《你信唔信，真係有前世今生》: 2.12
我一邊吃著外賣，一邊看著手機。
我打開了交友App，打算查看有沒有人配對了。
「Hello, Nice to meet you.]
「Nice to meet you too.」我如常的回覆。
「你平時鐘意做咩？我鐘意研究星座。」他秒回。
研究星座，好像也是挺有趣的一回事，讓人想了解一下。再看一下profile：身高178，職業：金融。資料看起來很正常，只是個人照片讓我有點著意：那是一張自拍，他穿著Hoodie，背後像是一條後巷。
從事金融業的人，一般都有張穿西裝的個人照片。即使不放西裝相，一般都是會挑張照片突顯自己的社交能力。而他竟然用了一張如此隨意的照片。
這種反差，讓我更想認識他。
「其實星座呢啲野準唔準呢？」我問。
「我自己就研究開嘅，如果覺得唔準都唔會研究啦。」
「咁又係。」
「敢唔敢賭一舖，我估中你星座，我地就出黎見個面？」
「好啊，我唔信淨係傾左兩句，你咁都估到。」
「我估你係金牛座？」
「係啊，點解你會知嘅？」我很驚訝，怎麼就憑幾句話就知道我的星座。
「金牛座嘅人最鐘意一開始問人準唔準，好驚人啲呃佢地。哈哈。」
「嗱，我冇咁諗啊。」我急忙回覆。
「不過都係比我估中。」
「好囉，你贏左。」
「話估中要見面都係講下笑，唔想嘅可以唔見。」
「冇所謂啊，咪見個面，我願賭服輸嘅。」
「哈哈，咁你幾時得閒出黎見個面？」
「今日下奏我都得閒冇乜野做。」
「咁啱我都係。」
於是，我就跟這個男生交換了聯絡。
一場突如其來的約會就這樣開始。
「我陣間出去。」我對Johnson說。
「哦。」
吃完午餐後，我打扮了一下，就出門口了。
從家走到約會的Cafe，也不過20分鐘的路程。
一路上我腦海裡是Jerry穿著Hoodie的樣子，或者，他只是想在交友App上人海茫茫中突圍而出。
手機傳來Suki的訊息：「交友App好多人sell野，呢個人仲要咁急約你出黎，仲要約你去飲咖啡，你小心啲好。」
我倒是對自己的危機意識有信心的，畢竟獨自生活了一段不短的日子。
我錢也不多，不會被他騙錢吧。再者，Cafe畢竟公眾地方，若有不妥，及時逃走應該不會有危險吧。
在離Cafe的不遠處就看到一個穿著淺藍色的襯衣、西褲，身材高挑的年青男子，就像平日在中環會看到的，一副金融才俊的樣子。
那個年青才俊左顧右盼，然後也拿起手機。
幾秒鐘後，我的手機傳來Jerry的訊息：「到左，門口等。」
我走到才俊旁邊，然後問：「你係Jerry？」
「你就係Joyce？」他轉過頭來，五官尚算端正。
「係啊。」
他身材中等，比我大概高一個頭，襯衣底下若隱若現手臂的線條，不算粗壯，但應該平常有鍛煉。
我們兩個走進Cafe，服務員把我們帶到二人座位。
這是我第一次跟交友App的人約會。看著眼前的Jerry，儘管經歷了大學四年社交的訓練，我不知從何打開話題。
「估唔到咁快約到你出黎。」他說。
「係，我都估唔到。」我禮貌的擠出笑容。
「你餓唔餓，不如叫野食先啦？」他雙手把一份餐牌遞給我。
「我唔係好肚餓，頭先食左少少野，叫杯野飲算。」我說。
「哈哈，其實我都係，你飲咩？」他問。
「Green Tea Latte 微糖小冰。」我說。
他招手示意店員過來。
「一杯Espresso，一杯凍Green Tea Latte 微糖小冰。係咁多先，唔該。」說罷，他把檯上的兩本menu遞給店員。
他微笑說道：「你可能會覺得奇怪點解我今日著得咁formal。」
可能我下意識一直盯著他的襯衣，畢竟Suki叫我提防保險佬。
「我唔係sell保險，唔係個啲起交友App呃人錢嘅人。我啱啱上左個客人屋企占卜，咁佢屋企起半山，我諗住尊重翻場合。」
