［科幻有甜］《一場末日危機，令患上中二病的我變成救世者》18+: 第四十一章：逃亡(上)

收到杜子奇電話通知的杜曉彤得悉洛不凡正進行不道德勾當的時候，決定暫時搬離住家，前往辛梓玲家暫住。杜曉彤此舉沒有對離家獨居的辛梓玲帶來不便，對方反為居所增添年齡相若的朋友而高興。
「我識子奇咁耐，佢個妹咪即係我個妹，不如妳日後叫我家姐啦。」辛梓玲說畢，把汽水遞給杜曉彤。
「唔好意思，我第日出嚟做野賺到錢會搬走。」杜曉彤一時想起哥哥，不禁傷心流淚。
「妳唔好咁諗啦，我呢度夠兩個人住嘛，況且妳嘅親人當中仲有妳媽媽，話時話，點解妳冇搵埋佢出嚟？」
「佢去咗返工，我又唔知點同佢講呢件事。」
「不如妳接埋佢出嚟住啦，妳話妳哎呀阿哥幫緊黑社會做販賣人口嘅野，專門負責喺街邊綁架年輕女仔就得。」
結果，杜曉彤以辛梓玲的故事為藍本向母親說出洛不凡的身份，兩母女並且計劃前往約定的地方會面。

那邊廂，當杜媽媽在家執拾行李之際，冷不防被洛不凡從背後碰個正著。
「細媽，到底咩事急住要走呢？」


「係咁嘅........我約咗你爸爸出外面旅行兼且住幾日，做咩，你搵我有事？」杜媽媽神色慌張地說。
「冇，我啱先喺爸爸間公司返嚟，冇聽過佢話去旅行囉........妳駛唔駛我打去問下佢？」
「唔駛啦，我啱啱先決定去旅行，我會約你爸爸嘅，唔駛麻煩你.......」
「細媽，睇唔出妳講野都幾風趣喎。禮尚往來，輪到我俾返啲好野過妳睇啦。妳係咪為咗呢樣野要走呀？」洛不凡向杜媽媽展示杜曉彤早前在他房間收藏起來的微型裝置。
「不凡，我乜都唔知道，求你放過我啦......」
「細媽，既然妳乜都唔知，留妳喺度都冇乜用啦，不如我幫妳進化，等妳變得聰明啲。」說畢，洛不凡突然從口袋內取出一支綠色藥水針筒，並往杜媽媽腰際的皮膚注射下去。