［科幻有甜］《一場末日危機，令患上中二病的我變成救世者》18+: 第六十二章：不歸路

「無論成功與失敗，你選擇去泰坦嘅決定對你嚟講，只會係一條單程路，至於可唔可以由生物打印機裡面出返嚟就要睇你好唔好彩。」換上技術人員制服嘅上戶彩向我補充。
「我會盡彌賽亞嘅責任去完成任務，放心。」
喺意識傳送室入面，上戶彩利用一具不斷向外發射詭異光束嘅黑色半球體分析同下載我身體嘅所有數據，然後輸入電腦。
「當我㩒制後，你嘅意識同生物數據都會一齊上傳去天線，然後發射去泰坦，你嘅地球身體會暫時交由身上面嘅維生裝置妥善保存。準備好未？」上戶彩以一副充滿關懷嘅表情對我講。曾經投靠撒旦，如今棄暗投明嘅佢令我明白到身為一個領導者，有陣時係唔需要用威權嚟逼人就範，能夠打動對方感情，令人主動去幫你先至係王道。
「冇問題，妳沖定杯咖啡等我返嚟飲。」我一邊講，一邊將兩個耳塞插入耳孔，對耳塞能夠接收來自泰坦嘅自身意識，以便任務完成後甦醒之用。

我望住佢彎腰㩒制，諗緊一陣杯咖啡到底要唔要落奶嗰陣，我隨即斷片。醒返後，發現自己全身赤裸咁由一個打印缸內爬出嚟。原來當我成為彌賽亞後，冇須靠其他人已經可以單獨完成意識同步。
「嘩！搞咩呢度咁鬼凍？」一陣蝕骨寒意侵襲身體，雖然我置身室內，但感覺比殮房仲凍。
周圍嘅環境有啲似曾相識嘅感覺。望真啲，呢度係一間巨型嘅全自動化實驗室，天花有個圓頂，四周眨下眨下嘅紅色光線表示建築物進入咗緊急狀態。空氣之中仲彌漫住一陣好古怪嘅氣味，令到我窒息。我記得呢度正正係最初被夏娃由地球拐帶我上方舟號之前嗰個古怪嘅中轉站，但依家跟起首嘅印象唔一樣，整體結構似乎遇上某種程度嘅損壞，圓頂各處嘅罅隙都有白色煙霧滲入，代表住氧氣同熱力向外流失，睇情形呢度受到外界環境侵蝕嘅程度相當嚴重，維生指標顯示該處已經唔適合人類逗留。喺一個空氣同溫度都到達臨界點，甚至接近失控嘅極端環境下，我感覺到自己體溫正不斷流失，上戶彩話過呢度長年缺乏維修，但真係冇諗到救人之前原來仲要自救。



我利用緊迫嘅生存時間搵到電腦嘅終端機裝置，由於事前有預先彩排過，結果好容易被我搵到中轉站對上一次訪客，亦即係我同夏娃嘅生物數據。我根據電腦手冊上嘅程序將夏娃嘅生物數據上載到傳送天線，點知當我完成後，電腦卻顯示傳送天線因為電力故障，未能夠成功啟動，必須依靠外部電源先可以傳送資料，OMG！

嚮呢一刻，我望一下室內嘅維生指數，電腦估計呢度嘅氧氣只足夠我生存多十分鐘，但喺極低溫之下，情況可能會更差。最恐怖嘅係，依家我仲要利用有限嘅生命時間上頂樓替傳送天線接駁外部電源！