《你信唔信，真係有前世今生》: 3.10
看著他的側臉，明明每天都看著這一張臉，卻忽然覺得這張臉有點陌生。
那時候我們只是同事，我們總是有意無意的自製了約會。
「收工食飯？」
「好啊。」
他總是會赴約。
現在，連問也不用問，固定的時間，下班、吃飯、看電視、玩手機、閒話家常，早已習慣。
不過，自從經歷重遇羅賓一事，他總是會有意無意的問候、關心。
「你宜家好啲未？」
有時，我會發噩夢，夢見Robin滿臉鮮血，然後驚醒。
我總是哭著敲Ken的房門。
「冇事嘅，佢唔會有事。」
「唔好諗佢喇，有咩事，我起度陪住你。」
每一次，他都會不厭其煩的抱著我，直到我冷靜下來。
然後把我送回房間，甚至坐在床邊伴我入睡。
一個平常的晚上，我和Ken吃完晚飯後看著電視。
「不如我地坐下露台睇星星？」Ken問。
「好。」難得他忽然有觀星的興致。
「Joyce，有啲野送比你啊。」
「點解咁好嘅冇啦啦送野比我？」
Ken從身後抽出一隻蝦尾公仔。
「冇啊，上次掉彩虹話掉蝦尾比你，最後中唔到嘛。咁啱有個朋友新開夾公仔舖，叫我試下機。我又咁啱夾到。」
「又會咁啱嘅。」我一臉質疑的說道。
「係啊。」
「你唔信啊？咁咪唔好要囉。」他一手假裝把蝦尾收起來。
「唔係，唔係，我要，多謝你。」
「哈哈，以後你每晚又多隻公仔陪你訓。你隻蝸牛有朋友仔喇。」
我們坐在露台的地下，享受著這個吹著風的晚上。
「噠」的一聲，我扣開啤酒罐的拉環。
台灣菠蘿啤酒，還是我的最愛。
冬天不是菠蘿收成的季節，可是人們真聰明，把菠蘿的味道收進罐子裡，把菠蘿的味道留下來。
我喝了一口啤酒。
「宜家係冬天，呢個季節，我地應該會見到獵戶座，根據我嘅理解，應該就係呢個方向。」Ken一臉認真的看著天空。
我抬頭仰望天空，眼前只是一片深藍，旁邊都是燈火萬家的高樓大廈，這稱不上漆黑的黑夜。
我們兩個呆呆望著天空，尋找著不存在的星星，就像在寸土不生的荒漠找一棵植物似的。
「市區真係見到星星咩？」我冷笑一下。
「咁你起度做緊咩？」Ken問。
「我諗住搵星星。」我認真的搜索著。
「哈哈，傻妹，呢啲繁華嘅地方，光害咁嚴重，點會見到星星啊」他大聲的恥笑我。
「根本你一早知睇唔到，你又話黎睇星星嘅，呃人嘅。」我用力的拍打他的手臂。
「無論你起地球嘅邊到，夜晚只要抬起頭，應該都會見到星星。如果見唔到，只不過係佢地唔想比你見到。」他繼續說。
「我淨係知我宜家見唔到。」
「你冇聽過，心入面有星星，就會見到星星。」他忽然認真的說，像在說著大道理。
「哦。」我無奈的看著天，還是找不到一顆星星。
「點解當初你會問我一唔一齊住？」我問。
「咁我咁啱諗住搬出去。我知你都要搵地方住，你都要搵個新屋企。呢段日子，呢度比唔比到屋企嘅感覺你？」他忽然看過來。
「其實屋企對於我黎講係一個好虛嘅概念，住宿舍嗰四年，我當宿舍係屋企，roommate係屋企人；但係我又好清楚我真正嘅屋企人又起台灣，呢個只係暫時住所，唔係我屋企。
宜家，我每日嘅生活都起呢間屋，我冇辦法唔稱呢度係屋企，因為我冇第二個屋企。」
「咁你起度住開唔開心？」Ken問。
「開心。有人一齊生活一齊玩，其實簡簡單單都幾好。」
「開心咁咪夠。」
「你呢，同我一齊住覺得點樣？」我問。
「我唔知，但係我呢幾個月同你一樣都好開心。」
他忽然抬起頭。
「不過.......有時候我都唔知道開心嘅日子仲有幾耐。」
「講呢啲嘅？」
「呢個世界變化得太快，好多野講唔埋。」
「唉。」
酒精驅使之下，我腦海零零碎碎的畫面飄過。
「你都知，我就黎失業，我教個科就黎冇，冇人請。」他一臉愁容，托著額頭。
「讀左咁多年，我都唔知為咩。」
「我開始唔知留起呢個地方做乜。」
「我唔知，我仲可以做咩。」
我腦海忽而冒起我大學門口的雕塑的樣子，那個不再存在的雕塑，卻又鮮明得很在我腦海中。
「喂，你間U拆雕塑啵。」
前陣子，在我畢業的那間大學，一座標誌性的雕塑被移走。
「我知道啊。咁又可以點樣？」我只是拋下一句。
面對變化的時代，我們無能為力。
人們說：留下需要勇氣，離開也需要勇氣。
而我沒有的是勇氣。
「Joyce，我有野想同你講，我都知道好奇怪。」他伸出左手，似乎想要抓住我的右手，可是又縮回去。
「如果我有多一張機票，你會唔會跟我走？」他深深吸了一口氣，然後空洞的看著前方。
我以為他會看著我。
我猜不透他是認真還是說笑。
「吓？走去邊度啊？」我問。
「唔......唔知啊。」他還是沒有轉過頭來。
「做乜冇啦啦做乜話要走？」我疑惑的問。
「冇啊，哈哈，我講下咋。」他摸摸我的頭。
「你唔好扮梁朝偉啦。」我翻了一下白眼。
「如果我係呢？你係咪會跟我走？」他繼續追問。
「呃......」這個玩笑也太無聊吧，我一臉無奈。
「我都係講下啫。」
「我唔知啊，到時再算啦。」我說。
「咁你想定唔想？」他又重新再問一遍。
「我冇啦啦做乜走？」
「算啦，當我冇問過。」他說。