不如我們分開一年，好嗎？: 第三十七章

不過就在一分鐘後，詠琳致電給我了。我不希望這麼輕易就動搖，既然花了這麼多時間考慮，痛苦地作了決定，又怎可以因為她打給我就推翻了……又或者說是忘記了以往的痛苦？於是我沒有接聽我電話。

不過詠琳似乎沒有因為這樣就放棄，她連續致電了數次，但我依然拒絕接聽。我乾脆關掉了電話鈴聲，然後去煮個早餐吃。煮完早餐再去查看電話，居然有十多個未接來電，全都是詠琳打來的……還有一條whatsapp。

「可唔可以聽一次電話？」

我沒有理會她，繼續吃我的早餐。可能是我剛才煮的時候分了神？我覺得這頓早餐很難吃。

「叮噹！」門鈴忽然響起，我透過防盜眼看一看，就見到詠琳站在我家門前。





我一直看著，等待她離開。但我們就這樣站了五分鐘，她依然絲毫沒有離開的意欲。

我們就這樣對望着，而中間隔著一扇牢不可破的門—除非我選擇開門。

但最終我還是心軟了。我打開了門，然後我還未給指示，詠琳就衝了進來。她拿著一個小紙袋，坐在沙發上，雙眼通紅，不發一言的看着我。我沒有理會她，繼續吃着自己的早餐。但是我吃完早餐，詠琳依然怔怔看着我。我受不住她的眼光，便開口問道:「你想做乜呀？」

她扁着嘴，強忍眼淚看着我。「做乜要咁嬲喎？」

「你連我地最重要嘅日子都留咗俾人，我點可以唔嬲？」





「 咁…… 我都係因為今日有得補返數，所以我先至同佢地去慶祝生日咋嘛……」

「個問題根本就唔係我地有無去慶祝，而係個日子本身就好重要。」

「我知呀……所以我琴晚完咗之後都想即刻去搵你食糖水，但係點知見你已經去咗瞓覺，所以先無搵你咋嘛……我都有打過俾你架，不過你已經熄咗電話……」

「你梗有個原因架。」

「我講真架！我真係無呃你……」





「我知道你無呃我，但係咁就證明咗你重視你班朋友多過重視我啦。」

「唔係架……」

「 其實係咪一直都無當過我係你男朋友？」我終於嚴肅地問了這條我一直很想問的問題。

詠琳聽到我這樣問，原本一直在眼眶打轉的眼淚終於忍不住掉下了。但我無動於衷，也許我的憤怒，已經蓋過了我對她的愛。

「原來我咁都唔算當你係男朋友咩……」詠琳哽咽着說。「如果唔當你係男朋友我點會年年情人節都同你過？我點會特登唔搭私家車同你一齊返學？我點會每朝都餵你食朱古力呀……我仲以為你知道咗我個答案添，原來你都係唔知……」

那麼「哈哈」是代表「是」？既然如此，你為甚麼不直接答我是？ 你真有這麼愛玩弄我嗎？

「我發覺我真係成日都唔知你想點……我覺得同你一齊好辛苦呀，成日都要花心思估你諗乜，我覺得攰喇。

你仲記唔記得我地參加小提琴比賽打和，我地可以向對方提出一個要求嘅？我而家終於諗到我嘅要求係乜喇。」我深呼吸，然後跟她說了最後一句話:「不如我地分開一年先啦，好嘛？」





詠琳垂下頭，任由淚珠掉在地上，然後一言不發，就離開了我的家。