［科幻有甜］《一場末日危機，令患上中二病的我變成救世者》18+: 第四章：惡夢的開端

點知當夏娃放開佢對手之後，我個腦見到一個末世嘅景象：紐約被核彈移平，大量房屋焚燒，就連自由神像都得番一半。感覺就好似睇緊AVENGERS套ENDGAME咁.........
「呢條片係由平行世界嘅另一個潛伏者傳送過嚟，喺嗰度，地球已經被毀滅。」
嘩！平行世界，好玄呀！夏娃吹到咁大，但呢D又點會係我明白嘅野？正當我半信半疑之間，成個密室下面穿咗個窿，外面仲黑麻麻咁，之後個窿起勢咁擴大，但奇怪嘅係我哋又好地地咁坐喺度冇跌落下面......點解會咁？我明白啦，原因係周圍嘅牆壁變咗做透明，個窿即係隻窗，咁係因為夏娃將我對眼變咗做透視眼！睇真D，呢個黑麻麻嘅地方乜原來就係外太空？怪不得我成身好似飄飄然暈浪咁款........突然間，我見到夜空中有隻大到冇朋友嘅碟，到底係咩嚟？再望真D，原來喺外面居然俾我睇到一個十分之巨大嘅........土星！之但係.......我真係連底褲都冇著就咁去咗外太空？
「你依家相信成件事係真㗎啦！因為你身體以外嘅野唔屬於生物數據，所以你著緊嗰D衫褲同鞋係唔會被打印出嚟㗎。」夏娃又開口講。
吓！原來我同佢都係被部機器打印出嚟？怪不得成身都係一陣藥水味啦！根本成件事完全唔可以用常理去判斷，喺完全冇心理準備之下去咗外太空，咁我係咪即係被外星人綁架？
「唔駛怕，雖然我哋係由外星派嚟地球做觀察員，但我哋係唔會傷害你㗎，況且地球就快滅亡，去到系外行星後，我哋兩個仲要不斷生兒育女，而你就要負責喺嗰度保護我同D仔女，以及外出搵食，咁先可以令文明維持增長！」

到底呢班所謂嘅潛伏者係乜野生物？會唔會交配完畢就食咗我㗎？佢哋外表咁似人，應該話根本唔係人，應該冇咁好死喎.........夏娃仲話地球就快滅亡，而我又要一個人去第二個星球充軍，咁我咪即係要做開荒牛？我唔慣過原始人嘅生活㗎！
「請你一定要相信我。雖然地球人同我比係原始咗D，但當我解放你思想嗰陣，我發現你原來好特別，思想複雜得嚟又好感性，呢樣野係我哋潛伏者搵唔到，值得我慢慢去研究。其實我哋今次嘅任務，仲有多兩個潛伏者一齊參與，只要大家合作，再加上有我哋嘅高科技支援，就好似你啱先用過嘅透視能力咁，要生存應該唔難！等陣你就會見到佢哋！」講完一輪之後，夏娃立即用手指向窗外一艘又係大到冇朋友嘅太空船，跟住話：「其實我哋坐緊呢個就係由泰坦出發嘅返回艙，佢會同呢隻母艦對接。」
相信？呢度又唔係人類嘅主場，自己命仔又凍過水，我都好難一下子說服自己.........