「你做啲野咁有趣嘅。占卜算命係你正職？」
「唔係啊，只係我嘅興趣。我正職係打理下家族生意，都係小生意姐。你呢，做邊行嫁？」
「我起社區中心度幫手跟下啲青少年project，平時都係搞下活動咁。」相比之下，我的工作顯得比較普通吧。
「係呢，你信唔信星座？」他問。
「咁呢個世界好多野寧可信其有，不可信其無，聽下都無妨嘅。」我說。
「星座其實唔係一般人諗咁科幻，或者咁唔科學。你有冇聽過星座嘅原理係咩？」
「冇啵。」我想，大多數人都只會看星座運程，不會考究背後理論吧。
「係咁嘅，天空上嘅特殊現象會涉及到人類活動，呢個就係所謂嘅『如其在上，如其在下』。」
「我地成日講嘅星座其實係講緊黃道十二宮，呢十二宮代表了十二個基本人格型態或感情特質。天象依「上行、下效」原則反映、支配着人類活動。」
「簡單黎講，就係上面支配左我地嘅性格同特質，以致我地可以歸納出唔同星座嘅人會有相似嘅性格特質。」
我聽著這稍長的解讀，理解得有點吃力。
「喔，原來係咁，估唔到星座都大有學問。」
我接著問：「你咁犀利估到我嘅星座，不如你講下金牛座係點，我又睇下準唔準。」
「金牛座的性格就像牛一般，態度穩定，做事謹慎。行動之前都會三思而後行。金牛座嘅人，做任何事如果覺得有不確定因素，就不會輕易地涉入；但係一旦決定左開始，就會全力以赴。」
這也蠻準確，我總是下決定之前想很久。
「另外，金牛座守財，好識打理錢財，勤儉節約。」他很專業的說著，流暢自然，沒有絲毫猶豫，就像在電視上看流年運程一樣。同時又從容自在，不會讓聆聽者感覺絲毫壓力。
我低頭攪拌著Latte，然後吸了一口。
「又好似幾準啵。」
「咁你呢？你係咩星座？性格又係點？」我接著問。
「我係巨蟹。巨蟹嘅人心地善良、情感細膩。欸......鐘意照顧人啦同埋比較顧家......」
我一邊聽著，一邊看著他腼腆的臉，跟剛才專業的他判若兩人。
「哈哈，我都唔好意思講落去好似好尷尬。」他提起咖啡杯，匆忙的喝了一口。咖啡杯的邊緣留了一個深啡色，淡淡的唇印。
「哈哈，唔好意思，搞到你咁尷尬。」我只好讓氣氛不那麼尷尬。
我拿起手機，上面彈出Ken的訊息：「今晚翻黎食？佢地兩個都一齊食啊，不如食台灣野？」
「翻」
「好。」
我覆了這兩個字。
他的出現讓我想起一件事。
我打開Google，然後輸入了他的生日日期，按下搜尋。
原來Ken是射手座。
我想：「如果我知道射手座的性格，或者我就可以知道佢到底諗緊咩？」
「Jerry，想問下你......」可是，如果這樣問，Jerry會不會起疑？
於是話才到嘴邊，我急不及待的收回。
「你......有冇養寵物？」我隨意找個無關痛癢的問題。
接下來就是一連串的閒聊，大概聊了一個多小時，飲料都喝光了。
我看看時間：「1745」
不知不覺，已到傍晚。
Jerry也察覺我這個舉動，然後說：「你係咪之後有野做？咁我唔阻你喇。」
「唔會啊，我陣間翻屋企食飯姐。」我說。
「我諗間餐廳都就黎做晚市，不如我地行住先？」
「好啊。」
於是我們兩人離開了Cafe。
「你去邊度搭車？」他問。
「我行翻屋企，我住附近。」我說。
「哦，咁我陪你行翻去啦。」他馬上說道。
「唔洗啦，嗰邊唔近地鐵站。」我說。
「咁好啦，我地下次再約啦，Byebye。」他禮貌的微笑。
「好啊，Byebye。」我說，然後向著回家的方向走。
「翻到話聲我知啦。」他最後提醒。
Jerry給我的感覺像是富二代，但沒有那種看不起人的氣焰。正職是打理家族生意，來頭應該不小吧。
他待人謙謙有禮，也很懂社交的禮儀。他講話總是讓人相信的，難怪可以把占卜當成副業。
不管之後我們會發展成什麼關係，認識多個朋友也不是壞事。