［科幻有甜］《一場末日危機，令患上中二病的我變成救世者》18+: 第三十六章：兄妹重逢

估唔到上次我叫辛梓玲幫手約曉彤出嚟見面，話咁快佢已經辦妥，就喺今日，我哋約咗一齊出嚟飲咖啡，點知曉彤一早已經到咗，於是我同辛梓玲喺外面約好先入咖啡店。一入咖啡店門口，我離遠見到一個身穿藍色鬆身T恤，擁有知性美嘅女仔坐咗喺窗邊卡位，佢就係曉彤！
「曉彤！」我隨即開口叫阿妹，但佢好似只認得辛梓玲，對我開名叫自己有啲不知所措。
「請問你係......邊位？」曉彤起初猶疑咗一陣，但佢竟然咁樣開口：「我記得，你個樣生得好似我阿哥，係上次出席佢喪禮嗰個朋友。」
「我其實......係妳阿哥......嘅朋友。」說話到嘴邊，我竟然冇勇氣去解釋。
「佢真係妳阿哥......嘅朋友，依家介紹妳認識，佢都係叫阿當。」眼見情況尷尬，辛梓玲決定仗義幫忙。
「唔緊要，阿哥嘅朋友就即係我朋友啦。況且你令我想起佢個樣，我真係好掛住佢......」講講下，曉彤竟然喊咗出嚟。

我俾咗張紙巾過曉彤抹眼淚，同時叫咗三杯咖啡一齊飲。為避免尷尬，我決定曲線進入正題：「其實我係國際刑警，依家我查緊妳阿哥單CASE，我懷疑佢嘅死係另有內情。」
「吓？我阿哥係被人害死嘅？」
「呢個只係假設。我想問妳識唔識得洛不凡呢個人？」


「認識，佢係我後父個仔。我阿哥嘅死係咪同佢有關？」曉彤好緊張咁問。
「我哋仲搵緊證據。妳幫我放呢樣野入佢房，然後收埋喺一個隱蔽嘅位置度，個微型裝置會自動收集佢部電話同電腦入面所有嘅資料，咁做唔單止可以幫到你阿哥，仲可以阻止洛不凡繼續去害人。」我將夏娃俾我用嚟蒐集近距離電子數據情報嘅微型裝置交俾曉彤。
由於曉彤面有難色，辛梓玲決定開口鼓勵對方幫忙：「我知道洛不凡絕對唔係一個好人，有次佢仲差啲想捉我，呢種人如果唔揭穿佢嘅話，我怕佢遲早會害你。」
「好，我幫你。」曉彤好堅定咁同我講。