［科幻有甜］《一場末日危機，令患上中二病的我變成救世者》18+: 第二十三章：洛不凡

由於繼母兒子工作期間猝死，在家中缺少了一個眼中釘的情況下，洛不凡遂搬回生父與繼母的家中暫住。今天早上，洛不凡與家人一起在餐桌前吃早餐，順便討論一下近況。
「不凡，你認識喪禮上出現嗰個叫阿當史密夫嘅怪人嗎？」父親洛森向兒子問起當晚喪禮上的事。
「不凡，嗰個人話佢係子奇，究竟係咪真㗎？到底子奇係咪仲在生？求你話我知你哋後來傾過啲乜野好冇？」說話的人是杜子奇母親，亦即洛太。
「細媽，嗰個人同子奇因為撞樣嚮網上識嘅，佢係國際老千，專門搞比特幣炒賣，曾經想拉子奇落水，我當時都勸過子奇唔好惹埋呢類騙子，但佢冇理到我。估唔到子奇過身後佢竟然夠膽上嚟招搖撞騙，好彩佢嘅詭計被我及早識破。」洛不凡以老練的口吻向家人解釋整件事的來龍去脈。
「自從子奇走咗後，細媽同細妹，以至我哋呢個家都好需要你，不如你以後都搬返嚟同我哋住好冇？順便嚮生意上幫下我手。」得悉當日出現的人是騙子後，洛森正式邀請兒子回家長住。
「其實我都好想搬返嚟嘅，話晒呢度係我屋企。之前子奇的確同我有啲誤會，但係依家佢人都走咗，希望細媽唔好擺喺心入面，話晒我都想曉彤重新認識我呢個哥哥。」洛不凡繼續侃侃而談。

就在此時，良久沒作聲的杜曉彤終於按捺不住，向繼父和母親發炮：「你哋聽住，我冇呢個人面獸心嘅哥哥，喺我人生入面，就只得子奇一個大哥。」話畢，杜曉彤立即進房，並且將房門關起來。
「曉彤！佢只係一時太掛念子奇，先至會........」洛太話說到一半，由於身同感受，一時忍不住哭了出來。
「爹地，細媽，你哋俾啲時間我，遲早我會同曉彤冰釋前嫌。」洛不凡說話時展現出一向的自信。


「希望係咁。雖然曉彤唔係我親生，但畢竟你細媽最疼錫佢，我哋都想你同佢和好如初。話時話，我知你最近辭咗職，幾時決定返公司幫我手？」由於家裡氣氛突然轉差，洛森決定轉換話題。
「爹地係咁嘅，我搵到份新工，決定加入博物館做項目研究主任。」
「吓？係咩博物館？」
「係嗰間叫科技館嘅博物館，佢哋表面上係一間博物館，但實際上積極參與創科研究，聽講資金係來自內地軍方，某啲項目仲拍得住美國出名嘅大學添，我聽日就會返新工。」