［科幻有甜］《一場末日危機，令患上中二病的我變成救世者》18+: 第四十五章：割蓆

我同辛梓玲交代過後，就咁離開咗佢屋企。落到樓下，我叫正太車我返去老洞，目的係求彌賽亞幫我。
入到老洞第一件事就係去大廳，嗰度一直都係彌賽亞修行嘅地方，點知當我去到大廳門前，馬太已經喺度等緊。
「對唔住小兄弟，彌賽亞今日唔會見你。」想唔到馬太劈頭第一句就拒絕咗我要求。
「你知我搵佢做咩？」
「我嘅能力可以睇穿別人內心，你嘅意識已經話晒俾我知你今次上嚟嘅目的。」
「我媽死前成個人被鬼上身變晒，我知佢一定係被撒旦擺佈先會死。我求你哋做下好心，將佢復活可以嗎？」
「俗語有句說話叫人死不能復生，由於你媽媽根本冇生物數據備份，我哋唔可以將佢復活，對唔住。」
「你知唔知我一直同緊你哋搵料，依家我媽死咗你哋就唔識人？我唔理，我要見彌賽亞！」我開始冇耐性聽馬太嘅說話。
馬太一直堅持唔俾我入去打擾彌賽亞，糾纏期間，喺我背後響起彼得粗壯嘅聲音：「叛徒，係咪你串通外人捉走夏娃？」
「你講乜野？我唔明。」我問返彼得。


「咪扮唔知，其實你心知肚明。」
「彼得，我相信夏娃失蹤件事同佢無關，你都係唔好難為佢。」馬太對彼得講。
「咁就等命運嚟決定佢嘅清白啦！」點知彼得呢頭講完，嗰頭使出太古之魂向我出招，我根本避無可避，眼見下一秒就中招。
「停手！」一度無形嘅力量將大廳道門打開，嚮我面前硬生生將來襲嘅拳風凍結，聲音嚟自入面嘅彌賽亞。

彌賽亞緩步走出，再次展現身為神所應有嘅風範。
「小兄弟，關於你媽嘅死我好難過，但馬太所講嘅的確係事實，我相信今日嘅你同當日喪妻嘅我感受完全一樣，都係擺脫唔到內疚同仇恨嘅束縛。」彌賽亞一臉正經咁講。
「我知道，一定有其他辦法........我........可以去殮房偷我媽條屍出嚟........仲可以入裡世界搵佢靈魂，只要有辦法救到佢嘅話，你要我做乜都得.........求你俾次機會我，一次........」
「小兄弟，你仲記唔記得上次喺野戰房間入面我曾經請過你食野？」
「我記得，點解要咁問？」


「當日我喺你面前將五餅二魚嘅食物複製成兩套，你仲記唔記得當兩條煮熟咗嘅魚複製完畢之後，佢哋個副本係生定係死？」
「結果係點唔重要。你係神，你自然有辦法......」
「你錯啦，潛伏者唔係萬能。」
「枉你自稱救世者，點知原來見死不救！好，我走！你哋潛伏者嘅事我從今以後唔會再理！」
「杜子奇，休得對彌賽亞無禮！」彼得目露凶光對住我講。
「彼得，唔好怪佢，由得佢走！」彌賽亞回應對方。

就係咁，我終於離開咗老洞，一路上我冇怪彌賽亞，只係怪自己太天真。一直以來人類都想受到神嘅祝福同保護，但原來神都唔係萬能，神都有佢哋嘅痛苦。