［科幻有甜］《一場末日危機，令患上中二病的我變成救世者》18+: 第十三章：恐怖打印機

回收？回咩收呀？家陣殺咗人呀！係咪要DUMP去堆填區呀？我從來都未試過毀屍滅迹喎........
「你以為你真係殺死咗月闇呀？佢個備份數據一日唔被清除，佢一日都會存在。只係月闇個腦被我停止咗意識同步，喺呢段時間入面佢無法回憶同追蹤我哋嘅下落，但係如果有日光幫佢修復嘅話，好快佢會再出現返！」
吓，咁我即係冇殺到人？嚇得我........
「依家一齊掉佢條屍落去個缸入面先！」夏娃指下個巨型浴池，暗示大家一齊抬起佢。
好.......係咪一、二、三咁就掉呀？
「個打印機唔可以放入其他金屬物件㗎！」夏娃指住插入上戶彩下身嗰條鐵支，要我拔走支野。

由於支野插得好入，我點都拔唔走，唯有出力，點知就喺支野拔返出嚟嗰一刻，佢下面啲血噴到我下面成身都係，好噁心..........我同夏娃快快手咁掟上戶彩條鹹魚落個缸度，然後夏娃對住部機做咗一個手勢，入面啲藥水即時變咗做鏹水咁，將條屍十秒內溶化晒。
「月闇個身體有好多蛋白質同胺基酸成份，我哋唔可以隨便浪費宇宙間嘅生物資源㗎！」夏娃呢句野令我聽完毛管戙！佢咁珍惜生物資源，估唔到一個手勢就將成隻方舟入面所有嘅生物殺晒，巧驚呀！
「啲動植物冇死到！所有數據都備份咗喺個生物打印機網絡入面，唔信你睇下......」夏娃講完之後，又對部機做另一個手勢，個缸入面啲噴頭即時配合行動，由內臟同骨骼逐一開始打印起，之後到血管同肌肉，然後輪到毛髮，跟住變成咗一隻狗仔嚮個缸底由一個輸送台升上水面，最後仲成隻生勾勾濕淋淋咁跳出嚟添！


「佢叫小白，原本我諗住帶埋佢去系外行星旅行嘅，依家佢唯有跟我返地球暫住一下先。」
我望住小白，再望下我同夏娃個裸體，先知道大家嘅器官組織係來自同一缸材料，感覺十分噁心..........係喎，唔知啱先夏娃有冇被上戶彩扑親個頭呢？
「我冇事，只係暈咗一陣同失去少少血，呢啲傷絕對唔會影響我嘅日常表現同判斷能力。」
嘩！個頭流晒血仲可以咁鎮定，唔通外星人係冇感覺㗎？真係難以理解到一個點..........正當我發呆之際，突然醒起阿媽同阿妹一定以為我死咗！依家返去仲趕得切補飛！
「你依家返屋企，只係可以用來賓嘅身份參加你嘅葬禮。」點知夏娃忽然答我一句嚇到個心離一離嘅說話。