［科幻有甜］《一場末日危機，令患上中二病的我變成救世者》18+: 第二十五章：裡世界

在老洞內的作戰室中，今天有一人準備參與他作為潛伏者的第一次實戰行動。杜子奇與蘿莉分別坐在兩張形狀似按摩椅的座椅上。二人均戴上類似VR眼鏡的器材，四肢以至身體不同的位置皆接駁著坐椅表面不同的連繫點。夏娃與馬太分別在背後負責監察整個任務的進行。
「你嘅大腦意識數據即將要進入裡世界，嗰度係一個自從智慧生命誕生一刻已經存在嘅虛擬世界，由最先抵達地球嘅潛伏者製造出嚟，目的係俾靈體可以搵到適當嘅宿主去輪迴再生，令一切生物嘅腦波能量得以循環不息。喺嗰度，世界上嘅靈體一齊互動交流，講得簡單啲，就係一個人死後會去嘅地方，亦即係鬼魂存在嘅世界。喺今次任務裡面，你哋要檢查位於裡世界入面嘅數據通道同閘門被撒旦呢幫叛徒嘅入侵程度，目的係防止叛徒繼續利用裡世界入面嘅漏洞進入生物打印機網絡。」正當杜子奇出發去裡世界前，夏娃向他作出最後的陳述，目的是讓對方知道這次任務的危險性。
「你哋戴咗呢個好似VR眼鏡咁嘅天眼通神器就會進入裡世界，出發之後嘅一舉一動就會透過面前嘅電腦屏幕被我哋實時監控，由於阿當係第一次參與任務嘅關係，所以我哋安排咗蘿莉喺裡世界做你嚮導，佢會負責保護你嘅人身安全。」馬太負責作出補充。
「冇問題，一切清楚。」蘿莉以充滿自信的聲調回應。
「清.....清楚。」杜子奇略帶猶疑地回答。
「如果冇問題嘅話，我哋就會開始倒數：五、四、三、二、一，出發！」倒數過後，夏娃正式啟動進入裡世界的程序。

就這樣，杜子奇與蘿莉二人一起在座椅上進入了昏睡狀態。下一秒，杜子奇與蘿莉的意識人像出現在電腦屏幕上，背景是晚上的旺角鬧市。二人朝著特定方向前進。
「夏娃，點解妳唔同阿當一齊去裡世界？」馬太突然問起夏娃來。
「我曾經諗過，如果阿當一個人嚮裡世界被殺，我可以用意識同步喺度救返醒佢，但係如果我同佢一齊出事嘅話，我唔知佢復活之後可唔可以靠自己嘅能力回復自我意識，咁做太冒險，所以我選擇做佢個救生圈。」對於馬太突如其來的問題，夏娃只好極力解釋。


「根據生理鎖匙原則，潛伏者只能夠由異性幫佢哋做意識同步。妳咁做係因為妳緊張佢多過自己，我感覺到妳已經愛上咗佢，係嘛？」馬太問道。
「冇咁嘅事，我咁做只係為咗任務。」夏娃一臉尷尬地回應，然而眼角的淚痕卻出賣了她。