［科幻有甜］《一場末日危機，令患上中二病的我變成救世者》18+: 第三十二章：變心之謎

就喺呢一刻，侍應將熱騰騰嘅麻辣鴨血冬粉放嚮辛梓玲面前，碗上面不斷升起嗰種水蒸氣令到佢面上增添一種詭異嘅感覺。
「我一直都冇聽妳講過，我哋成班同學去完台灣，返香港後妳都冇搵過我，我以為妳出面另外有男朋友。」
「因為你唔係我嗰類人，嗰時我唔識得點同人分享我嘅經歷，我唔想你當我係怪物，所以.......」
「.........所以即使我點努力追妳，妳都一直避開我。」
「我同你講我自細見到鬼，仲識得同佢哋打交道添，你會唔會驚？」
「未驚過。」其實係我嚮度扮野。
「你唔信？我差唔多每一日都會見到嚟自陰間嘅鬼魂，佢哋就寄居喺你嘅身邊，喺嗰邊就有一個只係得返上半身嘅女靈體喺空氣之中飄浮。」

我向佢所指嘅地方望過去，好彩時運高乜都睇唔到，但衰在嗰度係男廁門口，睇嚟我今晚走之前都唔駛去廁所。
「我依家跟住耶穌搵食，妳如果日後有咩麻煩嘅話我可以幫妳解決。」


「乜原來你信咗教？以前上聖經堂都冇見你聽書，你仲話全部都係人家老作出嚟添。」
「SORRY，以前係我細路仔唔識世界，我想話其實耶穌仲未死，我曾經見過佢同佢班使徒。」
「我唔會覺得耶穌復活係一件令人難以置信嘅事囉，因為人死咗唔代表生命完結。」
「我同意妳講法，同埋我向妳保證我絕對唔會當妳係怪物咁看待，咁你會唔會再次接受我嘅追求？」
「仲記得點樣勾手指向人家保證嘛？」辛梓玲伸出尾指，意思即係想同我勾尾指。

唔知點解，即使只係同女神尾指互扣，我個心都緊張到跳咗出嚟，加上啱先食完麻辣鴨血，額頭啲汗仲係咁滴晒出嚟添，場面非常尷尬。辛梓玲係咁望住我額頭，我立即想起一啲野去轉移對方視線：「呀！話時話妳仲記得曉彤嘛？」
「記得，我有上過你屋企，冇記錯佢好似係你細妹？」
「我好掛住佢，但又唔方便上去，妳可唔可以幫我約佢出嚟？佢認得妳，妳話想同佢敍舊就得。」
「好，咁我試下打你屋企電話揾下佢，但你到底咩事唔返得屋企？」


「屋企有件人渣。」
「吓，咩人渣咁嚴重？」
「就係上次差啲想殺妳嗰個衰人。」
辛梓玲立即記起上次被洛不凡從後箍頸件事，面上流露出恐慌嘅表情。
「嗰條友唔係靈體，佢係我後父個仔，計落算係我哎呀阿哥，但我勢估唔到佢咁賤格竟然想打我妹主意，依家佢嚮外面做埋晒啲陰邪歹毒嘅野，所以我更加要阻止佢。」
「其實你知唔知點解我出街要帶刀仔？」
「靚女出街帶刀仔，不外乎用嚟防色狼，唔係咩？」
「係就係防，不過唔係色狼，係鬼。」
「點解妳咁怕鬼？」
「我自細就被鬼魂纏身，係佢哋逼到我靈魂出竅，所以我靈魂經常蕩失路，我知佢哋想捉我去見一個人.......為咗自保，我訓練自己用武器嚟對付佢哋。到底你哎呀阿哥係唔係幫緊佢哋做野？」


「我唔知。其實我今次出嚟都係為咗起佢底。」