彩。